2 Chay śhunꞌuyquićhu uchuy jäcullanćhüpis caycälichimay.

Manamari mayanniquitapis ima mana allintapis lulapäculacchu,

nïtac mana allin lulayman pictapis palpuchipäculacchu,

nïtac mayantapis yanꞌal lulachiculcälächu.

3 Caynu niyalcac manam cäraycuynïwanchu.

Aśhwanpam nipäcuśhac-yupaypis śhunꞌüćhu lluy caycälinqui;

amcunawanmari cawsaśhäpis,

wañuśhäpis.

4 Lluy caycunacta mana lisiräyalmi niycälic.

Amcunapi sumä alawacuyalmari ima sasachacuynïcunaćhüpis sumä callpanchaycuśha cushicuyní camacaycülä canpis.

5 Ñatac Macedoniaman ćhäpäcuśhäpïta jamaycuyta manam talipäculächu.

Aśhwanpam imaymana sasachacuycunalla intuycälimäla:

muyülïnïpïtá ñacaycunallam,

śhunꞌüćhuꞌa manchacuycunallam.

6 Ñatac llaquishacunacta callpanchaycü Tayta Diosmi Tito ćhämuśhanwan callpanchaycälimäla.

7 Manam ćhämuśhallanwanchu,

aśhwanpa payta callpanchaycälishayquita willaycamäśhanwanmi.

Jinaman maynu sintipämäśhayquita,

maynu llaquiculcäśhayquita,

pinsamintuculcäśhayquita niycamaptinmi sumä-sumälä cushicülú.

8 Ñatac cartá llaquilächishuptiquipis manam llaquicuná canñachu.

Rasunpa puntacta llaquiculá,

cartacamuśhäca llaquilächishuptiquim masqui chay mana ancha unaypa cayaptinpis.

9 Cananmi ichá sumä cushicú;

manam llaquichipäcuśhacpïchu sinuꞌa llaquicuyniqui wanacuyman puśhaycälishuśhayquipïmi.

Rasunpa,

Tayta Dios munaśhanmannümi llaquicälälinqui;

chayurá mana allinta manam lulapäculacchu.

10 Ñatac Tayta Dios llaquichimäśhanchicꞌa wanacuytam wayuycun.

Chay allin wiñay cawsayman puśhaycamänanchicpä cayaptinꞌa manamá llaquicuyänanchicchu.

Nunacunallap llaquicuyninmi ichá wañuyllacta wayuycun.

11 Má,

licacaycäliy-ari Tayta Dios llaquichipäcuśhuśhayqui imacta wayuycälichishuśhayquitapis:

¡maynümi priucupälälichishulanqui,

maynümi allin canayquipä wañupacachishulanqui,

juchacta maynümi millachicachipäcuśhulanqui,

maynu manchälächishulanqui,

maynümi allin tincüninman licaycälinayquipä wañupacachishulanqui!

Chay pasaśhayquicunaćhümari mana juchayu capäcuśhayquita camalaycälichilanqui.

12 Masqui isquirbimulpis manamá chay mana allincäta luläcäpächu,

nïtac chay mana allincäpa pasäcäpächu lulamulá.

Sinuꞌa maynu-maynu yaꞌacunapi wañupaculcäśhayquita Diospa puntanćhu quiquiquicuna tantiacaycälinayquipämi isquirbimulá.

13 Lluy caycunamari allicta callpanchaycäliman.

Jinaman amcunapi Tito pinsamintucuśhanta jawcayälächiptiqui,

sumä cushisha caśhanta licayculmi mas mastalä cushiculcäläpis.

14 Amcunapi allicta alawacuśhäta Titocta niläñam.

Chayurá ¡manamá pinꞌayman julaycälimälanquichu!

Lluy nishäcunaca rasu-rasuncälla caśhannümi,

amcunapi Titoćhu alawacuśhäcäpis licalïlun.

15 Canan pay mas cuyaywanlämi licaycälishunquipis,

allinpa manchacuywan ćhasquiycul uyalicü-cama capäcuśhayquita yalpal.

16 Yaꞌa sumämi cushicú ima aycaćhüpis amcuna chalapacuna capäcuśhayquipïta.