Juccunäpa allinninpämi lulaycunanchic
15
Chalapacuyninchicćhu masïsu cäcunaca,
quiquinchicpa munaśhanchicta ashiyäśhanchicnuꞌa tanquicaćhayäcunäta yanapaycunanchicmi.
2 Chayurá chalapacü-masinchic wiñaycunanpämi allinninta lluypis ashiycunanchic.
3 Aśhta quiquin Salbacüninchicpis manam quiquinpa munaynintachu lulacula.
Sinuꞌa Diospa shiminćhu niyanmi:
“Ćhïnishüniquicuna palaśhuśhayquita yaꞌami ćhasquiyculá”a nil.
4 Rasunpa,
unay isquirbishancunaca yaćhachimänanchicpämi isquirbïsha cayan.
Chay yaćhachicuymi yanapaycamanchic chalapacuśhanchicman callpanchacul,
pasinsiawan,
masïsu alcaycunapä.
5-6 Canan,
callpanchaycü cunsuylaycü Tayta Diosninchic juc śhunꞌulla tuquip apanacüta Jesusninchic-yupayta cawsaycälichishunqui Salbacüninchic Jesuspa Taytan Diosta juc śhunꞌulla,
juc shimilla altuman julaycälinayquipä.
7 Chayurá Salbacüninchic ćhasquiycälishuśhayquinuy quiquiqui-pulacuna allinpa ćhasquinacaycäliy Tayta Dios altuman juluycuśha cananpä.
8-9 Caypämari Israelcunäpa nunannuy Jesus śhamula;
awquillunchiccunaman Dios limalicuśhanca rasun caśhanta camalaycachilmi chalapacuna caśhanta tacyaycachila,
jinal llaquipayniyu Tayta Diosta mana-Israelcunaca altuman julaycälinanpä.
Isquirbishancunaćhu niyanmi:
“Chaymi mana-Israel malcacunäćhu alawaśhayqui;
amtam imnucunawan taquishayqui”b nil.
10 Chaynütacmi niyantac:
“Mana-Israelcunäpis,
Israelcunäwan cusca cushiculcay-ari”c nil.
11 Chaynütacmi:
“Mana-Israelcuna Taytanchicta alawapäcuy;
llapa malcacuna altuman julaycäliy”d niyan.
12 Chaynütacmi Diospa willacünin Isaiaspis niyan:
“Isaïpa milayninmi chillquimunꞌa mana-Israel malcacunacta gubirnananpä.
Paymanmi lluy chalapaculcanꞌa”e nil.
13 Chay chalapacuna Tayta Diosninchic-ari chalapacuśhayquipa cushicuywan juntaycälichishunqui,
jinaman jawca cawsayta uycälishunqui.
Chuya Ispiritunpa munayninwantac payman alcayniquita masta-masta wiñaycachishunqui.
Mana-Israelcunäćhümi Pablo lulaycun
14 Chalapacü-masïcuna,
tuquictam tantiaycú amcuna llaquipayniyü-cama yaćhayniyü-cama sumä caycälishayquita,
chaynütac yaćhachinacaycälinayquipäpis.
15-16 Chaynu captinpis cay waquinnin isquirbimuśhäćhuꞌa mana unꞌapäcunayquipämi mana pacaycullal nï lisirällal isquirbiyämú.
Tayta Dios llaquipayninćhu Jesuspa sirbïninpa ćhulaycamäśhanpamari caynu lulaycamú mana-Israelcunäpa allinninpä.
Sasirdütinümari paycunacta allin willacuyta willaycú Tayta Diospa śhunꞌunpänuy Chuya Ispiritup chuyanchäśhacta ćhulaycunäpä.
17 Chayurá Salbacüninchic Jesus yaꞌaćhu lulaycuśhanpi,
Tayta Diosta sirbishäpi alawacümanmi.
18-19 Ñatac manamá imapïpis limaśhächu,
sinuꞌa Tayta Diosta mana-Israelcunaca cäsuculcänanpä,
limaycunap lulaycunap milagrucunap nuna lulay mana atipanancunap Chuya Ispiritunpa sumä munaynincunap yaꞌawan Jesus lulaycuśhallanpïmi.
Aw-ari,
allin willacuytam lluy willaculá Jerusalenpi allaycul aśhta Iliria-läducamapis.
20-21 Ñatac Salbacü Jesuspi mana willacuśhancunäman allin willacuyninta willacunäpämi munayní cala jucpa lulacuśhanman mana śhalcayächinäpä.
Aw-ari,
Diospa shiminćhu nishannümi munayní:
“Paypi mana imaypis uyalïcunämi licapäcunꞌa;
paypïta mana uyalïcunätacmi tantiapäcunꞌapis”f nil.
22 Cay lulaycämari,
masqui achca cuti amcunaman watucuycü śhamunä cayaptïpis,
chalalämäla.
Roma malcätam Pablo watucuyta pinsan
23-24 Cananꞌa cay-lädućhu lulanäcunaca manaña cayaptinꞌa,
jinaman achca watapïña watucüniqui wañupacayämulꞌa,
España nasyunta lilmi amcunaman ćhämuśhä.
Chaynu amcunawan cusca tuqui allin caycuśhanchicpi,
biäji pasanäpä yanapaycälimänayquitam alcaycú.
25-26 Cananꞌa Macedoniaćhu Acayaćhu cayä chalapacü-masinchiccuna śhunꞌunpi yaluycuptin Jerusalenćhu mana cäniyücunäpa illay juntuycälishantam apayá.
27 Llapan śhunꞌunwanmari lulaycälila,
masqui chaynu jinaycälinan cayaptinpis.
Israelcunaca sumä allincäta ćhasquiycälinanta mana-Israelcunaca prubichayalcalꞌa,
paycunapis cänincunawantacmari prubichaycälichinan.
28 Chayurá cay juntuycälishanta maquinman ćhulaycamulmi,
Españaman yalamuśhä.
Chay pasädaćh amcunacta watucaycälishayqui.
29 Ćhämulꞌa Jesuspa lluy allin ćhaniyünincunawanlämi ćhämuśhäpis.
30 Chalapacü-masïcuna,
Jesusninchicćhu chaynütac Chuya Ispiritup cuyacuyninćhu caycuśhanchicpa yanapaycälimay Tayta Diosninchicta mañacawshimayta.
31 Mañaculcay Judeaćhu cä mana chalapacücunäpa maquinman nï ćhaycunäpä,
jinaman Jerusalenćhu chalapacü-masinchiccunapis cay yanapaycuy apaśhäta allinpa ćhasquiycälimänanpäpis.
32 Chaynüpaćh Tayta Diospa munayninwan cushisha amcunaman ćhaycamuśhä,
jinal amcunaćhu allin jamapaycuśhä.
33 Jawca cawsaycachï Tayta Dios amcunawan caycuchun.
Chaynu cachun.