Abrahammi chalapacuyllanpa allinpa licaycuśha
4
Ñatac lluy caycunapi ¿imanichwanmi awquillunchic tayta Abrahampi?
2 Sïchuśh Abraham lulayninpa Tayta Dioswan allinpa caycuptinꞌa,
alawacunanpä canmanćhá cala.
Ñatac Tayta Diosćhuꞌa manamari.
3 Chaymi Diospa limayninćhu niyan:
“Tayta Diosman chalapacuśhallanpam Abraham allinpäña ćhasquiycuśha cala” nil.
4 Canan má,
lulachicuśhanchic nunap pägunta manam rigalayänüchu uyanchic,
sinuꞌa lulaśhanpi tincüninmanmi unchic.
5 Ñatac mayanpis quiquillan lulananpïtá,
jucha-sapacta juchannäman muyuchï Tayta Diosman chalapacullalmi ichá,
allin chuya nunapäña licaycuśha cayan.
6 Caynu nunacunäpa lulayninta mana licallal juchannäta Tayta Dios licaycuśhanta,
puydï mandacü Davidpis tantialam.
Paycunapïtamari isquirbishanćhüpis “sumä cushishacuna” niyan:
7 “¡Paycunapá maynu cushicuymi juchanta pampachaycuśhanpi,
mana allinnincunacta chincaycachishanpi!
8 ¡Maynu cushicuymi juchancunacta manaña imaypis Taytanchic yalpalcuśhancunäpá!”a
nil.
9 ¿Cay cushicuy Israel siñalachicüśha caśhtacunallapächun icha juc-lädu mana siñalachicüśhacunäpäwanchun?
Nilanchicmari chalapacuyllanpa Abrahamta allinpäña Tayta Dios ćhasquiycuśhanta.
10 Chaynu captinꞌa ¿imaytá allinpa ćhasquiycula,
siñalachicüluptinñachun icha puntactalächun?
¡Manaläpis siñalachicuptinmá!
11 Chaypïlämi siñalachicula.
Chay Tayta Dios mana juchayütaña chalapacuyllanpa ćhasquiycuśhanta camalachinallanpämi cala.
Ñatac payman chalapacula manaläpis siñalachicüśha cayalmi.
Chaymi Tayta Diosman chalapaculcalꞌa lluy mana siñalachicüśhacunäpis Abrahampa ayllunña cayalcan.
Chaymi paynüpis mana juchayüña licaycuśha cayalcan.
12 Chaynütacmi siñaläśhacunäpis milaynincuna cayalcan.
Manam siñaläśha cayllanpachu,
sinuꞌa manaläpis Abraham siñaläśha cayal chalapacuyninpa laśhćhunman jaluycuśhanpawanmi.
Limalicuyta chalapacuyllapam ćhasquinchic
13 Tayta Dios limalicula Abraham lluy milaynintin jinantin pachäta ćhasquiycunanpä manam camachicuyta lulaycuśhanpachu,
sinuꞌa Tayta Diosman chalapacuśhallanpam.
Chaymi mana juchayütaña Dios licaycula.
14 Chayurá “Tayta Diospa limalicuśhanca camachicuyta cäsucücunapämi cayan” niyaptinchicꞌa,
Tayta Diosman chalapacuypis yanꞌalmá,
limalicuśhanpis,
pampapämá.
15 ¿Imactamá camachicuyca limalicun?
Mana cäsucünincunacta mućhuycachiyllactamá.
Ñatac camachicuy mana cayaptinꞌa jalutacuy manamá canmanchu.
16 Chaymi limalicuyca chalapacuyllanchicpa śhamun Tayta Diospa llaquipayllanpa caśhanta camalaycachimänanchicpä.
Caynüpamari Abrahamman limalicuśhanta tacyalpachin llapa milaynincunapäpis.
Yapa niycuśhayqui:
Manam camachicuyta lulay jicutänallapächu,
sinuꞌa Abraham chalapacuśhannuy Tayta Diosman chalapacuśhanchiccunäpäwanmi.
Paymari chalapacuy cüsacunaćhu lluypa awquillunchic,
Diospa shiminćhu nishannüpis:
17 “Lluy nasyuncunap awquillunmi canqui”b nil.
Abraham chalapacuśhan Tayta Dios caymari:
wañuśhacunactapis cawsayta uycücämi,
limayninwan mana cäpïpis licalichïcämi.
18 Masqui lluy mana lulacacünuy captinpis Tayta Diospa limalicuśhanmanmi Abraham chalapacula.
Chaynu jinaśhanpamari achca nasyuncunap taytan licalïla,
limalicuyćhu:
“Achcam milayniquicuna canꞌa”c nishanmannuy.
19 Chaynu aychan wañuypa patanćhü-yupayña cayaptinpis,
paćhac watayü-yupayña cayalpis,
jinaman walmin Sara mana waćhacü chacwaśhyayaptinpis,
Diosman chalapacuyninꞌa manam mirmalachu.
20-21 Manatacmi ishcayyayälachu “Limalicamäśhanca rasunpachućh icha yanꞌalchućh” nil.
Aśhwanpa chalapacuyninpam callpanchaculapis;
Tayta Diostapis altuman juluycul sulpäta ucula “Taytá limalicamäśhancäta lulaycunꞌamari” nil.
22 Chaymi Diospa shiminćhüpis,
“Chaynu chalapacuyllanpam Tayta Dios allinpäña ćhasquiycula”d niyan.
23-24 Caynu “Tayta Dios chalapacuyllanpam juchannäta ćhasquiycula” nishanca manam payllactachu niyan sinuꞌa yaꞌanchictapis niyämanchicmi.
Yaꞌanchictapis mana juchayüta licaycamanchic,
Duyñunchic Jesusta wañuycäpi śhalcachimücäman chalapacuśhallanchicpam.
25 Aw,
juchanchic-laycum Tayta Dios wañuycäman Jesusta ćhulaycula.
Jinaman juchannätaña licaycamänanchicpämi śhalcachimula.