Llapa nunam Diospa ñawpäninćhu juchayu
2
¿Icha nipäcunqui “Ima cá nunacunatan” nilchun?
¿Nipäcunayquipä mayan tucuyalcanquitan?
Paycunacta cäraycuyalꞌa quiquillayquim cäraycucuyalcanqui.
Amcunapis chaynu cayalcalꞌa,
manam imapi imaninayquipis canñachu.
2 Canan yaćhanchicñam caynu cawsäcunäta Tayta Dios rasun allincämannuy cäraycunanta.
3 Chay juchachaycälishayquinuy amcunapis lulayalcalꞌa ¿imanuypatá Tayta Diospa cäraycuyninpi ayïlälinquiman?
4 Icha ¿llaquipaynintawan pasinsiaynintachun jalutacuyalcanqui?
¿Icha manachun tantiapäcunqui juchayquipi wanacunayquipä allin pasinsiayniyu llaquipayniyu pay caśhanta,
imatá?
5 Chaynu mana uyalicul śhunꞌuyqui munaśhanta lulayalꞌa Tayta Dios tincüninman cäraycunancäpä piñacuyninta mas mastalämi tawacuyalcanqui.
6 Chay muyunmi “Lluy nunacta lulaśhanman tincüta Dios uycunꞌa”a
7 Allincäćhu tacyaycul Tayta Dioslla altuman juluycunanta,
allinpa licaycunanta,
wiñay cawsayta uycunanpä ashiycunätá pay quiquinmi uycunꞌa.
8 Ñatac chay allincäta ipanchaycul pasaypi cullucuycul mana allincällacta ashïcunätam ichá,
Tayta Dios sumä piñacuyninta caćhaycülunꞌa.
9 Caynu nunacunapämi waꞌacuy llaquicuy,
ñacaycuna cacunꞌa,
masqui Israel mana-Israel caśhta captinpis.
10 Allin luläcunapäñatacmi ichá jawca cayllaćhu altuman juluycuśha allinpa licaycuśha imalä capäcunꞌapis masqui Israel mana-Israel caśhtapis.
11 Tayta Diosꞌa chaycuscactam llapa nunactapis licaycamanchic.
12 Ñatac camachicuyniyu cä juchayu Israel caśhtactapis,
ütac mana camachicuyniyu cä juchayu juc caśhtactapis Tayta Diosmi chaymannuy cäraycunꞌa.
13 Camachicuyta uyalishallayquipachu manamari Tayta Dios juchannäta licanꞌa,
sinuꞌa cäsucücunätamá.
14 ¿Manachun licanchic chay mana camachicuyniyu caśhtacunaca quiquillanpi tantial camachicuy nishanta lulapäcuśhanta,
imamá?
Caymari tantiachimanchic paycuna imacta lulapäcunantapis mana lulapäcunantapis tuquicta yaćhapäcuśhanta,
masqui isquirbishaćhu mana uywayalcalpis.
15 Lulaynincunamari camachicuyca śhunꞌunćhu caśhanta camalachin.
Quiquinpa śhunꞌunmari lulaynincuna allin mana allin caśhantapis niycun.
16 Cäraycunan muyuncäćhüñatacmi Tayta Dios niycuptin llapa nunap śhunꞌunćhu pacacuynincunacta Jesus cäraycunꞌa.
Cay canꞌa allin willacuyta willacuśhämannümari.
¿Imanuymi rasun Israel caśhta cay?
17 Ñatac “Israel caśhtam cayá” nil ¿mayan tucunquitan?
Camachicuyman chalapacuyanquitac,
jinaman Tayta Diosta lisishayquipïtá nunatucunquitac.
18 “Tayta Dios yaꞌacunapi imacta munaśhantapis yaćhayämi” nil niyanqui.
“Camachicuypatacmi allincäta aclaycunapäpis yaćhayá” niyanquitacmi.
19 Chalapacuy cüsacunaćhu aplacunäpa puśhaycünin tucuyalcanquimá.
Jinaman tutapäćhu pulïcunäpä acchi-yupay puśhänin-tucuyanquitacmá.
20 Mana tantiayniyücunäpäpis müsucunäpäpis yaćhachicünin-tucunquimá.
Lluy caycunawan “Camachicuymi llapa yaćhaytapis,
rasuncätapis uycaman” nilmi niyanquipis.
21 ¿Chaynu nuna-masiquicunacta yaćhayächilchun,
quiquiquiñatac yaćhachishayquimannüchu mana lulanquiman?
“Manam suwacunachu” nil yaćhayächilpis,
¿manachun quiquiqui suwacuyanqui?
22 “Manam mansibacunachu” nil yaćhayächilpis,
¿manachun quiquiqui mansibacuyalcanqui?
“Taytachacunacta ćhïnïmi” niyalpis ¿manachun chay taytachacunap imapis cänincunacta wañupacuyniquiwan suwacuyalcanqui?
23 Chaynu Diospa camachicuyninpi nuna-nunaycuśha yaćhätucuyalcalpis,
¿manachun mana cäsucuyniquiwanꞌa camachicuyta jalutacuyanquitac?
24 Chaymari Tayta Diospa unay willacüninpis niyan:
“Amcunap janayquimá llapa mana-Israelcunapis Tayta Diosninchicta jamuyan”b nil.
25 Rasunpa,
mayanniquipis umri cayniquićhu Tayta Diospä siñalachicuśhanca allinmi camachicuyta cäsucuptiquiꞌa.
Mana cäsucuptiquiñatacmi ichá mana siñalachicuśha-yupay cayanqui.
26 Ñatac mana siñalachicuśha mana-Israelcunaca,
camachicuymannuy cawsaycuptinꞌa,
¿manachun siñalachicuśhactanuy Dios licaycunꞌa,
masqui mana cayaptinpis?
27 Amcuna camachicuyta mana cäsucuptiquiꞌa,
juc caśhta mana siñalachicüśha camachicuyta cäsucücunämi amta cäraycälishunqui,
masqui siñalachicüśha jinaman camachicuyta uywayalcaptiquipis.
28 Israel caśhta cay,
manam janällanchicćhu lulaycaćhaśhallanchicpachu;
nïtac aychallanchicćhu siñalachicüśhanchicpachu.
29 Rasunpa Israel caśhta cayꞌa lulïninchicpïmá;
siñalachicuycäpis śhunꞌunchicpïmá.
Caynu śhunꞌu manamari isquirbisha camachicuypïchu śhamun,
sinuꞌa Ispiritup wayuyninpïmi.
Caynu nunacta manam nuna-masillanchu allinpa licaycunꞌa sinuꞌa quiquin Tayta Diosmari.