Jerusalen libraycuśha cananpämi nin
12
Cayćhu Tayta Diosmi Israel caśhtacunäpä willacachin.
Janay pachäta camaycü,
cay pachäpa simintuntapis ćhulaycü,
jinaman nunätapis cawsayta uycü Tayta Diosmari nin:
2 “Jerusalentam shincachicü cüpactanu muyülïnin malcacunäpä ćhulaycuśhä.
Cay Jerusalentawan jinantin Juda läductamá lluy cunćhälälinꞌa.
3 Jerusalenpa cuntranmari jinantin pachäćhu nasyuncunaca juntunaculcanꞌa.
Ñatac chay timpumá mana cuyulï wancactanu Jerusalenta ćhulaycuśhä.
Jinaptïmi mayanpis cuyuchiyta munäcunätá quiquinta ñitïlunꞌa.
4 Chay timpućhu lluy cawalluncunactapis manchächishämá;
sillädancunactapis lücuyächishämá.
Lluy nasyuncunäpa cawalluncunactamari aplächishä.
Ñatac Juda läductam ichá ñawilläćhu caycachishä.
Yaꞌa Tayta Diosmari niyá.
5 Chayta licalmi Juda lädup puydïnincuna śhunꞌullanćhu niculcanꞌa:
‘Sumä munayniyu Tayta Diosmá Jerusalenćhu yaćhäcunäta callpanchaycun’ nil.
6 Chay timpućhümi Juda lädup puydïnincunacta muntip ćhawpinćhu śhanśha walayätanu licaliycachishä;
chaynütac trïgu alcüśhap ćhawpinćhu nina latayätanu muyuycachishä.
Jinaptïmi muyülïninćhu malcacunäta lluy-lluy camacaycülunꞌa.
Ñatac Jerusalenćhu nunacunacá chay caśhan malcallanćhümá yaćhapäcunꞌa.
7 “Jerusalenta manalä salbayculmi Juda läducunätalä yaꞌa Tayta Dios puntacta salbaycuśhä.
Chaymi Davidpa milaynincunawan Jerusalenćhu yaćhäcunaca tantiaculcänan chay cuscapa licaycuśha caśhanta.
8 Chay timpućhu Jerusalenta yaꞌa Tayta Diosmá pacaycuśhä.
Aśhta pishi callpayücunäpis mandacü Davidnümá sumä caycälinꞌa.
Davidpa milaynincuna Tayta Diosnümá gïrraćhu sumä caycälinꞌa;
puntanta lï Tayta Diospa anjilninnülämari puntaycälinꞌapis.
9 Chay timpućhümá Jerusalenpa cuntran śhalcü nasyuncunäta yaꞌa camacaycüśhä.
10 “Ñatac Davidpa am milaynincunactawan Jerusalenćhu yaćhäcunätam ichá llaquipaycü-cama,
llampu śhunꞌuyü-cama capäcunayquipä muyuycachishayqui.
Chayćhümi lansawan yaꞌacta tucsipämäśhayquita licapämal,
japallan chuliquipïtanu waꞌapäcunqui,
mayur chuliquipïtanu awćhupäcunqui.
11 Chay timpućhümari Meguido pampaćhu cä Hadad-rimon nishanpi llaqui waꞌacuy caśhannu Jerusalenćhu sumä-sumä waꞌacuy cacunꞌa.
12 Jinantin Juda lädućhümá ayllunpi-cama waꞌapäcunꞌa:
Davidpa aylluncunam walmintin-cama,
Natanpa aylluncuna walmintin-cama,
13 Levipa aylluncuna walmintin-cama,
Simeipa aylluncuna walmintin-cama,
14 chaynütac lluy ayllucunäpis walmintin-camamá waꞌapäcunꞌa.