Malcanta libraycunanpämi Tayta Dios nin
10
Tamya timpućhu tamyamunanpä
Tayta Diosllactari mañaculcay.
Tayta Diosmari pucutayta licalichimüca,
tamyacta sumä tamyachimüca,
ćhaclayquicunaćhu birdillacta sumä wiñaycachimücäpis.
2 Ñatac licacücunaca ima nishuśhayquicunäpis artillamá;
“Taytachacunam limapäman” nil
willaycuśhuśhayquicunacá yanꞌal-yanꞌalmá.
Imapä suyñuśhancuna willacuśhancunäpis
śhunꞌu cushichiyllamari.
Jinaptinmari nunacunaca mana michïniyu
uwishcunänu pantäśha ñacayalcan.
3 Chaymari Tayta Dios nin:
“Piñacuyní sumä-sumä walayaptinmari
chay malcäpa caminaycü michïnincunacta mućhuycachishä.
Yaꞌa sumä munayniyu Tayta Diosꞌa uwishnïcunacta,
Juda malcäta ñawilläćhümari caycachí.
Gïrraćhu pilyananpä sumä-sumä
cawallumannülämá muyuycachishäpis.
4 Judapïmá yalamunꞌa:
allin chalänin lumica,
carpap ishtacan,
gïrrapä flïcha ćhächicunpis,
jinaman lluy puydïcunapis.
5 Lluy paycuna sumä-cama pilyäcunanümá
ćhïnicünincunacta mitucta jaluśhannu jaluypa pawälälinꞌa.
Yaꞌa Tayta Dios paycunawan cayaptïmari paycuna pilyapäcunꞌa.
Aśhta cawallunman sillacälälisha śhamü
ćhïnicünincunactapis uyshulächipäcunꞌamá.
6 “Juda aylluctamá yaꞌa tacyaycachishä;
Josepa milaynincunactapis salbaycuśhämá.
Paycunacta llaquipayculmi malcanman caśhan cutiycachimuśhä.
Imaypis mana ipanchaśha cayäcänümá caycälinꞌa.
Paycunap Tayta Diosnin yaꞌa cayalmari
mañacalcämäśhanta imaypis uyaliycú.
7 Efrain läducunaca sumä-sumä pilyäcunanümá capäcunꞌa;
bïnu upyäśha cäcunänümari cushiculcanꞌa.
Chayta licapäcul chulincunapis cushiculcanꞌatacmá;
yaꞌa Tayta Diosćhümari śhunꞌunpis cushiculcanꞌa.
8 “Wishyaywan ayalculmi
paycunacta juntuycamuśhä.
Librayculmá achcaman caśhan puntanu milaycachishä.
9 Masqui may nasyuncunaman chiꞌichiptïpis,
chay calu malcacunäćhu yaꞌapi yalpaćhaculcanꞌam.
Chayćhu chulincunawan yaćhapäculpis
malcanman cutipämunꞌamá.
10 Egiptopïtam paycunacta cutichimuśhä;
Asiriapïtam paycunacta juntumuśhä.
Galaad,
Libano läducunaman puśhamuptïmá
achca milaynincuna captin
chayćhu allpapis mana camanꞌañachu.
11 Jatun ñacay nishan lamarta chimpapämunanpämá
lamarcäta quićhaycuśhä.
Sumä Nilo mayuctam chaquïchishä;
Asiria lädup nunatucuynintá pampamanmi muyüchishä;
Egiptop munaynintá camacaycüśhämi;
12 Malcäñatacmi ichá tacyaycachiptí
śhutïćhu puntaman lipäcunꞌa.
Yaꞌa Tayta Diosmari niyá” nil.