Jerusalenta allinpä licaycunanpämi Tayta Dios nin
8
Chaypïta sumä munayniyu Tayta Diosmi caynu niman:
2 “Yaꞌa sumä munayniyu Tayta Dios Sionta ama-pacha niyämi;
quiquilläpä munalmi anchap piñacuywan sïlacú.
3 Chayurá Sionmanmi caśhan cutimuśhä;
Jerusalenćhümi yaćhaśhä.
Cay Jerusalenmá ‘Tayta Diosman chalapacü malca’ nisha canꞌa.
Chaynütacmi sumä munayniyu Tayta Diospa ulꞌunpis ‘Chuya ulꞌu’ nisha canꞌa” nil.
4 Jinaman sumä munayniyu Tayta Diosmá niyan:
“Jerusalenpa läsancunaćhümá chacwaśhcunäpis,
awquishcunäpis täcapäcunꞌalä;
anchap yaśhaña capäculmá garutillancunawanña pulipäcunꞌa.
5 Cällincunaćhüpis walaśh wamlacunamá junta awsapäcunꞌa” nil.
6 Awari,
sumä munayniyu Tayta Diosmi caynu niyan:
“Chaynu cananpä am quïdäcunäpä sasanu captinpis,
ñatac yaꞌapá manam sasachu canꞌa” nil.
7 Jinaman sumä munayniyu Tayta Dios niyanlämi:
“Inti ishpimunan lädu,
inti jiꞌalpunan lädu nasyuncunapïtapis yaꞌa quiquïmá malcäta libraycamuśhä.
8 Jerusalenćhu yaćhapäcunanpämari puśhamuśhä.
Paycunam malcá capäcunꞌa;
yaꞌañatacmi chalapacuna,
tincüllanman licaycü Tayta Diosnin caśhä” nil.
9 Jinaman sumä munayniyu Tayta Diosmi niyan:
“Canan callpanchaculcay Tayta Diospa alawana wasinta śhalcachipäcunayquipä.
Awari,
punta willacücunapis alawana wasip simintunta śhalcachishanpïtalämari chaynu nipäcula.
10 Chay timpucuna nunacunäpis,
uywacunäpis lulapäcuśhanpi manam pägaśhachu capäcula.
Quiquiqui-pula ćhïninacunayquipä yaꞌa ćhulaycüluptïmari pulilpis manchat-manchatllaña pulipäculanqui.
11 Ñatac cananꞌa cay quïdä malcawan manañam unay lulaśhänüñachu lulaycuśhä.
Yaꞌa sumä munayniyu Tayta Diosmari niyá.
12 Aśhwanpa amcuna jawcamá caycälinqui.
Üba lantayquicunapis sumämi wayuycunꞌa.
Ćhaclayquicunapis talpuyniquicunacta allintam ishpiycachinꞌa.
Sïlüpis yacunta jićhaycamunꞌamá.
Caynu allincunactamari cay quïdä malcaman uycuśhä.
13 Masqui juc nasyuncunäpä am Israel läducunaca,
Juda läducunaca mana allinninpä cayalcaptiquipis,
cananꞌa yaꞌami libraycuśhayqui allinninpä licaycuśha capäcunayquipä.
Chayurá ama manchaculcaychu;
callpanchaculcay” nil.
14 Awari,
sumä munayniyu Tayta Diosmi niyan:
“Awquilluyquicuna piñälälichimaptinmari camacaycünäpä nishänülla lulayculá;
manamari manalculächu.
15 Cananñatacmi ichá Juda läducta,
Jerusalen malcacta allinpä licaycunäpä niyá.
Chayurá ama manchaculcaychu.
16 Má,
caycunactam lulaycälinayqui:
Nuna-masiquiwan rasuncällactam limaycälinayqui;
cäraycälinayquicunaćhüpis tincüllanman,
cällanmanmi cäraycälinayqui.
Jawca allin cawsaycätamari ashiycälinayqui.
17 Nuna-masiquip mana allinninta śhunꞌuyquićhu amari uywayalcaychu.
Amatac yanꞌal limalicuycäta cuyayalcaypischu.
Chay lulaycunäta yaꞌa ćhïnicümi.
Yaꞌa Tayta Diosmari niyá” nil.
18 Chaypïta sumä munayniyu Tayta Dios yapañatacmi niyan:
19 “Tawa quillaćhu,
picha quillaćhu,
anćhish quillaćhu,
ćhunca quillaćhu llaquicuypi ayunapäcuśhayquicunaca cananꞌa am Juda läducunäpä cushicuymanñamá muyunꞌa;
sumä cushicuy fistamanñamari licalinꞌa.
Chayurá rasuncätawan jawca cawsaycätam ama-pacha niycälinayqui” nil.
20 Jinaman sumä munayniyu Tayta Diosmi niyan:
“Juc nasyuncunäpïta,
malcacunäpïta achca nunacunalämi cayman śhapämunꞌa.
21 Juc malcacunamari pasanacul-pasanacul:
‘Tayta Diosta mañacü acuchun.
Sumä munayniyu Tayta Diostari ashiycuśhun.
Yaꞌapis lishämi’ ninaculcanꞌa.
22 Jinalmi achca malcacunapi,
alli-cama nasyuncunapi sumä munayniyu Tayta Diosta ashiycälï śhapämunꞌa.
Tayta Dios allinpä licaycälinanpä mañacümari Jerusalenman śhapämunꞌa” nil.
23 Chaynütacmi sumä munayniyu Tayta Diosmi niyan:
“Chay muyuncunäćhümi may nasyunpi,
ima limayta limä calpis,
ćhunca nunacuna Juda lädu nunacta müdanapi chalacuycul nipäcunꞌa:
‘Amwan lilläśhun;
Tayta Dios amcunawan caśhantam uyaliyalcällá’ ” nil.