Zorobabeltam Tayta Dios callpanchaycun
2
Chay watap anćhish quillanćhu ishcay ćhunca jucniyu (21) muyunninćhümi willacü Hageocta Tayta Dios nin:
2 “Salatielpa chulin Juda lädup mandacünin Zorobabelta,
chaynütac Josadacpa chulin puydï sasirdüti Josuetapis,
jinaman lluy malcantinta caynu nimuy:a
3 ‘¿Mayanllayquipis punta alawana wasip sumä cayninta licäca cayalcanquilächun?
Cananꞌa ¿cay wasi imanuymá cayan?
Punta wasïwanb tincuycachishá,
cay wasi manamá imapischu’ nil.c
4 “Chaynu captinpis yaꞌa Tayta Diosmi ní:
‘Am Zorobabel,
callpanchacuyña.
Chaynütac Josadacpa chulin puydï am sasirdüti Josuepis callpanchacuyña.
Am jinantin malcäpis callpanchacul lulapäcuyñari.
Yaꞌa sumä munayniyu Tayta Diosmari amcunawan cayá.
5 Unay Egiptopïta awquilluyquicuna yalapämuptin limalicuśhänüllamá,d
Ispiritú amcunawan cayan.
Chayurá amari manchaculcaychu’ nil.
6 “Sumä munayniyu yaꞌa Tayta Diosmi ní:
Manaläpis unaytam cay pachäta,
janay pachäta,
lamarcätapis chucchüchishä.e
7 Jinantin nasyuncunätapis chucchuchishämá.
Jinaptïmi lluy nasyuncunäpi ima cänincunactapis apapämunꞌa.
Jinaptinmi cay alawana wasí sumä caynïwan juntäśha caycunꞌa.
Sumä munayniyu yaꞌa Tayta Diosmari niyá.
8 “Sumä munayniyu yaꞌa Tayta Diostacmi ní:
Illaypis ürupis yaꞌallapamá.
9 Cay alawana wasip sumä caynin punta wasipïtapis maslämi caycunꞌa.
Cayćhu jawcayaytamá uycuśhayqui.
Sumä munayniyu yaꞌa Tayta Diosmari niyá” nil.
Mana cäsucü malcactam anyapan
10 Mandacü Dariop ishcay wata isun quilla,
ishcay ćhunca tawayu (24) mandacuyninćhümi willacü Hageocta Tayta Dios nin:
11 “Sumä munayniyu yaꞌa Tayta Diosmi ní:
Camachicuynïpïta sasirdüticunäta caynu tapuycamuy:
12 ‘Mayanpis japächäśha aychacta uycunanpä millayninćhu apayaptin,
chay müdananpa manyan tantaman,
micuyman,
bïnuman,
asaytiman ütac ima micuymanpis tupaycüluptin,
¿chay tupaycuśha cäca chuyanchäśhamanñachun licalïlunꞌa?’ ”
nil.
Chaynu tapuycuptinmi sasirdüticunaca:
“Manam” nipäcula.
13 Niptinmi Hageo:
“Mayanpis ayacta yataycuśhanpif anlaman muyüśha cayal,
chay micuycunacta yataycüluptin,
¿chaycuna anlamanchun licalïlunꞌa?”
nin.
Niptinmi sasirdüticunaca:
“Aw,
anlamanmi licalïlunꞌa” nipäcula.
14 Niptinmi Hageo:
“Tayta Diosmi nin:
‘Chaynümari cay malcaca cayan.
Lluy lulaśhancunawan uycapämänanpä apapämuśhancunapis pasaypi anlamanmari muyun.
15 Chayurá Tayta Diospa alawana wasinta manaläpis śhalcachiyta allaycapäcul śhunꞌuyquita puntacta sumäta licacaycäliy.
16 Chaycuna manaläpis pasaptin ¿imanuymá capäculanqui?
Ishcay ćhunca (20) säcucta cusichanayquitá ćhuncallactamari cusichapäculanqui.
Chaynütac üba apchinapïta picha ćhunca (50) wacuy bïnucta julunayquitá ishcay ćhuncallactamari (20) julupäculanqui.
17 Chay talpuśhayquicunacta lupayä waywawan,
asawan,
luntuwan camacaycuyaptïpis manamari yaꞌa Tayta Diosman cuticalcämulanquichu.
18 Canan cay isun quillap ishcay ćhunca tawayu (24) muyunninpïmi Tayta Diospa alawana wasinpa simintunta ćhulayta allaycapäcunqui.
Caypi puntamanꞌa sumätam tantiaculcanqui.
19 Má,
¿pilwaćhu mujuyquicuna cayanchun imatá?
¿Üba,
ïgus,
granadilla,
ulïbus lantayquicunapis sisayalcämunchun imamá?
Chayurá cananpi puntamanꞌa,
yaꞌamari allinpä licaycälishayqui’ ” nil.
Zorobabelmanmi Tayta Dios limalicun
20 Chay quillallaćhümi ishcay ćhunca tawayu (24) muyunćhu Hageocta yapañatac Tayta Dios nin:
21 “Juda lädup puydïnin Zorobabelta niycuy:
‘Sïlütapis allpätapis yaꞌami chucchuchishä.
22 Mandacücunäpa dispächunta camacaycüśhämi;
mandacücunäpa sumä munayninta pampamanmi muyüchishä;
carritancunactapis puśhänintintam camacaycüśhä.
Cawallupis sillädantinmi pampaman muyüchisha canꞌa;
sillädacunaca quiquin-pulamá ispädawan wañuchinaculcanꞌa.
23 Yaꞌa sumä munayniyu Tayta Diosmi ní:
Salatielpa chulin am sirbïní Zorobabeltam chay muyunćhu japächäśhayqui;
chaymi sïllanapä surtijätanug ćhulaycuśhayqui.
Yaꞌa Tayta Diosmari niyá’ ” nil.