Hageo
Willacü Hageo Isquirbishan
Alawana wasicta caśhan śhalcachipäcunanpämi nin
1
Persia nasyunpa mandacünin Dario ishcay wata mandacuyninćhu süta quillap wamä muyunninćhümi willacü Hageoman Tayta Dios limapäla.
Payninpamari Salatielpa chulin Juda lädup puydïnin Zorobabelta,
chaynütac Josadacpa chulin puydï sasirdüti Josuetapis Tayta Dios limapäla.a
2 Sumä munayniyu Tayta Diosmi caynu nin:
“Cay malcam niyalcan:
‘Tayta Diospa alawana wasinta manalämi śhalcachinanchic timpuchu’ ” nil.
3 Chaymi willacünin Hageonpa-cama Tayta Dios nin:
4-5 “Yaꞌa sumä munayniyu Tayta Diosmi ní:
Alawana wasí pampaman muyüchisha cayaptin,
¿sumä-cama wasiquicunaćhülä yaćhanayqui timpuchun cayan imatá?
Imanuy cawsapäcuśhayquitapis sumätari licacaycäliy.
6 Amcuna achcacta talpucuyalcalpis ashllactamá cusichayalcanqui.
Micapäculpis manamá maćhaycälinquichu.
Upyapäculpis jina yacunäśhallamá cayalcanqui.
Müdacuyalcalpis manamá unulipäcunquichu.
Lulapacul gänapaculcäśhayquipis ućhcu cuśhtalćhünümá mana tacyaycunchu.
7 “Yaꞌa sumä munayniyu Tayta Diosmari niyätac:
Má,
imanuy cawsapäcuśhayquitapis sumätari licacaycäliy.
8 Ulꞌucunäman lipäcul ilucunacta apapämuy alawana wasïta śhalcachipäcunayquipä.
Chayćha cushicuywan chayćhu altuman juluycuśha caśhä.
9 “Amcuna achcacta alcayalcalpis ashllactamá cusichayalcanqui.
Wasiquiman pilwaculcäśhayquitapis yaꞌa pücaycüluptïmá mana tacyaycunchu.
¿Imapïtá chaynüta lulaycú?
Alawana wasí pampaman muyüchisha cayaptinpis quiquiquicunap wasillayquiman pinsalayalcaptiquimari chaynüta lulaycú.
Yaꞌa sumä munayniyu Tayta Diosmariniyá.
10 Amcuna-laycumá sïlüpis tamyamuyta manalcülun;
allpäpis manaña wayunñachu.b
11 Cay pachäman,
ulꞌucunäman usyacta yaꞌamari caćhayämú.
Chaymi trïgupis,
üba,
ulïbuspis,
nï ima micuypis wayunñachu.
Uywacunäpis manañam milanñachu;
nunacunäpis yanꞌal-yanꞌalpämi lulapäcun” nil.
12 Chaynu Tayta Dios nishanta willacü Hageo willaycuptinmi Salatielpa chulin Zorobabel,
jinaman Josadacpa chulin puydï sasirdüti Josuepis chaynütac jinantin malcäpis Tayta Diosnin nichimuśhanta manchacuywan ćhasquiculcäla.
13 Chaynu willacünin Hageowan Juda läducta willaycachilmi Tayta Dios nin:
“Amcunawanmi yaꞌa Tayta Dios cayá” nil.
14 Chaynüpam Tayta Dios lichcapacächila Salatielpa chulin Juda lädup puydïnin Zorobabelta,
jinaman Josadacpa chulin puydï sasirdüti Josuetapis,
chaynütac lluy malcantintapis.
Jinaptinmi sumä munayniyu Tayta Diospa alawana wasinta śhalcachiyta allaycapäcula.
15 Chaynüpamari mandacü Dariop ishcay wata,
süta quilla,
ishcay ćhunca tawa (24) muyun mandacuyninćhu allaycapäcula.c