Israelpa mana allin lulayninpïmi nin
7
¡Imanuylä calläśhä!
Cusicha camacäluptin puchücunäta
ashipacücänümá cayällá.
Manañamá jucllay üballactapis talïñachu;
wañupacuśhá ïgusllapis manañamá caycunñachu.
2 Awari,
cay allpäćhu chalapacuna nuna
manañamá talicunñachu.
Cay pachäćhu allincäta lulaycü nuna manañamari canñachu.
Lluypis wañuchinacuyllactañamá ashiyalcan;
quiquin-pulamá trampacunacta ćhulanacuyalcan.a
3 Mana allincäta lulaypá ishpisha-ishpishamá capäcun.
Puydïcunaca imallapïpis pägaycunanpïmá wañupacuyalcan;
fiscunäpis cäraycunanpä uycunantalämá alcayalcan.
Sumä cäniyüca śhunꞌun munaśhanmannu lulaptin
lluypis awnipäcunmá.
4 Aśhta mas allinninpänu licaśhancunäpis
sumä caśhanümá cayalcan.
Allin cawsäpänu licaśhancäpis wicsu-wicsu caśhanümá cayan.
Ñatac cananꞌa mućhuycachinan muyunca śhacayämunñamá.
Willacücunaca willacuśhancuna jananćhüñamá cacuyan.
Chay muyunćhümá muspayninćhünu licalipäcunꞌa.
5 Amari lisinacuśhayqui ima nishantapis awniyaychu;
apanacuśhayquimanpis ama chalapacuyaychu.
Aśhta cusca puñuśhayqui walmiquimanpis
lluytá ama willapacuyaychu.
6 Walaśh chulinmá taytanpa cuntran śhalcapäcun,
wamla chulinñatacmi mamanpa cuntran.
Llumchuycäpis suyranpä cuntranmá śhalcapäcun.
Wasillanćhümari lluypapis ćhïnicünin cayan.b
7 Yaꞌañatacmi ichá Tayta Diosllaman chalapacú.
Salbaycamäní Tayta Diosllactam alcaycú.
Payꞌa uyaliycamanꞌamá.
Israel libraycuśha cananpämi nin
8 Am ćhïnicünïcuna,
mana allinćhu caśhäta licamal ama cushipämaychu.
Masqui cućhpälulpis śhalcuśhämá;
masqui tutapäćhu cayaptïpis
Tayta Diosmá acchimäní.
9 Tayta Diospa cuntran mana allinta lulaśhäpi,
piñacuyninta awantaycuśhämá.
Chay lulaśhäpïta cäraycamal tincünïman
licaycamänancamamá awantaycuśhä.
Pay acchiman julaycamaptinmari
tincüninman allin lulayninta licaycuśhä.
10 Chay ćhïnimänïcunap ñawquinmá
Tayta Dios yanapaycamanꞌa.
Chayta licalmari cärantapis mayman śhatiytapis nï atipapäcunꞌachu.
Tayta Dios lawćhaycamaptinmá:
“¿Mayćhütá tayta diosniqui cayan?”c
nil nipämäla.
Chaymi cananꞌa caminucunäćhu mitu jalutacüśhanu
caśhanta ñawïwan licaycuśhä.
11 Jerusalen malca,
murällayquicunacta caśhan
śhalcachinayqui muyun janayquićhüñamá cacuyan;
culindayquicunapis mas jatunmanmá wiñanꞌa.
12 Chay muyunmi jinantin nasyuncunapi anman śhapämunꞌa:
Asiria lädupi aśhta Egipto läducama.
Awari,
Nilo mayupi aśhta Eufrates mayucamam
jinantin lamarcunäpi,
jinantin ulꞌucunäpïta śhapämunꞌa.
13 Ñatac nunacunap juchanpïta,
mana allin lulaynincunap wayuyninpïmá
jinantin allpaca pampaman muyüchisha canꞌa.
Israelta llaquipaycunanpämi nin
14 Tayta Diosllay,
cay malcayquita,
aclacuśhayquita garutiquiwan michiycullay.
Cay uwishniquicuna quiquillancunamá munticunäćhu,
ulꞌucunäćhu cayalcällan.
Punta timpu capäcuśhannuꞌari Basan,
Galaad läducunaćhu michiycuśha callächun.
15 Egipto lädupi unay julaycamuśhayquićhünuꞌari,
cananpis milagrucunacta licaycälichillay.
16 Sumä-cama lulayniquicunacta licapäculmi
munayniyütucüśha nasyuncunaca cäranta
mayman ćhulaytapis nï atipapäcunꞌachu;
shiminpis caćhucacüśhamá quïdälälinꞌa;
linlinpis uyaliyta manamá atipapäcunꞌachu.
17 Culibraycänu,
śhullwaypa pulïcänümá
allpacunäta lläwapäcunꞌa.
Pacaläśhancunapi chucchuśhtin yalapämulmari
tayta diosninchicman manchacuywan cutiycapäcunꞌa.
18 ¿Am Tayta Diosnuꞌa,
mayanmá juchacta pampachaycunman?
¿Mayanmá cay quïdä malcayquip mana allinninta unꞌaycunman?
Am,
cuyacuyniquićhu chalapacuna calmari
imaypis piñacüśhallachu nï cayanqui.
19 Am,
caśhan llaquipaycälimalꞌari
mana allin lulaynïcunacta pampachaycälillämay.
Juchäcunacta lamarcäpa ćhawpinman wicapalpüllay.
20 Punta awquillú Abrahamman,
Jacobman
limalicuśhayquimannuꞌari
chalapacuna caśhayqui jinalla caycuchun.d