Tayta Diosta ipanchäcunämi mućhuycachisha canꞌa
5
“Lluy sasirdüticuna,
cayta uyalipäcuy.
Israel läducuna,
sumäta tantiaycäliy.
Mandacücäpa aylluncuna,
uyalipäcuy.
Amcuna,
Mizpaćhu Taborćhu taytachacunacta
alawapäcuśhayquiwan trampactanu
maśhtapäcuśhayquipïmá cäraycuśha capäcunqui.
2 Amcuna,
Sitim lädućhümá püsucta ućhcupäculanqui.
Chaynu lulapäcuśhayquipïmá lawćhaycälishayqui.
3 Efrain ayllucta tuquictamá yaꞌa lisí.
Israel läducuna manamari mana lisishachu capäcun.
Efrain ayllu waticacuyllaćhümari cayan.
Israel lädu pasaypi anlatacüśhamari cayan.
4 “Tayta Diosninman cutipämunanpä
anla lulaynincunamá mana caćhaycunchu.
Tayta Diosta lisipäcunanpä mansibacuynincunamá mana caćhaycälinchu.
5 “Israelcunäpa nunatucuyninmá cuntran śhalcunꞌa.
Awari,
Efrain mana allin
lulaynincunamanmari palpapäcunꞌa.
Paycunawan cuscamá Judapis palpapäcunꞌa.
6 Uwishninta,
wäcanta apaculculmá
Tayta Diosta uycü lipäcunꞌa.
Ñatac pay caćhaycüluptinmá manaña talipäcunꞌañachu.
7 Tayta Diostamá ipanchälälin;
jucpactamá ishupacälälin.
Chaymi lluy tücänincunawan cusca juc quillallaćhu
camacaycüśha capäcunꞌa.
8 “Gabaa malcaćhu gïrrapä curnitacta tucapäcuy.
Rama malcaćhu curnitillacta tucapäcuy.
Bet-avena malcaćhu willaculcay.
Benjamin ayllucuna,
licaćhaculcay;
ampa janayquićhüñamari cacuyan.
9 Lawćhaycuná muyuncäćhu pampaman muyuycachishamá Efrain canꞌa.
Caynu pasanancunäta Israelpa aylluncunamanmari willaycú.
10 “Judapa puydïnincuna
ćhaclacunap culindanta pasaycücänümá cayalcan.b
Ñatac yaꞌami paycunaman
yacu jillpüśhactanu piñacuynïta jillpuycüśhä.
11 Efrain ayllucunaca taytachacunäman
muyucalcälishanpïmá ñacachisha
jalutacüśha cayalcan.
12 Chaymi millwacta puyu camacaycücänu
Efrain ayllucta camacaycüśhä;
ismuchiypa camacaycücänümari Juda ayllucta camacaycüśhä.
13 “Efrainmi ishyaśhanta licacuycunꞌa.
Judami llillïtayninta licacuycunꞌa.
Jinalmi Asiria nasyunta Efrain licunꞌa.c
Chay sumä mandacüca yanapänanpämá mañacunꞌa.
Ñatac payꞌa manamá allinyaycachinꞌachu;
llillïtaynintapis manamá jampiycunꞌachu.
14 Yaꞌañatacmi ichá Efraintawan
Judäta liyunnu camacaycüśhä.
Paycunacta quiquïmi ticshiy-pawalcul licuśhä.
Chaläluptí manamari mayanpis quitamäní canꞌachu.
15 Juchancunacta tantiaculcänancama
yaꞌacta ashiycälimänancamamari
yaćhanäcäman yaꞌa cuticuśhä.
Llaquicuypa intüśha cayal-lämi yaꞌacta ashipämanꞌa” nil.