“Dan ayllup tücäninmi nurti lädu manyaćhu canꞌa.

Culindanmi Mediterraneo Lamarpi allaycul Hetlon lädup pasal,

aśhta Hamat,

Hazar-enancama canꞌa.

Cay cayan Damasco malcap culindanćhu,

nurti lädupañatac Hamat lädup culindanćhümá.

Dan ayllupämari canꞌa,

nurti lädućhu inti yalamunan culindanpïta allaycul inti yaycunan lädućhu cä culindancama.

2 “Aser ayllupäñatacmi canꞌa,

Dan ayllup sur lädu matäninman.

Chay canꞌa inti yalamunan lädu culindanpi allaycul aśhta inti jiꞌalpunan lädu tücäninpa culindancamam.

3 “Neftali ayllupäñatacmi canꞌa,

Aser ayllup sur lädu matäninman.

Chay canꞌa inti yalamunan lädu culindanpi allaycul aśhta inti jiꞌalpunan lädu tücäninpa culindancamam.

4 “Manases ayllupäñatacmi canꞌa,

Neftali ayllup sur lädu matäninman.

Chay canꞌa inti yalamunan lädu culindanpi allaycul aśhta inti jiꞌalpunan lädu tücäninpa culindancamam.

5 “Efrain ayllupäñatacmi canꞌa,

Manases ayllup sur lädu matäninman.

Chay canꞌa inti yalamunan lädu culindanpi allaycul aśhta inti jiꞌalpunan lädu tücäninpa culindancamam.

6 “Ruben ayllupäñatacmi canꞌa,

Efrain ayllup sur lädu matäninman.

Chay canꞌa inti yalamunan lädu culindanpi allaycul aśhta inti jiꞌalpunan lädu tücäninpa culindancamam.

7 “Juda ayllupäñatacmi canꞌa,

Ruben ayllup sur lädu matäninman.

Chay canꞌa inti yalamunan lädu culindanpi allaycul aśhta inti jiꞌalpunan lädu tücäninpa culindancamam.

8 “Chaynütacmi sumä allinninpä japächapäcunqui Juda ayllup sur lädu matäninman.

Chaypa culindan inti yalamunan lädupi aśhta inti jiꞌalpunan läducamam canꞌa.

Anchunmanmi ćhunca ishcayniyu ćhawpi (12.5) quilümitru canꞌa;

largunmanñatacmi juc ayllucunäpa tücaśhanmannu canꞌa.

Chay partip ćhawpinćhümari alawana wasica caycunꞌa.

9 “Awari,

chayćhu yaꞌa Tayta Diospa japächaśhayquica largunman ćhunca ishcayniyu ćhawpi (12.5) quilümitrumari canꞌa;

anchunmanñatacmi ćhunca (10) quilümitru canꞌa.

10 Chay tücachipämäśhan lulinćhümi sasirdüticunäpäpis tücaycachisha canꞌa.

Nurti,

sur lädu largunman-camam ćhunca ishcayniyu ćhawpi (12.5) quilümitru canꞌa.

Inti ishpimunan,

inti jiꞌalpunan läduman-camañatacmi picha quilümitru canꞌa.

Chaypa ćhawpinćhümá Tayta Diospa alawana wasin śhalcachisha canꞌa.

11 Chay parti canꞌa sasirdütipa japächaśha cä Sadocpa milaynincunapämi.

Paycunallamari alawana wasićhu sumä sirbipämäla israelcunaca,

Levita-masincuna ipanchalälimaptinpis.

12 Chay sumä allinninpä japächaśhayqui partićhu sasirdüticunäpä laquishayquim mas chuyannin canꞌa.

Chay canꞌa levitap tücaśhanpa lädullanćhümari.

13 “Chay sasirdüticunäpa lädullanćhümi levitacunäpä tücänin canꞌa.

Largunmanmi ćhunca ishcayniyu ćhawpi (12.5) quilümitru canꞌa;

anchunmanñatacmi picha quilümitru canꞌa.

14 Chay sumä allin tücaśhanca Tayta Diosllapä japächäśhamá canꞌa.

Chaymi mana lanticunmanchu,

cambianmanchu,

nï jucmanpis pasälunmanchu.

15 “Chay alawana wasip lädunćhu quïdä allpämi lluy nunacunäpä canꞌa.

Chay allpa manañamá japächäśha chuyañachu canꞌa.

Largunmanmi ćhunca ishcayniyu ćhawpi (12.5) quilümitru canꞌa;

anchunmanñatacmi ishcay quilümitru ćhawpi canꞌa.

Chayćhümi lluy nunacunaca yaćhapäcunꞌa;

uywancunapäpis jäcünincuna canꞌam.

Chayurá ćhawpićhümi malcaca caycunꞌa.

16 Chay malca tawan lädunpa-camam ishcay walanga ishcay paćhac picha ćhunca (2,250) mitruyü-cama canꞌa.

17 Malcap jäcüninñatacmi paćhac ishcay ćhunca pichayu (125) mitru tawan lädunpa-cama canꞌa.

18 Talpupäcunanpäñatacmi chay malcap lädunćhu quïdäca canꞌa,

Tayta Diosllapa japächäśha cäcäpa ñawpäninćhu.

Largunmanmi inti yalamunan lädupi picha quilümitru canꞌa;

inti jiꞌalpunan lädumanpis picha quilümitrutacmi canꞌa.

Chay micuy ishpishancunaca malcaćhu luläcunaca micapäcunanpämi canꞌa.

19 Malcaćhu lulä nunacunämi talpupäcunman,

masqui Israelpi mayannin ayllupi capäculpis.

20 Chayurá sumä allin japächaśha allpawan malcapä partishan allpaca,

tawan lädunpa-camam ćhunca ishcayniyu ćhawpi (12.5) quilümitru-cama canꞌa.

21-22 “Mandäcäpäñatacmi tücänin canꞌa,

Juda ayllup sur lädunćhu,

Benjamin ayllup nurti lädu quïdäcäćhu.

Chay sumä allinca cananpä,

malca śhalcachisha cananpä japächaycuśhancäpa wic lädun,

cay lädun quïdäcäćhümari canꞌa.

Anchunmanmi ćhunca ishcayniyu ćhawpi (12.5) quilümitru canꞌa.

Largunmanñatacmi inti yalamunan lädu culindancama ćhanꞌa.

Inti yaycunan lädumanpis chaynu anchuyüllam canꞌa;

chaypis Mediterraneo Lamarpa patancamam ćhanꞌa.

Chay allpap ćhawpinćhümari cayanꞌa:

alawana wasipa cäca,

levitacunap yaćhapäcunanpä cäca,

malcapä canancäpis.

23 “Canan,

chay juc ayllucunäpä tücänincuna caynümi canꞌa:

“Benjamin ayllupäñatacmi canꞌa,

inti yalamunan lädu culindanpi allaycul aśhta inti jiꞌalpunan lädu tücäninpa culindancama.

24 “Simeon ayllupäñatacmi canꞌa,

Benjamin ayllup sur lädu matäninman.

Chay canꞌa inti yalamunan lädu culindanpi allaycul aśhta inti jiꞌalpunan lädu tücäninpa culindancamam.

25 “Isacar ayllupäñatacmi canꞌa,

Simeon ayllup sur lädu matäninman.

Chay canꞌa inti yalamunan lädu culindanpi allaycul aśhta inti jiꞌalpunan lädu tücäninpa culindancamam.

26 “Zabulon ayllupäñatacmi canꞌa,

Isacar ayllup sur lädu matäninman.

Chay canꞌa inti yalamunan lädu culindanpi allaycul aśhta inti jiꞌalpunan lädu tücäninpa culindancamam.

27 “Gad ayllupäñatacmi canꞌa,

Zabulon ayllup sur lädu matäninman.

Chay canꞌa inti yalamunan lädu culindanpi allaycul aśhta inti jiꞌalpunan lädu tücäninpa culindancamam.

28 Sur lädup culindanñatacmi Tamar malcapïta allaycul Meriba-Cadesćhu yacu caśhancäcama,

chaypïta Egipto mayunninpam pasan Mediterraneo Lamarcäcama.

29 “Chaynüpamari Israelćhu ayllucunaca tücäniquita tücachinaculcanqui.

Yaꞌa Tayta Diosmari niyá” nil.

30-31 Chay malcap murällancunaćhu puncuncuna caynümi canꞌa:

Nurti lädućhu,

ishcay walanga ishcay paćhac picha ćhunca (2,250) mitruyu largunćhümari quimsa puncuncuna canꞌa.

Chay puncucuna śhutiyu-camam canꞌa:

Ruben,

Juda,

Levi nisha.

32 Inti yalamunan lädućhu,

ishcay walanga ishcay paćhac picha ćhunca (2,250) mitruyu largunćhümari quimsa puncuncuna canꞌa.

Chay puncucuna śhutiyu-camam canꞌa:

Jose,

Benjamin,

Dan nisha.

33 Sur lädućhu,

ishcay walanga ishcay paćhac picha ćhunca (2,250) mitruyu largunćhümari quimsa puncuncuna canꞌa.

Chay puncucuna śhutiyu-camam canꞌa:

Simeon,

Isacar,

Zabulon nisha.

34 Inti jiꞌalpunan lädućhu,

ishcay walanga ishcay paćhac picha ćhunca (2,250) mitruyu largunćhümari quimsa puncuncuna canꞌa.

Chay puncucuna śhutiyu-camam canꞌa:

Gad,

Aser,

Neftali nisha.

35 Chayurá chay malcap jinantin muyülïnin isun walanga (9,000) mitrum canꞌa.

Chay muyunpïtam malcap śhutin:

“Cayćhümi Tayta Dios cayan” nisha canꞌa.