Yuläyäśha tullucunapïmi willacun
37
Tayta Diosmi chalaycamal Ispiritunwan puśhacaman.
Jinalculmi tullucuna junta cä pampaman ćhulaycäman.
2 Chaycunap pulichimaptinmi jinantin pampäćhu achca-achca tullucunalla maśhtalayäta licälú.
Jinaman pasaypi yuläyäśha-camam capäcuñäpis.
3 Chayćhümi Tayta Dios niman:
“Wañucülla nuna,
¿cay yuläyäśha tullucunaca caśhan cawsapämunmanchun?”
nil.
Nimaptinmi:
“Tayta Diosllay,
amllamá yaćhanqui” nilá.
4 Niptïmi niman:
“Cay tullucunäman willacamuy cay nil:
‘Yuläyäśha tullucuna,
Tayta Diospa willacuyninta uyalipäcuy.
5 Am tullucunätam Tayta Dios niyäśhunqui.
Amcunaman cawsay jäcayta uycäliptïmá caśhan cawsapämunqui.
6 Ancuyquicunactapis ćhulaycuśhämá.
Aychayquitapis juntaycachimuśhämi;
aychayquip jananćhu utantapis wiñaycachimuśhämá.
Jinalculmi caśhan cawsapämunayquipä jäcaycälishayqui.
Chaynüpam yaꞌa Tayta Dios caśhäta yaćhapäcunqui’ ” nil.
7 Chay nimäśhallantanümi willacuyta allayculá.
Chaynu willacuyäśhäćhümi suynayta,
śhaclalacyayta allacuycuśhanta uyalïlú.
Chayćhümi tullucunaca cäninman-cama laꞌanacuyta allacaycäliña.
8 Tuquicta licaycunäpämi tullucunaca ancuyüña,
aychan juntäśhaña,
aychanpa utanpis licalïshaña cayalcäña.
Ñatac paycunaćhu cawsayca manalämi cañächu.
9 Chaypïtam Tayta Dios niman:
“Wañucülla nuna,
cawsay jäcaycäman willaycamuy cay nil:
‘Cawsachicü jäcay,
Tayta Diosmi niyäśhunqui:
Tawan lädupi śhapämul cay ayacunäta jäcaycuy cawsapämunanpä’ ” nil.
10 Nimaptinmi yaꞌa willaculá.
Chayćhu jäcayca paycunaman yaycüluptinmi ayacunaca cawsälälimul śhalcäläliña.
Achca-achca pilyäcunanümari caculcälläña.
11 Chaypïtam Tayta Dios niman:
“Wañucülla nuna,
cay tullucunaca jinantin Israel malcamá cayalcan.
Paycunamari nipäcun:
‘Tullunchiccuna chaquïlunñamá;
manañamá imaman chalapacunanchicpis canñachu.
Pasaypi camacaycüśhañamá cayanchic’ nil.
12 Chaymi cay nishäta willacamunqui:
‘Tayta Diosmi niyäśhunqui:
Nunalläcuna,
pampaläśhayquicunacta quićhayculmi chaypi śhalcachipämuśhayqui.
Chaynu śhalcalcachilmi Israel malcayquiman cutichipämuśhayqui.
13 Nunalläcuna,
chay pampaläśhayquicunacta quićhaycul chaypi juluptïmá yaćhapäcunqui yaꞌa Tayta Dios caśhäta.
14 Amcunaman jäcay cawsaycäta ćhulaycamuptïmá cawsapämunqui.
Chaynu cawsalcachimulmi quiquiquip allpayquicunaćhu tacyaycachishayqui.
Chaymi yaꞌa Tayta Dios nishätanu lulaycuśhäta yaćhapäcunqui.
Yaꞌa Tayta Diosmari niyá’ ” nil.
Juda läduwan Israel lädu caśhan jucllachanaculcänanpämi nin
15 Chaypïta Tayta Diosmi niman:
16 “Wañucülla nuna,
juc caśhpicta chalaycul chayman isquirbiycuy ‘Cay cayan Juda läduwan śhalcünin ayllucunam’ nil niyäta.
Jinaman juc caśhpicta chalalcul chaymanpis isquirbiycuy ‘Cay cayan Josepa pudirnin cä Efrainwan śhalcünin ayllucunam’ nil niyäta.
17 Jinalcul chay ishcaynin caśhpicta mataycachil maquiquićhu jucllachäluy.
18 Jinaptiquim malca-masiquicuna nipäcuśhunqui:
‘Chay lulaśhayquiwan ¿imactam niyalcämanqui?’
nil.
19 Nishuptiquim ninqui:
‘Tayta Diosmi nin:
Josepa caśhpin Efrainpa maquinćhu cäcätawan waquin Israel ayllu jucllachacüśha cäcunätam maquïćhu chalaycuśhä.
Chaynüpa jucllachayculmi ishcayninpis maquïćhüña capäcunꞌa’ nil.
20 Chay isquirbishayqui caśhpicta malca-masiquicuna licapäcunanpämi aptilanqui.
21 Chayćhümi ninqui:
‘Tayta Diosmi nishunqui:
May nasyunman israelcunaca lipäcuśhanpïtapis yaꞌami julaycamuśhä.
Jinantin lädupi julaycamulmá quiquinpa allpanman cutiycachimuśhä.
22 Chay allpanćhu,
Israelpa ulꞌuncunaćhümá jucllay nasyunllactaña lulaycuśhä.
Juc mandacüniyüllañamá caycunꞌapis.
Manañamá ishcay nasyunñachu canꞌa,
nïtac ishcay mandacüniyüñachu canꞌa.
23 Manañamá taytachancunawan,
anla lulaynincunawan,
millachicuy lulaynincunawanpis anlataculcanꞌañachu.
Chay imaymanawan juchaculcäśhanpi yaꞌamari libraycul chuyanchaycuśhä.
Jinaycuptïmi paycuna malcá capäcunꞌa;
yaꞌañatacmi Tayta Diosnin caycuśhä.
24 “ ‘Awari,
paycunap mandacünin sirbïní Davidmi canꞌa.
Payllañamá lluypa michïnin caycunꞌa.
Camachicuynïmannüñamá cawsaycapäcunꞌapis;
yaćhachicuynïmannüñamá lulaycälinꞌapis.
25 Paycuna sirbïní Jacobman uycuśhá nasyunćhüñamá yaćhapäcunꞌa.
Chay awquilluncuna yaćhapäcuśhanćhümari chulincuna,
lluy milaynincunapis yaćhapäcunꞌa.
Sirbïní Davidñatacmi wiña-wiñaypä mandacünin caycunꞌa.
26 Paycuna allin cawsapäcunanpämari wiña-wiñaypä limalicuśhä.
Chayćhu tacyaycachilmá achcaman milaycachishä.
Paycunap ćhawpinmanmá alawana wasïtapis wiña-wiñaypä ćhulaycuśhä.
27 Paycunap ćhawpinćhümari yaꞌa caycuśhä.
Yaꞌami Tayta Diosnin caśhä.
Paycunañatacmi malcá capäcunꞌa.
28 Chaynümi alawana wasí paycunap ćhawpinćhu wiñaypä caycunꞌa.
Jinaptinmi lluy nasyuncunaca yaćhapäcunꞌa yaꞌa Tayta Dios Israel malcacta japächaycüca caśhäta’ ” nil.