Israelpa michïnincunap cuntranmi nin
34
Chaypïta Tayta Diosmi niman:
2 “Wañucülla nuna,
yaꞌa Tayta Dios nishäta,
Israelpa michïnincunap cuntran willacamuy:
‘¡Ay,
imanuylä capäcunqui Israelpa michïnincuna,
quiquillayquita michicuyalcalꞌa!
¿¡Michïcunaca manachun uwishnincunacta michipäcunan imamá!?
3 Amcuna lichinta upyayalcanquimá;
millwanwanpis müdacuyalcanquimá;
wirannin uwishcunactalämi micuyalcanquipis.
Ñatac manamá michiycälinquichu.
4 Umpucunäta manamá yanapaycälinquichu;
ishyäcunäta manamá jampiycälinquichu;
ćhaquin paquïshacunäta manamá wataycälinquichu;
pintïshacunäta manamá cutiycälichimunquichu;
chincäśhacunätapis manamá ashiycälimunquichu.
Aśhwanpamá mana llaquipaycul maꞌayalcanqui.
5 Chaymi uwishnïcuna mana michïniyu chiꞌisha cayalcan.
Ulꞌucunäćhu ima juyu uywa micünanpïpis mana licaycuśhamari cayalcan.
6 Uwishnïcuna ulꞌucunäćhu,
ulꞌunyalcücunäćhümari pantäśha puliyalcan,
jinantin allpäman chiꞌisha.
Manamá pipis ashiycü canchu nï tapuyllapis tapuycälinpischu.
7 “ ‘Chayurá michïcuna Tayta Dios nishanta uyaliycäliy.
8 Yaꞌa Tayta Diosmi rasunpa cawsaśhänu ní:
Michïnin mana captinmá uwishnïcunacta suwapäcun,
munti uywacunapis micapäcun.
Uwish michïcunätá imapis manamá uculcanchu,
ashïpis manamá yalupäcunchu.
Aśhwanpa quiquillancunamá licaculcan.
9 Chayurá am michïcunaca,
cay nishäta sumäta uyalipäcuy:
10 Yaꞌa Tayta Diosmi uwish michïcunäpa cuntran cayá.
Uwishnïcunapïmi niycälimänayqui canꞌa.
Manañamá uwishnïcunacta michipäcunquiñachu;
manañamari patallayquicunapä cayanꞌañachu.
Uwishnïcunacta manaña micapäcunayquipämi maquiquipi libraycuśhä.
11 “ ‘Yaꞌa Tayta Diosmi ní:
Yaꞌa quiquïmi uwishnïcunacta ashï lishä.
Yaꞌa quiquïmi ñawilläćhu caycachishä.
12 Chiꞌisha cä uwishnincunacta michïcänümá yaꞌa michiycuśhä.
Yana-yana pucutay muyunćhu jinantin läduman chiꞌisha cayaptinpis yaꞌamá libraycamuśhä.
13 Chay nasyuncunäpi julaycamulmi,
malcacunäpi juntuycamulmi quiquincunap malcanman puśhaycuśhä.
Israelpa ulꞌunnincunaćhu,
wayunnincunaćhu,
jinantin allin particunaćhümá michiycuśhä.
14 Allinnin pastucunäćhümari michiycuśhä;
Israelpa altunnin ulꞌuncunaćhümá micapäcunꞌa.
Chayćhu allinnin canćhaćhülämá puñupäcunꞌa;
Israelpa ulꞌunćhu cä allinnin pastucunaćhülämá micapäcunꞌapis.
15 Yaꞌa quiquïmari uwishnïcunacta michiycuśhä,
jamaycachishäpis.
Yaꞌa Tayta Diosmari niyá.
16 Chincäśha uwishcunätam ashimuśhä;
pantäśhacunätam cutichimuśhä;
ishyäcunätam jampiycuśhä;
umpucunätam yanapaycuśhä.
Ñatac wirannin,
allinnin uwishcunätá tincüninmanmi sumä cäraycuśhä.
17 “ ‘Am uwishnïcunactañatacmi yaꞌa Tayta Dios niycälic:
Uwishcunäta,
capishcunätam japächaycul cäraycuśhä.
18 ¿Allinchun allin pastucunäta micucuyculpis quïdänincunacta jalutaculcäśhayquica imamá?
¿Allinchun chuya yacucta upyacaycälilpis ćhaquiquicunawan lluy putcachipäcuśhayquica imatá?
19 ¿Chay jalutacuśhayqui pastucunätachun uwishnïcunacta micachipäcunqui imatá?
¿Chay putcachishayqui yacucunätachun upyachipäcunqui imamá?
20 “ ‘Chaymi yaꞌa Tayta Dios niyá:
Yaꞌa quiquïmi wirannin,
saclayäśha uwishcunätapis cäraycuśhä.
21 Am wiracunämi mana callpayu uwishcunäta umruyquicunawan,
waśhayquicunawan tanꞌalpälälilanqui.a
Jinaman wälayquicunawan wälapäculanqui chiꞌichinayquicama,
alapacunayquicamamá.
22 Chaynu manaña mayanpis jinayänanpäñamá uwishnïcunacta yaꞌa salbaycuśhä.
Lluy uwishta-camamá cäraycuśhä.
23 Uwishnïcunacta michiycunanpämi sirbïní Davidllacta ćhulaycuśhä.
Payllañamari uwishnïcunacta michiycunꞌa.
24 Yaꞌamá Tayta Diosnin caycuśhä;
sirbïní Davidñatacmi mandacüca caycunꞌa.
Yaꞌa Tayta Diosmari niyá.
25 “ ‘Jawca cawsapäcunanpä uwishnïcunamanmi limalicuśhä.
Juyu munti uywacunäta jinantin nasyunpi chincächiptïmá chunyäcäćhu uwishnïcuna mana manchacullalña caycälinꞌa;
munticunäćhüpis jawcallañam puñupäcunꞌa.
26 Paycuna ulꞌüpa muyülïninćhu allinpä licaycuśhamá caycälinꞌa.
Timpullanćhu tamyactapis tamyaycachimuptïmari allin caycälinꞌa.
27 Lantacunaca wayupäcunꞌamá;
ćhaclacunäćhu micuycuna ishpipäcunꞌamá.
Chay ćhaclanćhümá jawcalla cawsaycälinꞌa.
Yügu ćhänalächishanta yaꞌamá paquïshä.
Chaynu uywaśhan nunacunap maquinpïta libraycuptïmari yaćhapäcunꞌa Tayta Dios yaꞌa caśhäta.
28 Manañamá juc nasyuncuna waycapäcunꞌañachu,
nïtac munti uywacunapis micapäcunꞌañachu.
Paycuna jawcallañamá cawsapäcunꞌa;
manañamá pipis manchachinꞌañachu.
29 Ćhaclancuna wayuśhanpïtamá sumä lisisha-lisisha caculcanꞌa.
Jinaman nasyunninćhu micuypi mayanpis manañamá wañunꞌachu,
nïtac juc nasyuncunäpis pinꞌayman ćhulapäcunꞌañachu.
30 Chaynüpamá Tayta Diosnin yaꞌa caśhäta,
paycunañatac Israel malcá caśhanta yaćhapäcunꞌa.
Yaꞌa Tayta Diosmari niyá.
31 Amcuna uwishnïcunamá capäcunqui;
michicuśhá uwishnïcunamari capäcunqui.
Yaꞌañatacmi amcunap Tayta Diosniqui cayá.
Yaꞌa Tayta Diosmi niyá’ ” nil.