Egiptopäwan śhalcünin malcacunäpa cuntranmi willacun
“Apalcaćhapäcuy:
‘Chay muyunca,
¡ay,
imanuylä cacunꞌa!’
nil.
3 Muyunca jiꞌacaycayämunñamá.
Tayta Diospa muyunnin cayllaćhüñamá cacuyan.
Chay muyunca yana pucutay juntäśha muyunnümá cayan;
nasyuncunäta camacaycünan muyunmá.
4 Egiptomanmá ispäda śhamunꞌa;
Etiopia lädućhümi manchacuylla muyucunꞌa.
Egipto lädu cućhpäluptinmá cänincunacta apaculcanꞌa.
Malcap simintuntapis pampamanmá muyülächinꞌa.
5 Chayćhümi ispädawan camacaycüśha canꞌa:
Etiopia,
Fut,
Lud,
jinantin Arabia,
Libia,
chaynütac limalinaculcäśhan malcacunäpis.
6 “Tayta Diosmari nin:
Egipto nasyunman śhalcü malcacunaca camacaycüśhamá lluy capäcunꞌa.
Jinaptinmi Egiptop sumä nunatucuynin mana cäman muyunꞌa.
Jinantin Migdol lädupi aśhta Sevenecamamá ispädawan camacaycüśha capäcunꞌa.
Yaꞌa Tayta Diosmari niyá.
7 “Jinantin allpäćhu Egipto nasyunmi pasaypi pulumäśhannin canꞌa.
Malcayquicuna pasaypi camacaycüśhamá pulumanꞌa.
8 Egiptoman ninacta lataycächiptïmá,
jinaman lluy śhalcünin malcacuna camacaycüśha capäcuptinmá
yaćhapäcunꞌa Tayta Dios yaꞌa caśhäta.
9 “Chay muyuncunaćhümi willacünïcuna barcucunawan Etiopia läduman yalapäcunꞌa manchachicuy willacuyta niycälinanpä.
Chay jawca chalapacüśha Etiopia malcam Egiptocta camacaycunan muyuncäćhu sumä llaquicuyćhu capäcunꞌa.
Chay muyunca janallanćhüñamari cacuyan.
10 “Yaꞌa Tayta Diosmi ní:
Egiptoćhu lluy-lluy cäcunätamá Babiloniap mandacünin Nabucodonosorwan camacaycüśhä.
11 Nabucodonosormi juyunnin sumä-cama cachacuncunawan Egiptocta camacaycünanpä śhapämunꞌa.
Paycunam Egipto nasyunta ispädawan camacaycälälinꞌa.
Jinaptinmi ayallaña jinantinćhu timpucunꞌa.
12 Yaꞌami Nilo mayucta chaquïchishä.
Pasaypi juyu nunacunap maquinmanmi cay nasyunta ćhulaycüśhä.
Juc caśhtacunawanmari lluy ima cänintinta mana caśhanman muyüchishä.
Yaꞌa Tayta Diosmari niyá.
13 “Egiptop malcancunapïtam yaꞌa Tayta Dios niyá:
“Menfis malcap taytachancunacta,
diosnincunacta yaꞌami camacaycüśhä.
Manañamari Egiptoćhu mandacücunapis canꞌañachu.
Chayćhu cäcunaca manchacuywan ñitïshallañamá capäcunꞌa.
14 Patros malcacta pampamanmá muyüchishä.
Zoan malcactañatacmi ninawan lataycächishä.
Tebas malcactañatacmi cäraycüśhä.
15 “Egiptop sumä sigüru murällannu cä
Sin malcaćhümi piñacuynïta pasachicüśhä.
Tebas malcaćhu achca-achca nunacunätapis camacaycüśhämá.
16 Egiptoman ninactamá walaycächishä.
Chay Sin nishan malcacta sumä-sumä nanaywanmá inticacächishä.
Tebas malca camacaycüśhamá canꞌa.
Menfis malcap llaquicuynin mana camacaycümá cacunꞌa.
17 Aven,
Pibeset malcacunaćhu cä müsucunaca gïrraćhümá wañupäcunꞌa.
Chayćhu cä walmicunäñatacmi prïsu puśhaśha capäcunꞌa.
18 Egipto juccunaman yügucta ćhulaśhanta mana caśhanman muyüchiptïmá
Tafnes malcaćhu muyuncäpis tutapälunꞌa.
Chay munayninta,
nunatucuyninta pampaman muyüchiptïmá
yana pucutaylla paycunacta ñitïlunꞌa.
Muyülïnin malcachacunäćhu cäcunäpis prïsu apaśhamá capäcunꞌa.
19 Chaynu Egiptocta cäraycuptïmá
yaćhapäcunꞌa Tayta Dios yaꞌa caśhäta” nil.
20 Chaypïta ćhunca jucniyu watap,
allaycuynin quillap,
anćhish muyunninćhümi Tayta Dios niman:
21 “Licay wañucülla nuna,
Egiptop mandacünin Faraonpa maquintamá paquïlú.
Manamá pipis wataycunchu nï imallawanpis jampiycunchu.
Ispädacta caśhan chalananpä manamá mayan wataycüninpis canchu.
22 Chaymi yaꞌa Tayta Dios niyá:
Egiptop mandacünin Faraoncäpa cuntranmi yaꞌa cayá.
Ispädacta manaña chalananpämá allin cä maquintapis,
paquïsha maquintapis paquilpüśhä.
23 Jinantin nasyuncunämanmi Egipto läducunäta chiꞌichishä.
Jinantin malcacunämanmi alapacüśhä.
24 Babiloniap mandacüninpa maquintañatacmi callpayüman muyuycachil ispädäta aptiycachishä.
Chaywan Faraoncäpa maquinta paquïchiptïmá wañuyta ñacayänu ćhïnicüninpa puntanćhu apalcaćhanꞌa.
25 Babiloniap mandacüninpa maquintamá tacyaycachishä.
Faraoncäpa maquinñatacmi ichá mana callpayüman licalinꞌa.
Babiloniap mandacüninpa maquinman ispädäta ćhulaycuptïmi payꞌa Egiptop cuntran śhalcunꞌa.
Chayćhümi yaꞌa Tayta Dios caśhäta yaćhapäcunꞌa.
26 Jinantin nasyuncunamanmi Egipto läducunäta chiꞌichishä.
Jinantin malcacunämanmi alapacüśhä.
Chaymi Tayta Dios yaꞌa caśhäta yaćhapäcunꞌa” nil.