Tiro malcapämi aya taquicta taquin
27
Chaypi Tayta Diosmi niman:
2 “Am wañucülla nuna,
cay aya taquicta Tiro malcapä taquiycuy.
3 Lamar patanćhu cayä malcaca,
chay calu lamar patanćhu cä lluy malcacunäwan imacunactapis lantinacuyäcäpä taquiycuy.
Yaꞌa Tayta Dios nishäta niycuy:
“Ay,
Tiro malca,
tuquishnin barcuman tinculcachilmá ‘Tuquish cäcäpïpis sumänin tuquishninlämá cacuyá’ nil nunatuculanqui.
4 Awari,
culindayqui lamarcäpa ćhawpincamalämi ćhäla.
Luläcunämá mas tuquishllactaña allichalpälälishulanqui.
5 Wätayquicunactapis Senir ulꞌućhu cä
ciprescunawanmi lulala.
Mastila iluyquipis
Libano ulꞌućhu cä cedrocunawanlämá lulaśha cala.
6 Pulichinayquipä pälayquita
Basan lädućhu cä encina lantapïmá lulala.
Atacuyquita Quitim lamarpa patanćhu cä
ciprescunawan lulayculmi
marfilcunawanlä adurnäśhulanqui.
7 Waywa apananpä cä lataśhniquipis
Egipto lädu fïnunnin lïnupi burdäśhamá cacula.
Chay caycula bandirayquinümá.
Täpä tulduyquiñatacmi lamar patanćhu cä
Elisa lädupi asul,
murädu lataśhpi cacula.
8 Pälawan puśhäniquicuna Sidon,
Arvad malcacunapïmá capäcula.
Tiro,
amcunaćhu allin yaćhayniyücunämá
barcu manijäniquicunapis capäcula.
9 Gebal malcapi allin yaćhayniyücunämi
barcuyquicunap tablancunacta llutäninpis capäcula.
Jinantin lamarcäćhu barcuwan pulïcunämá
imactapis amwan lantinaculcäla.
10 “Aśhta Persia,
Lud,
Fut malcacunäpïlämari
cachacuyquicunaćhu capäculapis.
Paycunamá atajachicuncunactawan
cascuncunacta walcapäcul allin cayniquita camalachipäcula.
11 “Murällayquip muyülïninta Arvad malcapi cä cachacuyquicunam täpapäcula.
Türriquicunaćhüñatacmi Gamad läducunaca täpayalcäla.
Jinantin muyülïninćhu atajachicuncunacta walcalayalcächishanwanmá sumä capäcuśhayquita camalachipäcuśhulanqui.
12 “Cäniqui sumä-sumä captinmá Tarsis lädulä lantïniqui cacula.
Payñatacmi illayta,
jïrructa,
estañucta,
plümucta upäcuśhulanqui.
13 Chaynütacmi Javan,b
Tubal,
Mesec läducunapïpis lantïniqui śhapämula,
uyway nunacunacta,
brunsipi cä imacunactapis apacälälisha-cama.
14 Bet-togarma läducunäñatacmi sillacunapä cawallucunacta,
gïrrapä cä cawallucunacta,
mulacunacta upäcuśhulanqui.
15 Rodaspic śhamücunäpis lantipäcuśhulanquimá.
Jinaman lamar patanćhu cä malcachacunäwanpis lantinaculcälanquimá.
Paycunañatacmi marfil wäsucta,
jinaman ebano ilucunacta upäcuśhulanqui.
16 “Imaymana cäniquicunapämá Edom läducunäpis esmeralda aläjacunacta,
murädu lataśhcunacta,
burdäśha lataśhcunacta,
allinnin lïnupi lataśhcunacta,
coral,
alli-cama aläja lumicunactapis apapämula.
17 Judawan Israelpis lantipäcuśhulanquimá.
Paycunam Minit lädućhu cä trïgucunacta,
panag nishan micuycunacta,
urunwaypa mishquincunacta,
asayticunacta,
balsamucunacta upäcuśhulanqui.
18 “Imaymana lulaśhayquicunacta,
cäniquicunacta lantipäcuśhunayquipämi Damasco nunacunäpis Helbon lädu bïnucunacta,
yulä millwacunacta apapämula.
19 Chaynütacmi imapis cäniquicunapä Dan ayllucunäwan pulicü Javan ayllucunäpis apapämula jïrru tacäśhacunacta,
mïrracta,
calamo tuqui aśhnäcunactapis.
20 “Dedan läducunäñatacmi muntüracunacta lulanapä cäcunacta apapämula.
21 Arabia läducunäwan Cedar lädup mandacünincunapis lantipäcuśhulanquim.
Paycunañatacmi malta uwishcunacta,
ulu uwishcunacta,
puꞌuśha ulu capishcunacta apapämula.
22 Chaynütacmi Saba,
Raama lädu nigusyanticunäpis lantïniqui śhapämula.
Paycunañatacmi imaymana aläja lumicunacta,
ürucunacta,
tuqui allinnin mishqui aśhnäcunactapis apapämula.
23 “Chaynütacmi Haran,
Cane,
Eden läducunäpis,
Saba,
Asiria,
Quilmad lädu nigusyanticunäpis lantipäcuśhulanqui.
24 Paycunañatacmi allinnin lataśhcunacta,
murädu müdanacunacta,
burdäśha lataśhcunacta,
imaymana lichcä alfumbracunacta,
chaynütac cawchüśha watucunactapis apapämula.
25 “Tarsis lädu barcucunaca atinacuyllam nigusyuyquicunacta apayalcan.
“Awari,
alli-alli cäniyüman licalilculmá lamar ćhawpinpa liyanqui.
26 Ñatac cananꞌa barcuyquita puśhäcunämi lamarpa
ćhawpincunamanlä puśhäshunqui.
Chay lamarpa ćhawpinćhu cayaptiquimá
inti yalamunan lädupi śhamü waywaca
pasaypi amllüśhunqui.
27 Juc muyun jiꞌacalpulmi lamarcäpa
śhunꞌunćhu licalipäcunqui;
lluy cäniquicuna,
nigusyuyquicuna,
ima lanticuśhayquipis,
barcuyquita puśhäcunäpis,
yanapänincunapis,
allichäniquicunapis,
cachacuyquicunapis,
chayćhu lluy
lïcunämá jiꞌacalpälinꞌa.
28 Barcucta puśhäcunaca apalcaćhapäcuptinmá
lamarpa patanćhu cäcunäpis chucchupäcunꞌa.
29 Lluy puśhäcunämi caćhaycälil ayiculcanꞌa;
chay yanapänincunapis
pampämanñamá ćhäpäcunꞌa.
30 Ampïmari waꞌapäcunꞌa,
apalcaćhapäcunꞌa,
umanmanpis pulbucunacta jillpuculcanꞌa,
ućhpacunaćhüpis cućhpaycaćhapäcunꞌa.
31 Ampi llaquiculmá ächancunactapis
siplay-siplayta lutuculcanꞌa,
shicacü müdanacunawanmi ćhulaculcanꞌa,
śhunꞌunpis nananancamamá llaqui-llaquicta waꞌapäcunꞌa.
32 Chay llaqui waꞌacuyninćhümá amcunapi nipäcunꞌa:
‘¿Lamarcäpa ćhawpinćhu camacaycüśha
Tirowan mayanmá tincuycachisha canman?’
nil.
33 Lluy nigusyuyquicunacta barcuwan ćhächipäcuptiqui,
achca-achca malcacunam maćhaycüśha capäcula.
Achca-achca cäniquicunawan,
nigusyuyquicunawanmá
jinantin allpäćhu mandacücunäta rïcuyächilanqui.
34 Cananñatacmi ichá lamarcäpa ćhawpinman jiꞌacalpunqui.
Yacup śhunꞌunmanmá palpülunqui.
Amwan cuscamá lluy nigusyuyquicunapis jiꞌacalpälin.
Lluy-lluy lïcunämá jiꞌacalpälin.
35 Jinantin lamar patanćhu lluy yaćhäcunämi
amta licälälil äśhalayllaman camälälin.
Manchacuypïmi mandacünincuna chucchupäcun;
uyaypam cäranćhüpis manchacuycälla cayan.
36 Juc nasyunpi cä nigusyanticunäpis
licapayllamanmá camapäcun.
Pasaypi manchachicuymanmi licalïlunqui.
Pasaypipäñamá chincacunqui” nil.