Übap mana bälï caśhpinmanmi Israelta tincuchin
15
Tayta Diosmi niman:
2 “Wañucülla nuna,
¿üba lantap caśhpinchun mas allin juc lantacunap iluncunapïta imamá?
¿Üba lantap pallayninchun mas allin juc lantacunap pallayninpïta imatá?
3 ¿Chaypa caśhpin imallacta lulanapäpis bälinchun imamá?
¿Imacta walcacunapä ishtacallacta lulanapäpis allinchun imatá?
4 Aśhwanpa übap caśhpinꞌa cañanallapämá allin.
Lluy janäninta ninaca lupäluptin śhunꞌunñatacmi carbunyäśhaña quïdälun.
Chaynuꞌa ¿imallapäpis bälinmanñachun imamá?
5 Allin intirullanlä cayalpis mana bäliyalchun,
¿ninaca lluy camacaycüluptin bälïlunmanlä ampá?
¿Imallapätá bälïlunman?
6 “Chaymi yaꞌa Tayta Dios ní:
Übap caśhpinta juc ilucunäpi japächaycul lupananpä ninäman jitaycuśhäcänümá,
Jerusalenćhu yaćhäcunäta camacaycünäpä lulaycuśhä.
7 Paycunap cuntranmá śhalcuśhä.
Ninap lupayninpi ayïluptinpis juc ninamá camacaycülunꞌa.
Paycunap cuntran śhalcuptïmari yaꞌa Tayta Dios caśhäta amcuna yaćhapäcunqui.
8 Ipanchamäśhanpïtamá cay malcacta pasaypi chunyäman muyüchishä.
Yaꞌa Tayta Diosmari niyá” nil.