3
Chaypïtam niman:
“Wañucülla nuna,
cay uycuśhaccäta micuy;
cay pitwilayä libructa miculculꞌari Israel läducunäman willacü liy” nil.
2 Chaymi shimïta quićhaycuptí pitwilayä libructa micächiman.
3 Jinalculmi niman:
“Wañucülla nuna,
maćhaycunayquicama cay uycuśhá pitwilä libructa micuy” nil.a
Nimaptin micüluptïmi urunwaypa mishquinnülä mishqui-mishqui caculläña.
4 Chayćhümi yapañatac niman:
“Am wañucülla nuna,
Israel läducunäman lilcul cay willacuynïta willacamuy.
5 Manamá caćhayac juc limayta limä malcamanchu nï mana uyalinaśh limayniyu malcamanchu.
Aśhwanpa Israel lädumanmi caćhayac.
6 Manatacmá sasa limayta limä malcamanchu nï juc lichcä limayta limämanchu,
nïtac limaśhanta mana tantiayta atipana limayniyümanchu caćhayac.
Masqui chaynu nasyunman caćhayaptïpis paycuna uyalipäcuśhunquimanlämi.
7 Israel läducunäñatacmi ichá yaꞌacta uyaliyta mana munayninwan amcunacta mana uyalïtuculcäśhunquichu.
Jinantin Israel lädu pasaypi tullu uma,
lumi śhunꞌum capäcun.
8 Chaymi paycunactanu lumi śhunꞌu,
sumä tacyaycü canayquipä amta muyuycachic.
9 Sumänin lumipïtapis mas anäninmannülämari muyuycachic;
sumänin wancapïtapis masninmanlämari muyuycachic.
Chayurá masqui pasaypi cullu linli malca captinpis ama jucmanyaychu,
nana-nanay ñawinwan licapäcuśhuptiquipis ama manchacuychu” nil.
10 Nilculmi niman:
“Am wañucülla nuna,
lluy nishäta sumäta uyaliycamal śhunꞌuyquiman ćhulaycuy.
11 Malca-masiquicuna prïsu puśhaśha cäcunäman canan lil,
uyalishunayqui mana uyalishunayqui captinpis willaycamuy:
‘Sumä munayniyu Tayta Dios caynümi nin’ ” nil.
12 Chayćhu sumä-sumä waywa śhalcächimaptinmi pachacuyuynu ipäćhu limämüta uyalïlú:
“¡Tayta Dios caśhanćhu sumä caynin altuman juluycuśha cachun!”
niyta.
13 Chaynütac uyalïlú chay cawsä uywacunäpa laplancuna tupanacuptin suynaśhanta,
jinaman chay lädunćhu cä ruydacunäpa sumä-sumä suynaynintapis.
14 Chayćhümi sumä-sumä waywa apacaman.
Chaynu Tayta Dios sumä chalalayal puśhayämaptinmi yaꞌañatac llaquisha,
piñäśha liyá.
15 Chaynüpam Quebar mayup patan Tel-abib nishanman ćhälú.
Chayćhümi prïsu puśhaśha cä Israel läducunaca cayalcäña.
Yaꞌañatacmi imanaytapis nï imaniytapis atipal anćhish muyun chayćhu muspaynïćhünu quïdälú.
Willacuptin ütac mana willacuptin imapis pasananpïmi nin
16 Chay anćhish muyun pasäluptinmi Tayta Dios caynu niman:
17 “Am wañucülla nunactamá Israel lädup licäninpä ćhulaycuc.b
Imactapis niycuptí pachamari juclla paycunacta willaycunqui.
18 Sïchuśh juchayu nunacta:
‘Wañunayquim cayan’ niptí,
amñatac chay mana allin lulayninta mana tantiachiptiqui,
jinaman wanaculcul cawsananpäpis mana willaycuptiqui,
chay nuna juchanpïmi wañunꞌa.
Ñatac chay nuna wañushanpïta anmi niycunayqui canꞌa.
19 Sïchuśh juchasapa nunäta willaycuptiqui mana wanacuptinꞌa,
nï mana allin cawsaynintapis caćhaycuptinꞌa chay juchanpïmá wañunꞌa.
Amñatacmi ichá ima niycunayquipis manaña canꞌachu.
20 Canan má,
juc allin nunaca,
allin lulaycäta caćhaycul mana allinta lulaptinꞌa sasachacuytam ćhulaycú wañuypa patanćhu caśhanta tantiacunanpä.
Mana anyapaycuptiquiꞌa chay nuna juchanpïmari wañunꞌa.
Lluy allin lulaśhancunäpis manañamá yalpalcuśhachu canꞌa.
Chay wañuśhanpïtañatacmi ichá am niycunayqui canꞌa.
21 Ñatac allin nunäta mana juchacunanpä anyapaycuptiqui,
chay nuna uyalicul mana juchacuptinꞌa,
limapäśhayquita uyalicuśhanpamá cawsaycunꞌa.
Ampis salbacunquimá” nil.
22 Chayćhümi Tayta Dios munayninwan yataycul niman:
“Śhalcuculcul pampäman liy.
Chayćhümi amta limapäśhayqui” nil.
23 Nimaptinmi śhalcuculcul pampäman lilá.
Chayćhümi Tayta Diospa sumä cayninta licälú Quebar mayup patanćhu licaśhänu.
Licälul-pachamari pampäman juclla lawacacälú.
24 Tayta Diospa Ispiritunñatacmi pudiracaycamal śhalcächiman.
Jinalculmi:
“Wasiquiman yaycuycul puncucta wićhacalcamul chayćhu caycuy.
25 Am wañucülla nunätamari watuwan ćhänapäcuśhunqui,
mana yalunayquipä nï malca-masiquiwanpis juntunacunayquipä.
26 Yaꞌamari alluyquitapis paladarniquiman laꞌanacächishä.
Chayćha masqui cullu linli malca cayaptinpis limayta manaña atipal anyapaytapis nï atipanquiñachu.
27 Ñatac anman limapalmi ichá alluyquita caćhaycachishä.
Chayćha ninqui:
‘Tayta Diosmi caynu nin’ nil.
Uyalicuyta munäcá uyalicuchun;
mana uyalicuyta munäcá ama uyalicuchunchu.
Chay malca pasaypi mana uyalicü cullu linli-camamari capäcun.