Filisteo läducunaca imanuypis cananpämi willacun
47
Faraonca Gaza malcacta manaläpis camacaycuyaptinlämi Filisteo läducunäpia willacü Jeremiasta Tayta Dios nin:
2 “Yaꞌa Tayta Diosmi ní:
Nurti lädupïmi nunacunaca mayunu śhacayalcämun;
maśhtaypa-maśhtal sumä-sumä yacunümi śhacayalcämun.
Jinantin allpäman,
malcacunäman,
chayćhu lluy cäcunämanmari mallülälimun.
Chaymi malcaca apalcaćhapäcunꞌa;
jinantin malcaćhu cäcunaca awćhupäcunꞌa.
3 Cawallucunap ‘pacatac-pacatac’ nil
cürrishancunacta,
gïrrapä cä carritacuna
taclalacyaylla śhamuśhancunacta,
ruydancunap suynaśhancunacta uyalïlälilmá,
taytacunaca chulincunactapis caćhaycälil,
imanaytapis mana atipal juclla paćhcalcul ayiculcan.
4 “Filisteo läducunäta camacaycünan muyunca ćhämunñamá.
Tiro,
Sidon malcacunäta yanapänin quïdäcunätapis camacaycünan muyunca ćhämunñamari.
Filisteo läducunäta,
lamarpa ćhawpinćhu cä
Creta läductapis Tayta Dios camacaycülunꞌamá.
5 Gaza malcaca llaquicuypïtamá ächanta lutucälälin.
Ascalon malca llaquicuypïtamá mana limapacul quïdälälin.
Lamar patanćhu quïdäcuna,b
¿imaycamañamá llaquicuypïta aychayquita cuchucuyalcanqui?
6 “Chayćhümari Filisteo läducuna nipäcunꞌa:
‘Ay,
Tayta Diospa caćhamuśhan ispäda,
¿imayñamá jamaycunqui?
Ćhulalänayquiman caśhanña cutiycuy.
Jawcayayñari;
jamayñari’ nil.
7 “Chaynu niyalcaptinpis ¿imanuypamá ispädaca jamaycunman?
Yaꞌa Tayta Dios caćhayaptiꞌa Ascalon,
lamar patanćhu cä
malcacunaca camacaycüśhamari capäcunꞌa” nil.