Artish willacü Hananiasmi willacun
28
Gabaon malcaćhu Azurpa chulin Hananiasmi willacü cala.
Paymi Juda lädućhu tawa wata,
picha quillaña Sedequiasa mandacü cayaptin Tayta Diospa alawana wasinćhu sasirdüticunäpa ñawpäninćhu,
lluy cäcunäpa puntanćhu yaꞌa Jeremiasta niman:
2 “Sumä munayniyu Israelpa Tayta Diosninmi nin:
‘Babiloniap mandacüninpa yügun chalaläśhuśhayquita paquïshämi.
3 Alawana wasïćhu lluy cänincunacta Babiloniap mandacünin Nabucodonosor apaśhancunactapis ishcay watapïta caymanmi cutichimuśhä.
4 Caymantacmi cutichimuśhä Joacimpa chulin Juda lädup mandacünin Jeconiastapis,
jinaman Babiloniaman puśhaśha cä lluy Juda läducunätapis.
Babiloniap mandacüninpa yügun chalaläśhuśhayquita yaꞌami paquïshä.
Yaꞌa Tayta Diosmari niyá’ ” nil.
5 Chaynu willacü Hananias niptinmi sasirdüticunäpa,
jinantin malcap ñawquin Tayta Diospa alawana wasinćhu Jeremias nin:
6 “¡Chaynu cachun!
Chaynüta Tayta Dios lulaycuchunꞌari.
Chay alawana wasip cänincunacta,
lluy puśhaśhancunätapis Babiloniapi cutichimuchun Tayta Dios willacachimuśhuśhayquinü.
7 Ñatac amtawan jinantin malcäta nishätari sumäta uyalimay:
8 Ampis yaꞌapis manalä captinchic punta willacücunaca willaculcäla gïrracuna,
micuy wanaycuna,
imaymana ishyaycuna nasyuncunäćhu,
sumä-cama mandacücunäćhu canantamari.
9 Ñatac willacüca jawca caycuy cananpä willacuśhannu lulacacuptinꞌa,
Tayta Diospa caćhamuśhan rasun willacüninpä ćhasquiycuśhamá canꞌa” nil.b
10 Niptinmi willacü Jeremiasćhu cä yügucta willacü Hananias jululcul paquiypa pawälun.
11 Jinalculmi chayćhu cä jinantin malcäpa puntanćhu nin:
“Tayta Diosmi nin:
‘Babiloniap mandacünin Nabucodonosor yügunta lluy nasyuncunäman ćhulaśhanta cananpïta ishcay watacta caynümari paquïshä’ ” nil.
Niptinmi willacü Jeremias licula.
12 Chaynu Jeremiasćhu cä yügucta willacü Hananias paquïshanpi mana ancha unaytam Jeremiasta Tayta Dios nin:
13 “Hananiasman lilcul yaꞌa Tayta Dios caynu nishäta nimuy:
‘Cullullapi yüguctam am paquïlunqui.
Yaꞌañatacmi jïrrupïta yüguctalä ćhulaycuśhä.
14 Israelpa sumä munayniyu Tayta Diosninmi ní:
Cay nasyuncunäman jïrrupïta yüguctam ćhuläśhä Babiloniap mandacünin Nabucodonosorta sirbipäcunanpä.
Paypa maquinmanñam lluy munti uywacunätapis ćhulaycuśhä’ ” nil.
15 Niptinmi willacü Jeremias nin:
“Willacü Hananias sumäta uyalimay.
Masqui Tayta Dios mana caćhayäśhuptiquipis,
cay malcacta artiquicunamanmi chalapacachilanqui.
16 Chaymi Tayta Dios nin:
‘Malcäta cuntrá śhalcachishayquipïmá cay allpäpïta chincächishayqui;
chay watallam supayapanquipis’ ” nil.
17 Chay nishannüllam chay watalla,
anćhish quillaćhu artish willacü Hananias wañucula.c