Paquïsha wacuymanmi tincuchin
19
Tayta Diosmi niman:
“Wacuy luläcäman,
wacuy lantï lïluy.
Jinalcul malcap waquin yaśhancunacta,
waquin puydï sasirdüticunacta puśhaculculmi linqui.
2 Inti palpunan lädu puncućhu cä Hinoma pampaman lilculmi willaśhäcunacta chayćhu willaycunqui:
3 ‘Juda lädup mandänincuna,
Jerusalenćhu yaćhäcuna Tayta Dios nishuśhayquita uyalipäcuy.
Israelpa sumä munayniyu Tayta Diosninmi niyan:
Cay sityumanmi sumä-sumä ñacayta ćhächimuśhä.
Chayta uyalïcunaca muspayninćhünülämari licalipäcunꞌa.
4 Amcuna,
unꞌaycamalmá cay sityucta jalutacälälinqui.
Mana lisishayqui taytachacunamanmá amcuna,
awquilluyquicuna,
chaynütac Juda lädup mandacünincunapis insinsiucunacta cañaycuyalcanqui.
Mana juchayu nunacunap yawarnintamá cay sityućhu jićhayalcanqui.
5 Chay taytacha Baalpab uycuna patacta lulalculmi chuliquicunacta wañulcachil chayćhu uycapäculanqui.
Chaycunacta lulapäcunayquipä manamá imaypis nilacchu,
limalcuyllapis limalculächu nï pinsayllapis pinsalculächu.
6 Chaymi śhamü timpućhu cay sityu manaña Tofet,
nï Hinom nishañachu canꞌa.
Sinuꞌa Wañuchinacuna Pampa nishañamá canꞌa.
7 “ ‘Cay sityućhu Juda läducunaca,
Jerusalenćhu yaćhäcunaca limanaculcäśhanta mana caśhanmanmá ćhuläśhä.
Ćhïnicünincuna ispädawan camacaycünanpämi ćhulaycuśhä;
wañuchiyta munäcunäpä maquinmanmi ćhulaycuśhä.
Ayancunactañatacmi sïlućhu cä wisculcunäman,
allpäćhu cä munti uywacunäman alaycüśhä.
8 Cay malcactamá pampaman muyüchishä;
lluypapis asipäcunan malcamanmá licalïchishä.
Chayninpa lluy pasäcunäpis licapayllamanmi camapäcunꞌa;
camacaycüśha caśhanpïmá lluypis asipäculcanꞌa.
9 Ćhïnicünincuna camacaycünanpä muyülïninćhu lluy ćhulanacüśha cacuyaptinmi chulincunactaña micapäcunꞌa,
quiquin-pulacunaña micanaculcanꞌa’ nil.c
10 “Chaynu nilculmi liwshïniqui nunacunap ñawquin chay wacuycäta uchuy-uchuylla paquïlunqui.
11 Jinalculmi ninqui:
Sumä munayniyu Tayta Diosmi niyäśhunqui:
‘Cutuśhpi cä wacuyta amshücänümi cay nunacunätawan jinantin malcacta camacaycüśhä;
allichayta mana atipänañamá quïdanꞌa.
Pampapäcunanpä manaña mayćhüpis captinmari Tofetmanña pampapäcunꞌa.
12 Chaynümari cay malcawan,
jinaman cay malcaćhu lluy yaćhäcunäwanpis lulaycuśhä.
Tofetwan lulaśhänümá cay malca quïdanꞌa.
Yaꞌa Tayta Diosmari niyá.
13 Jerusalenćhu cä wasicuna,
Juda lädu mandacücunäpa wasincunapis Tofetnüñamari anla quïdälälinꞌa.
Chay wasicunap altuśhnincunaćhümari uyllurcunäpä insinsiucunacta cañaycapäcula;
taytachacunamanpis jićhaywan uycunacunactam uycapäcula’ ” nil.
14 Chaynu Tayta Dios caćhaśhan Tofetćhu willacuśhanpi Jeremias cutimulmi alawana wasip patyunćhu śhaycucuycul nunacunäta nin:
15 “Israelpa sumä munayniyu Tayta Diosninmi nin:
‘Cay malca,
jinaman muyülïninćhu cä malcacunaca śhunꞌunta lumiyalcachil limapäśhäta mana uyalicalcämaptinmari mućhuchinäpä nishämannu lluy mana allincunäta caćhamuśhä’ ” nil.