Wacuy lulämanmi tincuchin
18
Chaypïta yaꞌa Jeremiastam Tayta Dios niman:
2 “Wacuy luläcäpa wasinman liy.
Chayćhümi imam willanayquita niycuśhayqui” nil.
3 Chaymi wacuy luläcäpa wasinman lil lulanancäćhu wacuy lulayäta talïlú.
4 Chay wacuy lulaśhancäñatacmi mana allin yalüña.
Chaymi munaśhanmannu yalunanpä muśhüpïta caśhan lulayäña.
5 Chayćhümi Tayta Dios niman:
6 “Israel malca,
¿amcunawan manachun cay wacuy luläcänu lulälüman imamá?
Cay wacuy luläcäpa maquinćhu ñiꞌicänümi yaꞌapa maquïćhu am Israel malca cayanqui.a
7 Munaśhá üramá mayan nasyun ütac mandacü juluśha,
chincachisha,
camacaycüśha cananpäpis niycüman.
8 Ñatac chay anyapäśhá nasyunca mana allin lulayninpi wanaculcul yaꞌaman cuticalcämuptinꞌa mućhuycachiná cayaptinpis manalcuśhäñamá.
9 Munaśhá üratacmi niycüman mayan nasyun ütac mandacü śhalcachisha,
tacyachisha cananpäpis.
10 Ñatac chay nasyun ütac mandacüca mana cäsucamal ñawquïćhu-cama mana allinta lulayaptinꞌa,
yanapänäpä caśhantapis manañamá yanapäśhächu.
11 “Cananꞌari Juda läducunäta,
Jerusalenćhu yaćhäcunätapis nimuy:
‘Yaꞌa Tayta Diosmi amcunacta lawćhaycunacpäña cacuyá.
Chayurá chay mana allin lulayniquicunapi wanaculcal cawsayniquicunacta,
lulayniquicunacta allichaculcayñari’ nil.
12 Niptiquim paycuna nipäcuśhunqui:
‘Shimipis usuy yanꞌalñam niyalcämanqui.
Yaꞌacuna tantiapäcuśhämannümi cawsaculcäśhä.
Lumi śhunꞌücuna munaśhantam lulaculcäśhä’ ” nil.
13 Chaymi Tayta Dios nin:
“Umricta manalä lisï wamlanu cä Israel
lulaśhancá mana allin millachicuymari.
Má,
juc nasyuncunätari tapuycäliy:
¿Cay malca mana allin lulaśhantanuꞌa may nasyunllapis lulayculachun imatá?
14 ¿Imayllapis Libanup ulꞌuncuna
mana lasuyub quïdälunmanchun imatá?
¿Imayllapis calu-calupi jiꞌalpamü sumä alalä-alalä
yacucunäpis chaquïlunmanchun imamá?
15 Malcäñatacmi ichá unꞌaycamal
yanꞌal cä taytachacunaman
insinsiucunacta cañaycuyalcan.
Punta allin pulishan caminuncunapïta
pantayculmá yanꞌalnincunapña puliyalcan;
mana pulina caminucunapñamá puliyalcan.
16 Chaynu capäcuśhanwanmá malcanta
pampaman muyülächin;
lluypa asipäculcänanmá cacunꞌa.
Chayninpa pasäcunaca licapayllaman camäśha
umallantamá aywiculcanꞌa.
17 Inti yalamunan lädupi waywa pücäcänümi
ćhïnicünincunap puntanćhu chiꞌichishä.
Ñacay muyunninćhu ipanchäśhämá;
manañamá licachicuśhächu” nil.
Jeremiaspa cuntranmi limanaculcan
18 Niptinmi nunacunaca quiquin-pula ninacücuyalcan:
“Śhapämuy,
Jeremiaspa cuntran limanacunanchicpä.
Pay mana captinpis puśhaycamäninchic sasirdüticuna canꞌalämá;
limapämäninchic yaćhayniyücuna canꞌalämá;
willamäninchic willacücunapis canꞌalämari.
Jeremiaspa ima limaśhanwanpis tumpäśhun;
ima nishantapis ama cäsuśhunchu” nil.
Jeremiasmi Tayta Diosta mañacun
19 Tayta Diosllay,
licaycallämayꞌari;
ćhïnicünïcuna tumpapämäśhanta uyaliycullayꞌari.
20 ¿Allincäta lulaycuyaptïchun mana allincäwan
cutiycayächimanman imatá?
Mana allinman palpunäpäñatacmi ichá trampacta ćhuläläliman.
¿Manachun amta mañaculac
paycunacta allinta lulaycunayquipä,
mana mućhuchinayquipä imamá?
21 Chayurá chulincunacta micuypi wañüchiy;
ispädawan camacaycüluy.
Walmincunapis japanyäśha mana
wawiyü-cama quïdapäcuchun.
Wayapancunapis ishyaywan wañupäcuchun;
müsuncunapis gïrraćhu ispädawan camacaycüśha capäcuchun.
22 Paycunaman waycacücunacta caćhäluptiqui
wasincunaćhu apalcaćhaycuna uyalisha cachun.
Chalapämänanpämari ućhcucunacta ućhcülälin;
pulishäcunamanmari trampacunacta ćhulälälin.
23 Am Tayta Diosllá tuquictamá
yaćhanqui wañuchipämänanpä limanaculcäśhanta.
Mana allin lulayninta ama pampachaycuychu;
juchanta amari chincaycachiychu.
Ñawpäniquiman palpapämuchun;
piñacuyniquićhu paycunacta camacaycüluy.