Mana casaracunanpämi Jeremiasta nin
16
Chaypïta Tayta Diosmi niman:
2 “Cay malcaćhu ama casaracuychu nï walaśh wamla chuliquipis cachunchu.
3 Cay malcaćhu näsï chulicunacta,
taytan mamancunacta ima pasanancunactapis yaꞌa Tayta Diosmari niycú.
4 Nana-nanay ishyaycunawanmá wañupäcunꞌa.
Paycunapi manam mayanpis waꞌapäcunꞌachu nï pampaycälinꞌapischu.
Ismaycunänümi pampäćhu maśhtalapäcunꞌa.
Paycunacta micuy wanaywan ispädamari camacaycülunꞌa.
Ayacunäñatacmi sïlüćhu cä wisculcunap,
allpäćhu cä munti uywacunap micunanña capäcunꞌa” nil.
5 Chaynütacmi Tayta Dios niman:
“Chay malcacta manañamá cuyäñachu nï llaquipäñachu nï jawca caynïtapis uycüñachu.
Chayurá chay wañüśhacuna caśhanman amaña yaycuyñachu;
chay wañüpi amaña llaquicuyñachu nï waꞌayñapischu.
6 “Cay nasyunćhu jatućhäpis uchuchäcunallapis lluy-lluymá wañupäcunꞌa.
Paycunapi manañamá mayanpis waꞌapäcunꞌachu nï pampapäcunꞌachu,
nïtac llaquicuypi custumrinmannu aychantapis cuchuculcanꞌañachu nï ächantapis lutuculcanꞌañapischu.
7 Manatacmá cunsuylayninwan micuytapis uycälinꞌachu.
Masqui taytan-maman wañüśha cayaptinpis manamá imallacta upyanallanpäpis uycälinꞌañachu.
8 Amatacmi yaycunquichu cumbidu caśhan wasiman paycunawan micunayquipä ütac upyanayquipäpis.
9 Israelpa sumä munayniyu Tayta Diosninmi ní:
Cay malcacunäćhu cushicuycunacta,
asicuycunacta yaꞌami camacaycüśhä.
Casaracü walaśh wamlap fistancunactapis chincächishämá.a
Chaynu pasaśhancunacta amcunamá ñawiquiwan licapäcunqui.
10 “Chaycunacta cay malcaman willaptiqui tapupäcuśhunquim:
‘¿Imapïmá caynu jatun mućhuchicuyta Tayta Dios yaꞌanchicman caćhamunꞌa?
¿Ima mana allintamá lulälunchic?
¿Imactamá Tayta Diosninchicpa cuntran lulayanchic?’
nil.
11 Nishuptiqui yaꞌa nishätam ninqui:
‘Awquilluyquicunam,
yaꞌa Tayta Diosta caćhaycamal juc taytachacunaman muyucalcälila;
chaycunaman unꞌulacuyculmi sirbipäcula.
Yaꞌactañatacmi ichá unꞌaycul camachishäcunactapis mana cäsupämälachu.
12 Amcunap lulayniquicuná awiluyquicunapi piyurlämi cayalcanpis.
Anla śhunꞌuyquip munaśhallanta-cama lulapäculmi yaꞌacta mana cäsupamanquichu.
13 Chaymi cay allpapïta alapacüśhayqui;
amcunanactapis,
awquilluyquicunactapis mana lisipäcuśhayqui allpamanmari wicapälälishayqui.
Chayćhümi tutay muyun juc taytachacunacta sirbipäcunqui.
Manañamari llaquipaycuśhayquichu’ nil.
14 “Śhayämunmi timpu:
‘Israelcunäta Egiptopi julamü Tayta Diosta śhaycaycachilmi limalicú’ nil manaña limaliculcänanpä.
15 Aśhwanpa limaliculꞌa limaliculcanꞌa cay nilmi:
‘Nurti lädupi chiꞌisha cä malcacunäpi israelcunäta julaycamü Tayta Diosta śhaycaycachilmi limalicú’ nil.b
Yaꞌa quiquïmari awquilluncunaman uycuśhá allpaman cutiycachimuśhä.
16 “Yaꞌa Tayta Diosmari cuntrayquicunacta caćhamuśhä.
Chay caćhamuśhäcunam challwa chalänüpis challwapäcuśhunqui;
uywa chaläcänüpis ulꞌucunäpi,
tacsha ulꞌuchacunäpi,
chaꞌacunap ućhcuncunapïpis julapämuśhunquimá.c
17 Rasunpa,
lluy lulaśhayquicunactapis licayämá;
imaymana mana allin lulayniquicunapis manamá pacaycuśha canmanchu.
Lluy imapis ñawilläćhümari cayan.
18 Puntactá chay mana allin lulaśhayquipïta,
juchacuśhayquipïtamari ishcay cuti mastalä mućhuycachishayqui.
Wañüśhanu cä taytachacunawanmari uycuśhá allpacta millachicuyman muyülächinqui;
anla taytachacunawanmari tücachishá allpacta juntälälichinqui” nil.
Jeremiasmi Tayta Diosta mañacun
19 Tayta Diosllay,
anmi callpanchaycamäní,
pacaycamäní canqui.
Llaquicuycunaćhu anmi pacaycamäní canqui.
Cay allpap manyancunapïta nasyuncuna
śhapämulmi nipäcuśhunqui:
“Awquillücuna yanꞌal imapäpis mana bälï,
mana munayniyu taytachacunallactamá ćhasquipäcula” nil.
20 ¿Nunaca dioscunacta lulälunmanchun imatá?
Chay lulaśhancuna manamá rasunpa dioschu.
21 Tayta Diosmi nin:
“Chayurá sumä munaynïta,
pudirnïtam lisiycachishä.
Chaynüpam mayan yaꞌa Tayta Dios caśhätapis
lisipäcunꞌa,
yaćhapäcunꞌa” nil.