“Yacunäśha cäcuna yacucta upyä śhapämuy.^a

Mana illayniyücuna,

micapäcunayquipä

trïgucta dinbaldilla apapäcuy.

Bïnuctawan lichicta mana pägallalña apapäcuy.

2 ¿Imapïmá mana micuna cäcunallaćhu

illayniquita usuchinqui?

¿Imapïmá lulapacuśhayquita mana bälïcunallaćhu camacälunqui?

Tuquicta uyalicamalꞌa allin micuycunactamá micunqui;

mishqui micuycunaćhümá śhunꞌuyquipis cushicunꞌa.

3 “Yaꞌaman aśhuycamul sumäta uyalipämay;

uyaliculcalꞌa cawsapäcunquimari.

Amcunamanmi wiña-wiñaypä limalicuśhä;

mandacü Davidta cuyaśhä-laycumá

payman limalicuśhäcunacta lulaycuśhä.^b

4 Payta yaꞌami ćhulayculá malcacunäćhu tistïgú cananpä,

nasyuncunäpä yaćhachïnin,

puydïnin cananpäpis.

5 Yaꞌa Tayta Diosniqui,

Israelpa

Chuya Tayta Diosnin altuman juluycuśhuptiquimá

mana lisishayqui nasyuncunäta ayaycunqui;

mana lisishüniqui malcacunaca anmanmá śhapämunꞌa” nil.

6 Talina caśhancama Tayta Diosta ashipäcuy;

manalä calućhu caśhancama ayaculcay.

7 Juchasapa nunacunaca mana allin lulayninta caćhaycuchun;

juyu nunacunaca mana allin pinsayninta caćhaycuchun.

Tayta Diosninchicmanña cuticalcämuchun;

payꞌa llaquipayninmannümi imaypis

pampachaycunanpä listu cayan.^c

8 Tayta Diosmi nin:

“Tantiaśhäcunaca manamá ampa tantiapäcuśhayquinüchu;

caminú manamari amcunap caminuyquinüchu

9 Maynümi sïluca allpäpïta mas altu-altu.

Chaynümi tantiaynïcunapis amcunapä tantiayniquicunapi mas altu-altu;

caminüpis amcunap caminuyquipi mas altu-altumari.

10 “Tamyawan laśhtaca sïlüpïta jiꞌalpamul

manañamá caśhan cutilcunchu.

Aśhwanpa allpäta puśhtalcachilmi

mujucunacta wiñachimun talpüca

mujunanpä,

micanäśhaca micunanpä.^d

11 Chaynümá shimïpi yalamü limayca caycunꞌa:

Manamá jinanllan cutimunꞌachu

sinuꞌa munaśhätamá lulaycunꞌa;

imam nishätamá sumä allin cumpliycunꞌa.

12 Amcuna cushisham yalapäcunqui;

jawcallamá cutipämunquipis.

Amcuna pasapäcuptiqui ulꞌucunäwan tacsha

ulꞌuchacuna cushicuypïmi ñawpäniquićhu taquipäcunꞌa;

lluy lantacunäpis cushicuypïtamá tällapäcunꞌa.

13 Sarsa jaćhacuna wiñanantá ciprescunallañamá wiñapämunꞌa;

itaña wiñanantá arrayan lantacunallañamá wiñapämunꞌa.

Caycunamari Tayta Diosta altuman juluycunꞌa;

caycunamari imaycamapis mana unꞌaycuśha licachipä caycunꞌa” nil.