Tayta Diospa caćhaśhan sirbïninmi liman
49
Calu lamarpa patanćhu cä malcacuna uyalipämay;
calu-calućhu cäcuna uyalipämay.
Manaläpis näsimuptïmá Tayta Dios ayamälaña.
Mamäpa patanćhu cayällaptïlämá śhutïpa nimäla.a
2 Sumä afiläśha ispädanu limayní cananpämá lulaycula.b
Maquinpa lulïllanćhümá caycachimäla.
Sumä puntash-puntash flïchactanu lulaycamalmi
ćhulanancäman ćhulaycamäla.
3 Jinalculmi nimäla:
“Israel,
am sirbïnïmi canqui.
Amwanmi altuman juluycuśha caśhä” nil.
4 Nimaptinmi yaꞌa nilá:
“Yanꞌal yanꞌalmi lulalá;
callpäpis usuy mana cäpämi ñacalá.
Ñatac Tayta Diosꞌa tincünïmanmi licaycamanꞌa;
Tayta Diosní lulaśhämannümá cutiycachimanꞌa” nil.
5 Mamäpa pantanćhu cayällaptïlämi
Tayta Dios sirbïninpä aclamäla;
Jacobta cutichimunäpä,
Israelta juntumunäpämari lulamäla.
Tayta Diospa allinpä licaycuśhamá caśhä;
Tayta Diosnïmi callpanchaycamäní.
6 Tayta Diosmi nin:
“Manamá sirbïllächu canqui;
manamá Jacobpa milaynincunacta cutichimüllachu canqui,
nï Israel quïdäcunäta libraycüllachu canqui.
Aśhwanpa amcunacta juc acchictanümi
cay jinantin allpäćhu nunacunäpä ćhulaycuśhayqui.c
Chaymi cay allpäpa manyanćhu cä malcacunämanpis
yaꞌa salbaśhäta ćhaycachinqui” nil.d
7 Israelta libraycü Chuya Tayta Diosmi
malcacunap jamuyäśhan nunacta,
mana cäpa
licaśha nunacta,
mandacücunäpa sirbïnin
cäcäta nin:
“Mandacücunaca
amta licapäculmi śhalcatityapäcunꞌa.
Puydïcunaca amta licapäculmi uyshuycapäcunꞌa.
Aclaycuśhüniqui Israelpa Chuya chalapacuna
Tayta Dios-laycumari uyshuycälinꞌa” nil.
Sionta śhalcachinanpämi Tayta Dios nin
8 Tayta Diosmi nin:
“Chay llaquipaycunac üra ćhämuptinmi uyaliyculac;
salbaycunac muyun ćhämuptinmi yanapayculac.e
Ñawilläćhümi caycachishayqui;
lluy nasyuncunaman limalicuśhäta
camalaycachïca anmi caycunqui.
Chayćha tunïsha malcacta caśhan tacyaycachinqui;
pulumäśha allpacunäman caśhan cutiycachinqui.
9 Prïsüśha cäcunätam:
‘Waśhamanña yalapämuy’ ninqui.
Tutapäćhu cäcunätam:
‘Acchimanña śhapämuy’ ninqui.
Chay uwishnïcunamari caminucunäćhu allin michiycuśha capäcunꞌa;
chunyä ulꞌucunäćhüpis pastucta taliycälinꞌamari.
10 Manamá micananꞌapischu nï yacunanꞌapischu.
Lupaycäpis acachaycäpis manamá illacachinꞌachu.
Chaynu caycälinꞌa llaquipaycul puśhaycuptïmari;
pucyucunapi yacu yalamuśhanman puśhaycuptïmari.f
11 Lluy ulꞌücunätam caminuman muyuycachishä;
lluy caminücunätam tuquillacta pampaman muyuycachishä.
12 Cayćhu canan licaśhayquicunaca calupïmi śhapämunꞌa.
Waquinnincunañatacmi nurti lädupi śhapämunꞌa;
juccunañatacmi inti jiꞌalpunan lädupïta;
particunañatacmi Sinim malcapïta śhapämunꞌa” nil.
13 Am sïlucuna,
cushicuypi alawapäcuy.
Am allpacuna,
cushicuypi taquipäcuy.
Ulꞌucuna sumä apaliywan altuman juluycäliy.
Tayta Diosmari malcanta cunsuylaycun,
wacchancunactamá llaquipaycun.
14 Ñatac Sion ninmi:
“Tayta Dios unꞌämanñamá;
Tayta Dios jitämanñamá” nil.
15 Niptinmi Tayta Dios nin:
“¿Walmica waćhacuśhan wawinta unꞌälunmanchun imamá?
¿Patanpi yalamücäta manachun llaquipaycun imatá?
Masqui pay chaynu unꞌäluptinpis yaꞌa manamá
amcunacta unꞌaśhayquichu.
16 Maqui paltäćhu isquirbïshactam amcunacta apayá;
malcayquip murällancunapis ñawilläćhümá cayan.
17 Malcacta śhalcachïcunämá mana-manaña śhacayalcämun;
tunichïcunaca pampaman muyuchïcunaca licuyalcanñamá.
18 Canan má,
umayquita pallalculꞌari
muyülïniquicunacta licaycäliy.
Cutimücunaca lluyñamá juntunacuycul anman śhacayalcämun.
Paycuna sumä ćhaniyu aläjacunanümá canꞌa;
casaracü wamla tuquish aläja ćhulacuśhannümi capäcunꞌa.
Caynu cananpä yaꞌa Tayta Diosmari rasunpa cawsaśhänu niyá.
19 “Pampaman muyüchisha,
pasaypi chunyä,
pulumäśha malcayqui nunap
sumä-sumä juntäśhañamá canꞌa.
Ñacachishüniquicunaca caluman japächäśhañamá canꞌa.
20 Chincacüpäña licaśhayqui chuliquicunapis
linlillayquićhümá nishunqui:
‘Cayćhu quićhqui quićhquiñamá cacuyanchic.
Cayćhu yaćhanäpä aśhupäcuyñari’ nil.
21 Niptinmi śhunꞌullayquićhu ninqui:
‘Mana chulicuyaptí,
¿imanuypamá chulí cayanman?
Yaꞌa mana chuliyüña cayaptí,
¿maypïmá lluy caycuna licalïlälimun?
Alapacüśha prïsu apaśha cayaptí,
¿mayćhütan lluy caycuna capäcula?’ ”
nil.g
22 Tayta Diosmi nin:
“Maquïta chacchalculmi nasyuncunäta ayaśhä;
bandiracta śhalcalcachilmi malcacunäta ayaśhä.
Chaymi walaśh chuliquicunacta malayninćhu apapämunꞌa;
wamla chuliquicunacta umrunćhu apapämunꞌa.
23 Mandacücunämi yaćhaycälichishüniqui capäcunꞌa;
mandacücunäpa walmincunañatacmi uywaycälishüniqui capäcunꞌa.
Ñawpäniquiman uyshuyculmá ćhaquiquićhu pulbüta lläwapäcunꞌa.
Chayćhümi rasunpa Tayta Diosniqui caśhäta tantiapäcunqui.
Yaꞌaman chalapacamäcunaca manamá imaypis pinꞌayćhu capäcunꞌachu.
24 ¿Waycacuśhanta sumä pilyäcäta quitäluchwanchun imamá?
¿Prïsu apaśhan nunaca sumä pilyäcäpa maquinpi ayicunmanchun imamá?”
nil.
25 Tayta Diosñatacmi ichá nin:
“Prïsucunäta
alli-cama pilyäcunäpi yaꞌami caćhaycachishä;
pilyaćhu waycacuśhanta sumä pilyäcäpïmi yaꞌa quitäśhä.
Awari,
amwan pilyayta ashïcunäwan pilyaśhämi;
chuliquicunactapis salbaycuśhämá.h
26 Ćhïnicüniquicunacta quiquinpa aychantamá micächishä;
quiquinpa yawarninwanmá shincächishä.
Jinaptïmi jinantin nunacunaca yaćhapacunꞌa
Tayta Dios yaꞌa caśhäta,
Jacobpa munayniyu Diosnin caśhäta,
salbaycüniqui,
libraycüniqui yaꞌa caśhäta” nil.