Jerusalentam Tayta Dios cunsuylaycun
40
Tayta Diosniquim nin:
“Malcäta cunsuylapäcuy,
cunsuylapäcuy.
2 Jerusalenta cuyacuywan limapaycäliy.
Llaqui muyunnincuna camacäśhaña caśhanta niycäliy;
juchancuna pampachaycuśhaña caśhanta willaycäliy.
Awari,
lluy juchancunapïta ishcay mastalämá
yaꞌa Tayta Dios mućhuycachilá” nil.
3 Paypïta chunyäninćhu ayaycaćhäcäta uyalipäcuy:
“Tayta Diosninchic ćhämunanpä
ulꞌucunäćhu caminucta sumäta allichapäcuy.
Chunyäcäćhu pulinan caminucta tuquicta lulapäcuy.a
4 Ulꞌucunäta,
wayucunäta,
ućhcucunätapis pampatapäcuy;
wicsu-wicsucunäta,
ućhcu-ućhcucunäta dirichapäcuy.
5 Jinaptinmari sumä cayninta Tayta Dios licachicunꞌa;
lluy-lluy nunacunämá licapäcunꞌa.b
Quiquin Tayta Diosmari niyan” nishanta.
6 Chayćhümi uyalïlú “¡Apalcaćhay!”
nimüta.
Chaymi:
“¿Ima nilmi apalcaćhaśha?”
nilá.
Niptïmi niman:
“Nunacunaca ulanüllam.
Sumä caynincunapis uläpa waytannüllam.
7 Ulaca jucllam chaquïlun;
waytanpis śhuśhülunmi.
Tayta Diospa jämayllanwanmá
ulacunaca chaquïlun,
waytacunaca awïlun.
Chay ulacunänüllamá nunacunäpis cayalcan.
8 Ulacunaca chaquïllam;
waytacunäpis awïllam;
Tayta Diospa willacuyninñatacmi ichá wiña-wiñaypä” nil.c
9 Má,
¡allin willacuyta willacü Sion,
altu ulꞌuman ishpilcul apalcaćhapäcuy!
¡Allin willacuyta apaycü Jerusalen,
mana manchalillal callpa-callpawan willaculcay!
Judaćhu malcacunäta nipäcuy:
“Tayta Diosninchic jananchicćhüñamá cacuyan” nil.
10 Awari,
Tayta Dios sumä munayninwanmi
mandacunanpä jiꞌacaycayämunña.
Primiun apacuśhamá śhacayämun;
malcanta puśhacuśhamari śhacayämun.d
11 Uwish michïnümie uwishnincunacta
ñawillanćhu caycachinꞌa.
Uña uwishnincunactapis malacuśhallamá apaycunꞌa.
Chayllalä waćhäśhacunätapis tuquillapamá michiycunꞌa.
Tayta Dioswan imapis manamá tincuycachisha canmanchu
12 ¿Mayanmá yacucunäta maquinwan pućhulcul tupuycula?
¿Mayantá sïlüta maqui paltanwan tupuycula?
¿Pimá jinantin allpäćhu ñutu pulbucunäta tupuycula?
¿Mayanmá ulꞌucunätawan
ulꞌunpalcücunätapis balansawan tupuycula?f
13 ¿Mayantá Tayta Diosninchicpa tantiayninta yaćhaycunman?
¿Pimá imallactapis yaćhaycachinman?g
14 ¿Tantiaycachinanpä Tayta Dios
mayanllactapis mañaculachun imamá?
¿Tincüllanman licaycuyta mayanllapis yaćhaycachilachun imatá?
¿Mayantá payta yaćhaycachila?
¿Pimá yaćhayniyu cananpä yaćhayta uycula?
15 Paypá lluy nasyuncunäpis śhutü yacunüllamá;
balansaćhu cä pulbunüllamá;
lamar ćhawpićhu cä malcacunäpis
aptiycuy ñutu allpanüllamá cayalcan.
16 Payman uycunapä Libano munticunaćhu
lluy uywacunäpis manamá camanmanchu;
cañaycuywan uycunapä Libano ulꞌucunäćhu
lluy ilucunäpis manamari camanmanchu.
17 Paypa ñawpäninćhuꞌa
lluy nasyuncunapis manamá imapischu.
Paypá lluy malcacunapis mana cänüllamá cayalcan.
18 ¿Mayanwantá Tayta Diosta tincuycachichwan?
¿Imanuytamá payta lichcachicunqui?
19 ¿Fundiycul luläśha taytachawan
payta tincuycachichwanchun imamá?
¿Üruwan laꞌaśha,
illaypi cadinacunawan cä
taytachawan payta tincuycachichwanchun imamá?h
20 Aśhta waccha nunacunällapis taytachanta
lulachinanpämi mana puyunan iluctapis ashicälälin.
Jinalculmi aläja lulay yaćhäta ashilcul
mana cućhpätaña lulachicälälin.i
21 Má,
Tayta Diospi ¿manachun yaćhapäculanqui imamá?
¿Manachun uyalipäculanqui imatá?
¿Manachun una-unaypïtaña cayaptin willapäcuśhulanqui imamá?
¿Manachun cay pachäpa allaycuyninpïtalä
cayaptin tantiapäculanqui imatá?
22 Tayta Diospa dispächun cay uylu pachäpa patanćhünümá cayan;
nunacunäpis muyülïninćhümá paćhcaśhcänülla sumä-sumä timpuyalcan.
Paymá curtïnactanu sïlütapis maśhtaycülun;
carpacta ataycuśhancänümari lancaycülun.
23 Paymá sumä puydïcunäta mana cäman muyuchin;
cay pachäćhu mandacücunätapis pampamanmá licalïchin.
24 Paycuna chayllala lanta lantäśhanu,
chayllala talpüśhanu,
chayllala sapichacuyäcänümari cayalcan.
Chayćhu paycunaman Tayta Dios pücaycamullaptinmá awïlälin;
päśhactanümá sumä-sumä waywäpis apayan.
25 Chuya Tayta Diosmi nin:
“¿Mayanwanmá yaꞌacta tincuycachimanman?
¿Mayantá yaꞌanu canman?”
nil.
26 Má,
sïlüta anśhalcälil licapäcuy.
¿Mayanmá chayćhu lluy cäcunäta lulala?
Paymari lluy lusirucunäta yalalcachimul yupaycun;
śhutinpa-camamá lluytapis ayaycun;
Sumä-sumä munayniyu,
ancha-ancha callpayu captinmá
jucllanpis mana unꞌaycuśhachu.
27 Am Jacob,
¿imapïmi ninqui “imanuy cawsaśhätapis
Tayta Dios manamá licamanchu” nil?
Am Israel,
¿imapïmi ninqui “yaꞌapïta
Tayta Dios imapis manamá ucunchu” nil?
28 ¿Manachun yaćhanqui Tayta Dios
wiña-wiñaypä cawsä caśhanta imatá?
¿Manachun uyalilanqui jinantin pachäta pay lulaycuśhanta imatá?
Tayta Dios manamá jucmanyanchu nï pishipanchu.
Sumä-sumä yaćhayninpis mana tantiayta atipanamá.
29 Pishipäśhacunäta paymá callpanchaycun;
pishi callpayücunätapis paymá callpacta uycun.
30 Müsucunaca pishipapäcunmi,
illacälälinmi;
allincamacunäpis jucmanyapäculmi cućhpapäcun.
31 Ñatac Tayta Diosman chalapacücunämij ichá
muśhü callpayu capäcunꞌa;
ancanülämi altu-altup palipäcunꞌapis.k
Wayra-wayra lipäculpis manamá pishipapäcunꞌachu;
maynüpa pulipäculpis manamá illacapäcunꞌachu.