Juda läducta mandacü Senaquerib maquinćhu cachinanpämi nin
36
Ćhunca tawayu (14) wata Ezequias mandacü cayaptinmi Asiria lädup mandacünin Senaquerib,
Juda lädu sumä murälläśhaman śhalcamul lluy malcacunacta pudiracuycula.
2 Chay Asiriap mandacüninmari Laquis malcapïta pilyänincunacta juc puydïnintinta caćhamula,
Jerusalenćhu cä mandacünin Ezequiasman.
Chay pilyäcämi janay lädu istanquipi śhamü siquia läduman ćhulanacälälila;
chay istanqui cayan Täśhäcäpa Ćhaclanman nishan lï caminućhümi.
3 Paycunawan limämi Hilciaspa chulin Eliaquim,
Sebna,
Asafpa chulin Joa yalapämula.
Eliaquimmi palasyućhu puydï yanapä cala;
Sebnañatac isquirbïnin cala;
Joañatacmi Juda lädućhu ima pasaśhancunactapis isquirbiycüca cala.
4 Chayćhumi pilyäcunap puydïnin Senaquerib nin:
“Asiriap sumä mandacüninmi Ezequiasta nin:
‘¿Imamantá sumä chalapacuyanqui?
5 ¿Pilyućhu limapäśhallanchicwan llallinchic niyanquichun imatá?
¿Yaćhaywan imactapis mana manchalillal pilyaywanmi llallinchic niyanquichun imatá?
Chayurá ¿imaman chalapacultan cuntrá śhalcucuyanqui?
6 Yaćhayämá Egipto yanapäśhunayquipä chalapacuśhayquita.
Egiptoꞌa waꞌachäśha śhuꞌuśhnullämá;a
chaymá chalapacüninpa maquinta ćhiplälul pasälun.
Chaynümari chalapacünincunapä Egiptop mandacüninca.
7 Ñatac amcuna nipämanquićh:
“Tayta Diosnïmanmi yaꞌacuna chalapaculcá” nil.
Chaychun ¿altu ulꞌucunäćhu taytachayquip uycunancunacta Ezequias lluy chincächila?
¿Jinalcul manachun “Juda lädućhu,
Jerusalenćhu cäcunäta cay Jerusalenćhu cä uycuna patacllaćhüñam alawapäcunqui” nila imamá?
8 Má,
Asiria nasyunpa mandacüní nishantari awniycuy.
Ishcay walanga (2,000) cawallucta yaꞌa uycucmanmi chaychica sillädacunacta talimunayqui captinꞌa.
9 Mandacüní Asirio läducunap pishi callpa puydïllantapis mana manchayächilchun,
¿Egiptopïlä carritacunacta,
cawallucunactawan sillänincunacta taliyta pinsayanquimanlä canpis?
10 Icha ¿Tayta Dios mana niycamaptinchun cay nasyunta camacaycunäpä śhayalcämú imatá?
Tayta Diosmari nimäla cay nasyunman yaycuycul camacaycünäpäpis’ ” nil.
11 Niptinmi chay puydïcäta Hilciaspa chulin Eliaquim,
Sebna,
Joa nipäcula:
“Ama chaynu caychu,
Arameo limayćhu limapaycälillämay;
chay limayćhuꞌa tantiapäcuśhämari.
Chay murällap jananćhu cä nunacunaca uyaliyalcaptinꞌa,
Juda lädup limayninćhuꞌa amari limapaycälimaychu” nil.
12 Niptinmi pilyäcunap puydïnin Senaquerib nin:
“¿Amllactawan puydïllayquita niycunäpächun mandacüní caćhamäla imamá?
Payꞌa alcaycuyan murällap jananćhu cäcunäpis lluy uyaliycälinantamá.
Paycunapis amcunapis micuypïtamá ismayniquicunactab micapäcunqui;
yacupïtamá ishpayniquicunacta upyapäcunquipis” nil.
13 Nilculmi pilyäcunap puydïnin śhalculcul callpa-callpawan apalcaćhaypa Juda lädup limayninćhu nila:
“Asiriap sumä jatun mandänin caynu nishanta uyalipäcuy:
14 Mandacü Ezequiaswan ama ingañachicuyalcaychu;
maquïpïta pay manamá imaypis libraycälishunquimanchu.
15 Ezequiasꞌa Tayta Diosman chalapacachiyta jicutapäcuśhunquim:
‘Rasunpa Tayta Dios libraycamäśhunmi.
Asiriap mandacüninpa maquinman malcanchic ćhänanta pay manamá munanꞌachu’ nil.
Chay nishanwan amari awnichicuyalcaychu.
16 “Ezequiasta amari cäsupäcuychu.
Asiriap mandacüninmá caynu niyalcäśhunqui:
‘Cay nishäta awnipäcuptiquiꞌa amcunawan manañamá pilyaśhächu.
Maquïman ćhulacalcämuptiquiꞌa üba,
ïgus lantayquicunapïtamá micapäcunqui;
püsuyquicunapïmá yacuctapis upyapäcunqui.
17 Chaypïta amcunap allpayquicunamannümi puśhaśhayqui;
achca-achca trïgucuna,
üba lantacuna,
tantacuna,
bïnucuna caśhan allpamanmari puśhaśhayqui’ nil.
18 “Yanꞌalätac Ezequias ingañayalcäśhunquiman ‘Tayta Dios libraycamäśhunmá’ nil.
¿Asiriap mandacüninpa maquinpïta mayanllan malcallactapis taytachancuna librayculachun imatá?
19 ¿Hamatpa Arfadpa taytachancuna mayćhütá cayalcan?
¿Mayćhümá Sefarvaimpa taytachancunapis cayalcan?
¿Chay taytachancuna maquïpïta Samariacta libraycuyta imayllapis atipapäculachun imamá?
20 ¿Cay malcacunap mayannin taytachallanpis maquïpïta malcanta librayculachun imamá?
Chayurá ¿imanuypatan maquïpïta Jerusalenta Tayta Dioslla libraycülunman ampá?”
nil.
21 Niptin malcäñatacmi uyaliyllaman camäśha juc shimillactapis nï limalcapäculachu.
Mandacü Ezequiasmari mayanpis mana limalcunanpä nila.
22 Jinaptinmi Hilciaspa chulin Eliaquim,
Sebna,
Asafpa chulin Joa sumä llaquisha müdanantapis laćhyäśha cutipämula:
palasyućhu puydï yanapä Eliaquim,
isquirbïnin Sebna,
Juda lädućhu ima pasaśhancunactapis isquirbiycü Joa.
Paycunam mandacü Ezequiasman willaycälila Asiriap pilyänincunap puydïnin ima nishantapis.