“Juda lädup mandäninpa malta uwishta apachishun malcanman pacacunapä

Sela lädupïtari chunyäninpa

tuquish Sion ulꞌucama apachishun” nil.

2 Ishñanpi alapacüśha pälï pishucunanümi,

Moab walmicunaca culindanchicćhüña cä Arnon mayup

patanćhüña cacuyalcan.

3 Chay ayïcunämari Sionćhu cä mandacücäta nipäcun:

“Yanapaycälillämänayquipäri limanaculcay;

llantuyca ćhawpi muyunćhu cäcäta llantuycuśhannuꞌari llantuycälillämay.

Anman ayimücunäta pacaycälillämay;

anman śhamücunäta amari ipanchaycälillämaychu.

4 Moab lädupi ayimücunaca

amcunaćhuꞌari yaćhapäculläśhä;

chay camacaycünïcunapïta pacaycälillämayꞌari” nil.

Má,

ñacachïcunaca camacäluptin,

camacaycüca pawäluptin,

pampaman muyuchï ćhïnicüca chincäluptin,

5 Davidpa jucnin milayninmi mandacü canꞌa.

Payꞌa llaquipaycuywan rasuncäwanmi allin mandacunꞌa.

Lïllanman cayäcätam ashiycunꞌa;

cällanman cäcäpïmi wañupacunꞌapis.

6 Awari,

yaćhapäcümi Moab läducunaca yaćhätucüśha,

sumä nunatucüśha,

jatuntucüśha capäcuśhanta.

Ñatac chaynu alawacuynin

manamá tacyaycunꞌachu.

7 Jinaptinmi Moab malca apalcaćhaypa waꞌapäcunꞌa;

Awari,

Kir-hareset malca allinnin päsaśh culpachäśhacunäpïmá

jinantin Moab awćhupäcunꞌa.

8 Hesbonćhu cä lantacunänümi,

Sibmaćhu cä üba lantacunänümi awïlälin.

Nasyuncunap puydïnincunamá

übacunäpa sumä pallaynincunacta jaluypa pawälälin.

Chay pallaynincunamari Jazercama

maśhtacacülul chunyäcäcama ćhäla;

lamarpa chimpancamalämari pallaynincuna ćhälapis.

9 Jazer malcayücunaca waꞌapäcuśhannümá

Sibmaćhu cä üba lantacunäpïtapis yaꞌa Isaias waꞌacú.

Am Hesbon malcactawan,

Eleale malcactam

wiꞌinïwan puśhtälälichishayqui.

Cusicha timpu micuyniquicunap

jananćhüñamá pilyäcunallaña apalipäcunꞌa.

10 Lluy ćhaclayquicunapi cushicuyca,

allin cayca chincacunñamá.

Üba lantayquicunaćhu cushicuy

taquicuna manañamá canñachu;

üba jalunayquicunaćhu bïnupä manañamá jalupacunquiñachu.

Cusichayquipi cushicuycunacta yaꞌamá camacaycülú.

11 Chaymi Moabpïtawan Kir-hareset malcapïta sumä llaquicú.

Arpap waꞌayninnümi śhunꞌulläpis waꞌayan.

12 Moab läducunaca altunninćhu cä uycunancunaman

lipäculpis yanꞌal-yanꞌalpämá lipäcunꞌa.

Mañacuna wasiman lipäcul taytachancunacta mañacuy-mañacuy

cayalcalpis mana cäpämá yanꞌal mañaculcanꞌa.