10
¡Imanuylä capäcunqui mana allin camachicuycunacta julücuna,
ñacachinayquipä camachicuycunacta isquirbïcuna!
2 Amcuna chaywanmi wacchacunäta tincüninmanchu nï licaycapäcunqui;
malcäćhu pasaypi cäcunätapis cällanmanchu nï allichaycälinqui.
¡Japanyäśha walmicunätamá waycapäcunqui!
¡Mana taytayu-mamayücunätamá suwapäcunqui!
3 ¿Cäraycunan muyuncäćhu imactalä lulapacunqui?
Calu-calupïta camacaycuyca śhamuptin,
¿yanapäśhunayquipä mayanmanlä lipäcunqui?
¿Ima cäniquicunactapis maymanlä ćhulaycapäcunqui?
4 Amcuna pilyućhu wañuchishamá capäcunqui;
juc nasyunman prïsu alaśhćhaśhamá capäcunqui.
Chaywanpis Tayta Diospa piñacuynin manamá pasanꞌachu;
jinallalämá maquinta masta ćhulaycunanpä cayan.a
Asiria läduwanmi Tayta Dios mućhuycachin
5 ¡Imanuylä canꞌa Asiriapb mandacünin!
Paymari mućhuchinäpä maquïćhu garutinu cayan;
piñacuynïtamá maquinman ćhulaycú.
6 Asiriactamá juchasapa nasyunman caćhayá;
sumä piñachimäśhan malcamanmác caćhayá.
Lluy cänincunacta waycalcul,
suwalcul caminućhu
mituctanu jaluy pawänanpämá caćhayá.
7 Ñatac chaynu lulachinäta Asiriap
mandacünin manamá tantianchu;
śhunꞌunpis manamá uchuyllactapis chaynu caśhanta pinsalcunchu.
Payꞌa achca-achca nasyuncunacta camacaycul
pampaman muyuchiyllactamá tantiayan.
8 Paymi nin:
“¿Lluy puydïnïcuna
manachun mandacücunänülä cayan imatá?
9 ¿Manachun Carquemis malcanülla
Calno malcapis camacaycüśha cayan imamá?
¿Manachun Hamat malcapis Arfad malcanülla pampaman muyüchisha cayan imatá?
¿Manachun Samariapis Damasconu camacaycüśha cayan imamá?
10 Awari,
Jerusalenpïpis,
Samariapïpis
mas-mas sumä-cama,
taytachayü-cama
nasyuncunactamá camacaycülá.
11 ¿Manachun Samariacta taytachantinta camacaycüśhänülla
Jerusalentapis taytachantinta camacaycüśhä imamá?”
nil.
12 Tayta Diosñatacmi Asiriap mandacüninwan Sion ulꞌucta,
Jerusalenta camacaycülunꞌa.d
Jinalculmi sumä nunatacüśha,
puydïtucüśha,
jatuntücüśha caśhanpïta Asiriacta mućhuycachinꞌa.
13 Asiriap mandäninmari nunatucüśha nin:
“Sumä munaynïwanmá lulayculá.
Allin yaćhaynïwan,
tantiaynïwanmá imanuy
cananpäpis lulayculá.
Nasyuncunap culindancunactapis pampaman
muyulcachilmá lluy cänincunacta pudiracuyculá.
Türunümari mandacünincunacta llallïlá.
14 Ishñaćhu luntucta talïcänümá malcacunäpa
lluy cänincunacta duyñuchacuyculá.
Jitäśha luntucta palläcänümá jinantin
allpäpi duyñuchacuyculá.
Manamá mayanllapis laplanta cuntrá quićhayculachu;
mićhacuyninwan manamá tarac-tarac niyllapis niycamälachu” nil.
15 Canan má,
¿cuchünin nunapïta
mas-tucunmanchun ächaca imamá?
¿Sirruchüpis cuchünin nunapïta mas-tucunmanchun imatá?
¿Garutichun apäninta puśhälunman imamá?
¿Caśhpillapi cä garutichun apäninta chancülunman imatá?
16 Chaymari chay alli-cama nunatucüśha Asiriacta
sumä munayniyu Tayta Dios
ishyaywan mućhuycachinꞌa;
sumä caynintapis lupayä ninawanmi camacaycülunꞌa.
17 Israelpa acchinnu cä Tayta Dios walälunꞌamá;
chuya cäca latälunꞌamá.
Paymá juc muyunllaćhu jaćhacunäta,
caśhacunäta nina lupäcänu camacaycülunꞌa.
18 Allin-cama cä wirtancunacta
muntincunacta lluy-lluymá camacaycülunꞌa.
Mana callpayu ishyätanüñamá caćhaycülunꞌa.
19 Muntinćhu ashllay ilucunallañamá quïdaycunꞌa;
uchuy walaśhcha fintayta
atipanallanñamari caycunꞌa.
Israel puchücunaca Tayta Diosllamanñam chalapaculcan
20 Chay muyuncunaćhu juc-ishcay puchü israelcunaca,
quïdä Jacobpa milaynincunapis manañamá
imaypis camacaycünin Asiria läduman chalapaculcanꞌañachu.
Aśhwanpa Israelpa Chuya cä
Tayta Diosllamanñamá sumä chalapaculcanꞌa.
21 Jacobpa ashllay quïdä milaynincunallañamari cutipämunꞌa;
sumä munayniyu Tayta Diosmanmá cutipämunꞌa.
22 Masqui israelcunaca lamarćhu
awishquinu achca-achca cayalcalpis,
juc ishcayllamá cutipämunꞌa.
Tincüninmannu camacaycüśha cananpämari
Tayta Dios camachilaña.
23 Awari,
sumä munayniyu
Tayta Dios nishanmannümi
jinantin nasyunta camaycülunꞌa.e
24 Chaymi sumä munayniyu Tayta Dios nin:
“Sionćhu yaćhä malcallay,
Asiria nasyunta ama manchacuychu.
Masqui unay Egipto läducunänu caśhpiwan,
garutiwan usuchipäcuśhuptiquipis ama manchacuychu.
25 Manaläpis unaytam amcunapä
piñacuyní camacälunꞌa;
chaypïta paycunactañamá piñacuyní camacaycülunꞌa.
26 Yaꞌa sumä munayniyu Tayta Diosmi
Madian lädu nunacunäta
Oreb wancaćhu mućhuycachishänu,f
Asiria nasyunta mućhuycachishä;
ütac Egiptopi śhamuśhan caminućhu
lamarman garutïta pallalcul anuachiśhänümari camacaycüśhä.
27 “Chay muyunmi janayquićhu
llasänu cä Asiria wicapäśha canꞌa.
Wira caśhayqui-laycum ćhänalächishuśhayqui yügupis
cucutiquipi paquïsha canꞌa” nil.
28 Licapäcuy,
Asiria läducunämi Ajat-cama ćhalälimun,
Migron-cama chimpälälimun;
Micmasćhüñatacmi lluy apapämuśhancunäta caćhaycälälin.
29 Chay bäducta chimpalcälilmari Geba malcaćhüña jamayalcan.
Rama malcayücunäñatacmi manchacuypi chucchuyalcan,
Gabaa malcayücunäwan Saulpa malcanñatacmi ayiculcan.
30 Galim malcaćhu cäcunäpis apalcaćhapäcunmá.
Lais malcaćhu yaćhäcunäpis chayta uyalipäcunmá.
Anatot malcayu nunacunaca imanuylä capäcunꞌa.
31 Madmena malcayücunämi wicta-cayta ayiculcan;
Gebim malcayücunämi pacacuyta ćhapayalcan.
32 Canan muyunmá Asiria läducuna Nob malcaćhu jamayalcan.
Tuquish Sion ulꞌucta,
Jerusalenta camacaycünanpämi
maquinta pallalcapäcun.
33 Ñatac sumä munayniyu Tayta Diosmi,
lantap pallayninnu cä sumä-sumä Asiriacta cuchülunꞌa.
Jatu-jatun lantacunanu cäcätamá witülunꞌa;
altu-altu cäcämá cućhpächisha canꞌa.
34 Muntićhu cä jaćhachacunätamá ächawan cuchülunꞌa;
Libanoćhu sumä-cama ilucunänümá cućhpälunꞌa.