Asiria läduwanmi Tayta Dios camacaycun
8
Chaypïta Tayta Diosmi niman:
“Jatun tablaman tuqui lïgipaśhllacta sinsilwan isquirbiycuy ‘Maher-salal-hasbaz’a niyäta.
2 Chaynu lulaycunqui Jeberequiaspa chulin Zacariastawan sasirdüti Uriastab tistïgupä ćhulayculmi” nil.
3 Chaypïta willacü cä walmïwan yaꞌa puñüluptïmi patayu licalïlul juc walaśhta ishyacüla.
Chaymi Tayta Dios niman:
“Chay walaśhta Maher-salal-hasbaz nïta śhutichay.
4 Walaśhcha manalä ‘mamay’ ‘papay’ nïta paćhyayächiptinlämi Damasco,
Samaria malcacunap cänincuna,
Asiria lädup mandacüninman apaśha canꞌa” nil.
5 Chaypïta Tayta Dios yapam niman:
6 “Juda läducta,
Siloe jawca cä yacunu licaycuyaptïpis paycuná ipanchälälimanmá.
Paycuna mandacü Rezinta,
mandacü Remaliasta ima pasaśhanpïtamari cushiculcanꞌa.c
7 Chaymi sumä-sumä camacaycünanpä Tayta Dios caćhamunꞌa Asiria lädup mandacüninta.
Jinaptinmi Eufrates mayu sumä punlluśhancänu ućhcun-ućhcun pilyäcuna Juda läduman yaycülunꞌa.
8 Chaynüpamá Judata punllülunꞌa cuncancama.
¡Ay Emanuel,
anca laplanta quićhaycul lishancänümá jinantin malcayquita ñiticalpunꞌa!d
9 “Nasyuncuna,
juntunaculcal cayta uyalipäcuy;
calu-calućhu cä malcacuna uyalipäcuy.
Pilyapäcunayquipä maynu-maynu alistacüśha capäculpis
camacaycüśhamá capäcunqui.
Sumä-sumä armädu cayalcalpis pampaman muyüchishamá capäcunqui.
10 Imanuypa lulapäcunayquipä limanacälälisha cayalcaptiquipis mana cämanmá muyunꞌa.
Tayta Dios yaꞌacunawan cayaptinmá,
maynu-maynüpa tantiachinacuyalcaptiquipis nï lulacacunꞌachu” nil.
Tayta Diosllacta manchaculcänanpämi nin
11 Tayta Diosmari sumä anyapäman cay Juda lädu lulaśhannu mana lulanäpä.
Caynümi niman:
12 “Cay malcaca imactañapis ‘Mandacücäpa cuntran śhalcuymi’ nishannu amcunapis ama niyalcaychu.
Paycuna lluy manchaculcäśhantapis ama manchacuyalcaychu.e
13 Sumä munayniyu Tayta Diosllactari chuyapa licaycäliy.
Payllacta altuman julaycäliy;
payllacta manchaculcaypis.
14 Paymá sigüructaf uywaycuśhunqui.
Ñatac mitcacacachïnin lumimá,
cućhpachïnin wancamá Israelpäwan Juda lädupä canꞌa.
Palpachïnin trampanümá,
watunümá Jerusalen malcapäpis canꞌa.
15 Achca-achca saytacälälilmi cućhpapäcunꞌa camacaycüśha canancama;
trampaman palpücunaca ćhänalayalmá quïdapäcunꞌa” nil.
16 Isaiasñatacmi nin:
“Cay yaćhachishäcunäta pitwiycul siguräluy;
cay nishäcunacta cäsucücunäman uycuy.
17 “Jacobpa milaynincunapïta Tayta Dios
pacacuptinpis,
payllamanmi yaꞌa chalapacuśhä;
payllamanmi yaꞌa alcaycuśhä.
18 Tayta Dios uycamäśhan chulïcunawanmá cayćhu yaꞌa cayalcá.
Awari,
yaꞌacuna israelcunäpä tantiachïninmi cayalcá;
Sion ulꞌućhu sumä munayniyu yaćhäcäpa licachïninmari.
19 Ichapis nunacunaca nipäcuśhunqui:
‘Licacücunäta,
almacunäta shimi puntallanwannu ayäcunätapis tapucalcämuy’ nil.
Chaynu nishuptiqui:g
‘¿Tayta Diosta tapuculcänantá malcaca taytachantachun tapucuyalcanman imamá?
¿Cawsäcunäpa allinninpä
wañüśhacunätachun tapuyalcanman imatá?’
nil.
20 Yaꞌañatacmi nic,
Tayta Diospa
yaćhachicuyninta camachicuyninta licaycäliy.
Chaymannu mana limapäcuptinꞌa paycunapä manamá achicyay canꞌachu.
21 “Paycuna sumä ñacaśhtin micuypi wañuśhtinmi
wicta-cayta pulipäcunꞌa.
Micuypi capäcul śhunꞌunpis timpuyaptinmá,
taytachantapis,
mandacünintapis mana allin cananpä nipäcunꞌa.
Altucunacta licapäculpis,
22 ütac cay allpäta licapäculpis ñacayllacta,
sasachacuyllacta,
tutawyayllacta,
llaquicuyllactamá licapäcunꞌa.
Sumä yanawyaya tutapaycämanmá wicapalpüśha capäcunꞌa” nil.