Üba ćhaclaman Judata tincuchin
5
Má,
yaꞌa Isaiasmi,
cuyaśhäcänïpä juc üba ćhaclapïta canan juc taquicta taquiycapuśhä:
Cuyaśhäcänïpä allicta wayunan wäta
ćhaclaćhümá üba lantan caña.
2 Ćhaclanta tuquicta canćhaycul lumincunacta
pichayculmi allinnin übacunacta talpülun.
Ćhaclanpa ćhawpinćhümi täpana türricta lulälun;
üba apchina püsuctapis lulälunmá.
Chaypïtam übancuna mishquillacta wayunanta alcaycula;
ñatac übaca ćhacćhayätamá wayüña.a
3 Má,
Juda lädućhu nunacuna,
Jerusalen malcaćhu yaćhäcuna nipämay:
“¿Mayannïmi mana allinta lulayá?
¿Üba lantächun icha yaꞌachun?
4 ¿Ima mastañamá üba lantäta lulaycüman cala?
Mishqui üba wayunanta alcayaptí,
¿imapïmá ćhacćhayä wayülun?
5 “Cananmi niycälishayqui
üba lantäwan ima lulanätapis:
Camacaycüśha cananpämi,
inćhancunacta julüśhä;
jalutacüśha cananpämi murällanta aśhaycüśhä.
6 Pasaypi jitäśhamanñamá muyüchishä.
Manañamá mayansi pallaynincunactapis
cuchupanꞌañachu nï ulyapanꞌañapischu.
Itañacuna,
caśhacuna juntäśhallañamá cacunꞌa.
Chaycunaman mana tamyamunanpämi
pucutaycunätapis niycuśhä” nil.
7 Tincuchishäca caynümi:
Sumä munayniyu Tayta Diospa üba lantan israelcunämi.
Cuyaśhan ćhaclanñatacmi Juda lädu.
Paymari alcaycula tincüllanmannu wayuycälinanta.
Ñatac mana allinllactamá taliycula.
Pay alcaycula cällanman licaycälinantamá.
Ñatac ñacäcunäpa apalcaćhaynillantamá taliycula.b
Mana allin nunacunaca mućhuycachisha cananpä nin
8 ¡Imanuylä capäcunqui,
wasicunacta masta-masta lantïcuna,
ćhaclacunacta masta-masta tawacücuna!
¿Amcunallachun jinantin allpäćhu yaćhayta munapäcunqui imatá?c
9 Ñatac sumä munayniyu Tayta Diosmi caynüta niycamäla:
“Chay achca-achca wasicunämá chunyaculcanꞌa.
Maynu tuqui jatućhaćhä wasicunapis
mana nunayümá pulumanꞌa.
10 Ćhunca yundayu üba ćhaclapïpis,
tacsha wacuy juntallamá yaluycunꞌa.
Ćhunca tirsu muju yaycü trïgu ćhaclapïtapis,
jucllay tirsullactamá cusichaycunꞌa” nil.
11 ¡Imanuylä capäcunqui
achic-achicyalcuypi shincacücuna!
¡Imanuylä capäcunqui
tutalpunancama bïnuwan shincacücuna!
12 Chay fistachacuynincunaćhu arpacunawan,
arpa-niläcunawan,
gitärracunawan,
bumbucunawan,
quïnacunawan
tucaśhtin bïnupis jalu-jaluyninpawanmád cayan.
Ñatac Tayta Diostá manamá yalpalcunchu,
nïtac lulaśhantapis imapis ucunchu.
13 Chaynu mana tantiayniyu malca capäcuśhanpïmi
juc nasyunman prïsu puśhaśha capäcunꞌa.
Allin-cama cä nunancunamá micuypi wañupäcunꞌa;
lluy malcantinmá yacupïtapis wañupäcunꞌa.
14 Chaymi sipultüraca micuypi wañuyänu
shiminta jatu-jatuntalä quićhälunꞌa.
Jinalculmi alli-cama nunacunäta,
wacchacunäta,
cushisha fistachacü shincacücunätapis millpacalpunꞌa.
15 Lluy-lluymari uyshulächisha capäcunꞌa.
Nunatucüśha cäcunäpis pinꞌayćhümá capäcunꞌa.
16 Sumä munayniyu Tayta Diosñatacmi ichá
tincüninman licaycuśhanpi altuman juluycuśha canꞌa;
Rasun cä Tayta Diosmi tincüllanman lulaycuśhanpa,
paylla chuya Tayta Dios caśhanta camalachicunꞌa.
17 Chay muyunćhu uwishcunaca allin pastucunactamá taliycälinꞌa;e
chay pulumäśha caśhancäćhümá uwishcuna,
capishcuna micapäcunꞌa.
18 ¡Imanuylä capäcunꞌa artillanwan
mana allin lulayta puchcawannu aysamücunaca!
¡Imanuylä capäcunꞌa juchacta
carritap läsunwannu aysamücunaca!
19 Paycuna nunatucüśhalämi nipäcunpis:
“Lulanancäta jucllaña Tayta Dios lulaycuchun licananchicpä.
Israelpa Chuya Tayta Diosnin munaśhanta
jucllañari lulaycuchun lisinanchicpä” nil.
20 ¡Imanuylä capäcunqui mana allincäta “allinmi” nïcuna;
allincätañatac “mana allinmi” nïcuna!
¡Imanuylä capäcunqui achquïta “tutam” nïcuna;
tutawyaycätañatac “achquim” nïcuna!
¡Imanuylä capäcunqui ćhacćhäcäta “mishquim” nïcuna;
mishquïtañatac “ćhacćhämi” nïcuna!
21 ¡Imanuylä capäcunqui yaćhätucücuna!
¡Imanuylä capäcunqui sumä tantiayniyütucücuna!
22 ¡Imanuylä capäcunqui bïnu upyanayquipä umritucücuna!
¡Imanuylä capäcunqui imaymana trägucta shincanayquicama upyäcuna!
23 Imanuylä capäcunqui yanꞌalpi illayta ćhasquiycul,
juchayu nunäta “allinmi” nïcuna.
Allin nunätañatacmi ichá imapis mana ucuśhunquichu.
24 Chaymi sumä munayniyu Tayta Diospa yaćhachicuyninta
mana cäsuculcanquichu.
Israelpa Chuya Tayta Diosninpa camachicuyninta jalutacälälinquimá.
Chaymi päśhacta nina lupäcänu,
laśhćhüjucta sumbayä nina camacaycücänu,
amcuna sapipi camacaycüśha capäcunqui,
jinaman waywa apaśhan chaqui waytanümi camacapäcunqui.
25 Chaynu capäcuptiquimá malcanpä
Tayta Dios sumä-sumä piñacüla;
malcanta camacaycünanpämi maquinta pallalcula.
Jinaptinmi ulꞌucunäpis chucchüla;
ayacunäpis caminucunäman wicapämuśhamá capäcula.
Chaywanpis piñacuynin manamá pasalachu.
Payꞌa jinallalämari maquinta ćhulaycunanpä cayan.f
26 Paymá juc bandiracta aywinꞌa calućhu cä nasyuncunäta ayananpä;
cay allpap manyanćhu cäcunäta wishyaywanmá ayaycunꞌa.
Má,
mana-manañamari juclla paćhcapäcamunꞌa.
27 Paycunapi manamá mayanllanpis pishipapäcunꞌachu nï mitcaculcanꞌachu,
nï puñuypis aysapäcunꞌachu.
Manatacmá waćhacuncunapis wayalla watacüśhá
capäcunꞌachu nï śhucuyninpa watullanpis laćhuycunꞌachu.
28 Flïchancunapis afiläśhamá caycunꞌa,
flïchanpa ćhächicuncunapis listuñamá cayanꞌa.
Cawalluncunap shilluncunapis lumicunanülämá cayan;
carritancunap ruydancunapis sumä-sumä lücu waywanülämá cayalcan.
29 Apaliynin liyunpanülämá;
apalishtinmá micunanpä cayäcäta chalacülun;
sumä jir-jiryaśhtinlämá micunanta chalacuycul pasachicun;
manamá mayanpis quitayta atipanchu.
30 Chay muyun ćhämuptinmá chay nunacunaca
Israelpa cuntran lamarcunänu apalipäcunꞌa.
Mayanpis cay allpäta licapäculꞌa,
tutawyaywan llaquicuywan intüśhallactamá licapäcunꞌa.