Cantar de los Cantares
Walminwan Wayapan Taquipänaculcäśhan
1
Caycunam Salomonpa sumä tuqui taquincuna.a
Wamä taqui
Wamlaca
2 Yapalcul-yapalcul muchacaycamay;
bïnupïpis mas mishqui-mishquimá cuyacuyniqui.
3 Pirfümiqui sumä tuqui-tuqui aśhnämá;
quiquiquimá chay pirfüminu tuqui-tuqui cayanqui.
Chaymá wamlacunapis cuyapäcuśhunqui.
4 Acuchun,
jucllaña puśhacamay.
Mandacüllá,
wasiquiman puśhacamay.
Apanacuśhancuna taquipäcuśhan
Mandacüní,
ampïta maynu-maynümi cushiculcá;
cuyacuyniqui bïnupïpis mas-maslä caśhantamá yalpaśhun.
Chaymá wamlacunapis cuyapäcuśhunqui.
Wamlaca
5 Jerusalen wamlacuna,
yananilä calpis sumä tuquishllamá cayá,
Cedarpa carpancunanub yananilämi cá,
Salomonpa wasinćhu curtïnannümi cá.
6 Yananilä caśhäta ama licapayalcämaychu;
lupaycämá yanay-yanayta lupäman.
Tulïcunamá yaꞌawan piñacalcälil üba lantancunacta täpachipämäla.
Chaymá quiquïpa üba lantätá mana licacuyculächu.
7 Sumä cuyacuśhäní niycamayꞌari,
¿mayćhütan uwishniquita michiycunqui?
¿Mayćhütan ćhawpi muyun jamaycachinqui?
¿Imapïtá uwish michï-masiquicunap
ćhawpinćhu śhucupacüśha yanꞌal puliyäśhä?
Apanacuśhancuna taquipäcuśhan
8 Lluy wamlacunapïtapis sumä tuquish-tuquishnin wamla,
mana tantialꞌa uwishcunäpa laśhćhullantari atiycuy;
michïcunaca yaćhaśhanpa lädullanćhu capischayquicunacta michiycuy.
Walaśh
9 Cuyayllapä munayllapä cä wamla,
Faraoncäpa carritanta
puśhä tuqui-tuqui gïwannümá cayanqui.
10 Arïtiquicunap ćhawpinćhu cärayqui tuquish-tuquischallamá chipyaycun.
Cullarniquicunap ćhawpinćhu cuncayquipis tuqui-tuquischallamá camalaycun.
11 Ürupi aläjacunactam,
illaywan
adurnäśhacunactam lulaycapuśhayquipis.
Wamlaca
12 Jamananćhu mandacüca jamayaptinmi
nardo pirfümí mishqui-mishquillacta aśhnapayan.
13 Cuyaśhäní,
luncuchaćhu cä mishqui-mishqui
aśhnä mïrra pïchüćhu apaśhäcänümá cayäpaman.
14 Cuyaśhäní,
En-gadi lädućhu übas lantacunap
ćhawpinćhu mishqui aśhnä alheña nishan waytap pallayninnümá cayäpaman.
Walaśh
15 Cuyaśhá wamläní,
maynu tuquish-tuquischallam canqui;
cuyayllapämá canqui.
Ñawichayquicuna ishcay ulpaychanümá.
Wamlaca
16 Am cuyacuśhäní,
sumä-sumä tuquishllamá canqui;
maynu cuyayllapämá canqui.
Walaśh
Tuqui birdi pastucunämi puñunanchicpä cayan.
17 Cedrocunämari wasinchicpa paradïruncuna;
ciprescunämari tïchunchiccuna cayan.