Levitacunaca imacta lulapäcunanpäpis
23
David anchap yaśhaña cayalmi,
israelcunäpa mandacüninpä chulin Salomonta ćhulala.a
2 Davidmari jinantin Israelćhu lluy puydïcunäta,
sasirdüticunäta,
levitacunäta juntüchila.
3 Chayćhu quimsa ćhunca (30) watayüpi janaman levitacunäta fintachiptinmi quimsa ćhunca pusäniyu walanga (38,000) capäcuña.
4 Paycunapïmi ishcay ćhunca tawayu walanga (24,000) Tayta Diospa alawana wasinta lulapäcunanpä puydïcuna ćhulaśha capäcula.
Süta walangañatacmi (6,000) licaycüpä cäraycüpä ćhulaśha cala.
5 Tawa walangañatacmi (4,000) puncucta täpapäcunanpä,
juc tawa walangactañatacmi (4,000) David lulachishan tucanacunawan Tayta Diosta alawapäcunanpä ćhulaśha capäcula.
6 Levitacunätam ayllunpa-cama quimsaman David laquïla:
Gersonman,
Coatman,
Merarimanpis.
Gersonpa milaynincuna
7 Gersonpa chulincunam Laadanwan Simei.
8 Laadanpa chulincunañatacmi quimsa:
Wamä chulin Jehiel,
Zetam,
Joelpis.
9 Simeipa chulincunapis quimsam:
Selomit,
Haziel,
Haranpis.
Paycunamari Laadanpa milaynincunap puydïnincuna capäcula.
10 Simeipa chulincunañatacmi tawa:
Jahat,
Zina,
Jeus,
Beriapis.
11 Chulin Jahatmi wamäca,
atimüninñatac Zina.
Jeuswan Beriañatacmi mana achca chuliyu capäcul juc ayllunüllaña licaśha capäcula.
Chaymari juc lulayllamanña ćhulaśhapis capäcula.
Coatpa milaynincuna
12 Coatpa chulincunañatacmi tawa:
Amram,
Izhar,
Hebron,
Uzielpis.
13 Amrampa chulincunañatacmi Aaronwan Moises.
Aaronmari lluy milaynintin japächaycuśha wiña-wiñaypä capäcula,
chuya cäcunäta Tayta Diosman uycunanpä,
insinsiucunacta cañaycapäcunanpä,
sirbiycälinanpä,
nunacunaca allin caycälinanpä niycunanpäpis.b
14 Tayta Diospa nunan Moisesñatacmi,
lluy milaynintin Levi aylluman jucllachaycuśha capäcula.
15 Moisespa chulincunañatacmi Gersonwan Eliezer.
16 Gersonpa wamä chulinñatacmi Sebuel.
17 Eliezerpa wamä japallan chulinñatacmi Rehabias.
Rehabiaspañatacmi achca-achca chulincuna cala.
18 Izharpa wamä chulinñatacmi Selomit.
19 Hebronpa chulincunañatacmi:
wamäca Jerias,
atimüninñatac Amarias,
Jahaziel,
Jecamanpis.
20 Uzielpa chulincunañatacmi:
wamäca Micaia,
atimüninñatac Isias.
Merarip milaynincuna
21 Merarip chulincunañatacmi Mahliwan Musi.
Mahlip chulincunañatacmi Eleazarwan Cis.
22 Eleazarꞌa wamla-cama chuliyüllam wañucula.
Paycunam Cispa chulin aylluncunawan masanchaculcäla.
23 Musip chulincunañatacmi quimsa:
Mahli,
Edar,
Jeremotpis.
24 Lluy paycunamari sinsaptin Levi ayllućhu wasinpa-cama puydïnincuna capäcula.
Paycunamá Tayta Diospa alawana wasinćhu ishcay ćhunca (20) watayüpi janaman sirbipäcü capäcula.
25 Davidmari nin:
“Israelcunäpa Tayta Diosninmi,
Israel malcanta jawcallaćhu cawsaycachinꞌa.
Paytacmi Jerusalenćhüpis wiña-wiñaypä cawsaycunꞌa.
26 Chaymi levitacunaca carpactawan tincuna carpaćhu lluy cänincunacta manaña apaycaćhapäcunꞌañachu” nil.c
27 Chaynu David camachishanmannümi ishcay ćhunca (20) watayüpi janaman levitacunaca sinsaśha capäcula.
28 Paycunamari Aaronpa milaynincunacta yanapapäcula Tayta Diospa alawana wasinćhu cä patyucunäta,
cuartucunäta,
lluy japächäśha cäcunätapis chuyanchayta.
Jinaman chayćhu ima lulaycuna cäcunäćhüpis yanapapäculamari.
29 Paycunatacmi licaycüca capäcula Tayta Diosllapä japächäśha tantacta,
allinnin arinapi cä uycunacta,
mana libadürayu tantacta,
casitućhu ancäśha ütac yanüśha uycunapä cäcunätapis.
Jinaman tupunapä cäcunätapis paycunatacmi licaycüca capäcula.
30 Paycunam muyun-muyun wälanpa tardinpa alawana wasićhüpis caycälinan cala,
Tayta Diosta sulpäta uycälinanpäwan alawaycälinanpä.
31 Chaynütacmi paycuna jamana muyunćhu,
llullu quilla fistaćhu,
juc fistacunaćhüpis Tayta Diosman uycälinan capäcula.
Chayurá ayca capäcuśhanmannu jinaman camachishanmannümi imaypis Tayta Diosta sirbiycapäcü cala.
32 Chaynütacmi Tayta Diosman aśhuycunapä carpactapis,
Chuya Sityuctapis licaycapäcü capäcula.
Lluy chaycunactamari Tayta Diospa alawana wasinćhu lulapäcula wawꞌi-caśhan Aaronpa milaynincuna camachishanmannu.d