Juda lädućhümi Abiam mandacun
15
Nabatpa chulin Jeroboam ćhunca pusäniyu (18) wataña Israelćhu mandacü cayaptinmari,
Judaćhu Abiam mandacuyta allaycula.
2 Paymari Jerusalenćhu quimsa wata mandacula.
Abisalompa wawin Maacam paypa maman cala.
3 Paypis papänin mana allin lulaycunacta lulaśhantanümi atichila.
Awquillun Davidpanüchu manamá Tayta Diosllaćhu śhunꞌunpis caycula.
4 Ñatac Tayta Dios Davidta cuyalmi achquictanu Jerusalenćhu mandacü cananpä chulinta ćhulaycula.a
Chaynüpam mandacuyninta Jerusalenćhu tacyalpachila.
5 Chaynu lulaycula Tayta Diospa munayninmannu David lluy cawsaycuśhanpam.
Lluy-lluy camachishancunactamari cäsucula.
Mana allin lulaynin cala,
Het lädu Uriasta mana allinta lulaśhallanmá.b
6 Abiam cawsaśhancama Roboamc pilyallaćhümari Jeroboamwan capäcula.
7 Chaynütacmi Abiamwan Jeroboampis pilyallaćhu capäcula.
Ñatac Abias mandacuyninćhu lluy lulaśhancuna Juda lädu mandacünincunap isquirbisha librunćhümi cayan.
8 Abiam wañucuptinmi Davidpa Malcan nishanćhu awquilluncuna caśhancäman pampapämula.
Paypa pudirnin chulin Asam mandacüca cala.
Juda lädućhümi Asa mandacun
9 Israelćhu ishcay ćhunca (20) wataña Jeroboam mandacuyaptinmi Juda lädućhu mandacuyta Asa allaycula.
10 Tawa ćhunca jucniyu (41) watam Jerusalenćhu mandacula.
Mamanñatacmi Abisalompa wawin Maaca cala.
11 Asapa cawsaynin awquillun Davidpanümi Tayta Diospa puntanćhu allin caycula.
12 Payꞌa malcanpïta lluy-lluymi chincächila taytachanta alawapäcul waticacuycunacta.
Jinaman awquilluncuna lulaśhan lluy taytachacunactapis camacaycülam.d
13 Awilan Maaca mamacha Aseracta alawananpä śhalcachisha ilucta lulachishanpïtam,
puydï cayninpïta paytapis wicapäla.
Chay mamachactapis wicapalculmari Cedron wayućhu cañaycüla.
14 Ñatac altunnin ulꞌucunäćhu cä uycunacunäta mana camacaycuyalpis Tayta Diospa munaśhanmannümi Asa imaypis cawsaycula.
15 Chaynütacmi papänin,
quiquin japächaśhan ürucunäta,
illaycunäta,
lluy sirbichicunapä cäcunätapis Tayta Diospa alawana wasinman ćhulaycula.
Mandacü Ben-adadmi Asawan limanaculcan
16 Chay Israel lädup Baasa mandacünin cayal pilyallaćhümari Asawan cacula.
17 Israel lädup mandacünin Baasam Juda läduman pilyä lila.
Chayćhümi Rama malcacta llallilcul pilyänincunawan tacyachila mayanpis Judapi mana yalamunanpä ni yaycunanpäpis.
18 Jinaptinmi Tayta Diospa alawana wasinćhu,
jinaman quiquinpa palasyunćhu quïdä ürucunäta,
illaycunäta willacünincunaman uycul Siriap mandacünin Ben-adadman apächin.
Payꞌa Tabrimonpa chulinmi,
Hezionpa willcanmi cala.
Damasco malcaćhümari Ben-adad yaćhala.
Paytam Asa caynu nichila:
19 “Taytanchiccuna limalinaculcäśhannu yaꞌanchicpis limalinacuśhun.
Israel lädup mandacünin Baasaman limalicuśhayquitari mana caśhanman muyuchiy.
Chayćha jawcactaña caćhaycamanꞌa.
Chaypämi cay ürucunäta,
illaycunäta apayächimú” nil.
20 Chaynu Ben-adad nichishanta mandacü Asa awnilam.
Chaymi pilyänincunap puydïninta Israelpa malcancunaman pilyä yaycunanpä caćhäla.
Jinalmi llallïla Ijonta,
Danta,
Abel-bet-maacata,
Cineret lädućhu cä malcacunäta,
Neftali lädućhu cä malcacunätapis.
21 Chayta mandacü Baasa yaćhälulmi Rama malca pilachishanta caćhaycul Tirsa malcaman cuticula.
22 Jinaptinmi mandacü Asa jinantin Juda lädućhu lluy cäcunäta ayalcachimul Rama malcaćhu Baasa pilachishan lluy lumicunäta,
ilucunäta apachila.
Chaycunawanmi Benjamin lädućhu cä Geba,
Mizpa malcacunäta mandacü Asa śhalcachila.
23 Ñatac Asa mandacuyninćhu lluy lulaśhancuna,
malcacunactapis śhalcachishancuna Juda lädu mandacünincunap isquirbisha librunćhümi cayan.
Yaśha cayninćhüñatacmi ćhaquinwan Asa ishyäla.
24 Wañucuptinñatacmi awquilluncuna pampaläśhan Davidpa Malcan nishanman pampälälila.
Paypa pudirnin chulin Josafatmi mandacü cala.
Israel lädućhu Nadabmi mandacun
25 Juda lädućhu ishcay wataña Asa mandacü cayaptinmi Jeroboampa chulin Nadab Israelćhu mandacuyta allaycula.
Payꞌa ishcay watallam mandacula.
26 Tayta Diospa munaśhanmannüchu Nadab manamá lulala.
Aśhwanpa papänin lulaśhantanu mana allincällacta lulalmi israelcunätapis juchapacachila.
27 Cay Nadabpa cuntranmi Isacar ayllu Ahiaspa chulin Baasa śhalcula.
Chaymi Filisteo lädu Gibetonćhu wañüchila.
Nadabta wañüchila lluy israelcunäwan Filisteo lädu Gibetonta cunćhalayalcalmari.
28 Juda lädućhu Asa quimsa wataña mandacü cayaptinmi Nadabta Baasa wañüchila.
Jinalculmi pudirnin mandacula.
29 Chaynu Baasa mandacuyta allayculmi Jeroboampa lluy aylluncunacta wañüchila.
Silo lädu Ahiaswan Tayta Dios willacachimuśhannümari jucllayllactapis cawsayniyüta mana caćhayculachu.e
30 Chaynu pasala Jeroboam mana allinta lulaśhancunapi,
jinaman israelcunäta juchapacachishanpïtam.
Chaycunawanmari Israelpa Tayta Diosninta piñachila.
31 Ñatac Nadab mandacuyninćhu lluy lulaśhancunapis Israel lädu mandacünincunap isquirbisha librunćhümi cayan.
32 Israel lädup Baasa mandacünin cayal pilyallaćhümi Asawan cacula.
Israel lädućhu Baasam mandacun
33 Juda lädućhu quimsa wata Asa mandacuyaptinmi Ahiaspa chulin Baasa jinantin Israelpa mandacuynin cayta allaycula Tirsa malcaćhu.
Ishcay ćhunca tawayu (24) watamari Israelćhu mandacula.
34 Ñatac Baasa mana allinllactam Tayta Diospa ñawpäninćhu lulala.
Jeroboam israelcunäta juchapacachishannümari mana allincunällacta paypis lulala.