Juda lädupi śhamü willacümi Jeroboamta anyan
13
Chaynu Jeroboam uycuna patacćhu insinsiucta lupayächiptinmi Tayta Diospa caćhaśhan juc willacü Juda lädupïta Bet-elman ćhämun.
2 Tayta Dios nichiptinmi chay willacüca uycuna patacpa cuntran callpa-callpawan nin:
“Uycuna patac,
uycuna patac,
Tayta Diosmi caynüta nin:
‘David ayllućhümi Josias śhutiyu walaśh näsimunꞌa.
Paymi am pataccäćhu wañuchinꞌa altunnincunaćhülä insinsiu lupachï sasirdüticunäta.
Janayquićhütacmi nunacunäpa tulluncunactapis cañaycälinꞌa’ ” nil.a
3 Chaynu Tayta Dios nichishanca rasunpa caśhanta tantiananpämi chay muyunlla juc siñal pasananpä willacüca nin:
“Cananmi juc siñalta licanqui:
uycuna pataccämi tunïlunꞌa;
ućhpancunapis wichïsham canꞌa” nil.
4 Chaynu Tayta Diospa willacünin nunaca uycuna patac Bet-elpi nicuyaptinmi mandacü Jeroboam uycuna patacpi maquinta chacchalcamul unanchäcuyan:
“¡Chayta chalapäcuy!”
nil.
Ñatac chay unanchaśhan maquin istiracäluptinmi cuyuchiyta manaña atipälachu.
5 Chay ürallatacmi uycuna patacca pampaman muyulcul ućhpanpis wacacacülun.
Chaynu pasala Tayta Dios willacüninwan nichishannüllam.
6 Chayćhümi willacücäta mandacü Jeroboam nin:
“Ama chaynu callaychu,
Tayta Diosniquita mañacapallämay maquillá allinyänanpä” nil.
Niptinmi willacüca Tayta Diosta mañacapuptin mandacücäpa maquin allinyälun,
punta caśhannu.
7 Chayćhümi mandacüca nin:
“Wasïta lilläśhun imallactapis micuycunayquipä;
jinaman rigäluctapis uycuśhayquim” nil.
8 Niptinmi Tayta Diospa willacüninca nin:
“Masqui lluy cäniquipi ćhawpicta uycamaptiquipis manam amwan lishächu,
nïtac cayćhu micuśhäpischu,
upyaśhäpischu.
9 Tayta Diosmi nimäla:
‘Micuytapis amam micunquichu,
yacuctapis amam upyanquichu,
lishayqui caminüpapis amam cutimunquichu’ ” nil.
10 Chaymi willacüca Bet-elman cutil śhamuśhan caminunpa manaña cutilañachu.
11 Cay timpum Bet-elćhu juc yaśha willacü yaćhala.
Paytam chulin willapaycula chay muyun Bet-elćhu imacunacta willacüca lulaśhantapis,
mandacücäta imacta nishantapis.
12 Chaymi yaśha papänin nin:
“¿Mayannin caminupmi licun?”
nil.
Niptinmi chulincuna Juda lädupïta śhamü willacüca mayannin caminup cutishantapis niycälila.
13 Yaśha willacü papäninñatacmi nin:
“Aśhnuman sillachipämay” nil.
Chaynu chulincuna sillalcachiptinmi sillacuśha licula,
14 Juda lädupi śhamü willacücäpa ipanta.
Encina lantap siquinćhu täcuyäta alcansalculmi nin:
“¿Juda lädupi śhamü Tayta Diospa willacüninca amchun cayanqui?”
nil.
Niptinmi willacüca:
“Aw,
yaꞌami cayá” nin.
15 Niptinmi yaśha willacüca:
“Acuchun wasicta lishun,
imallactapis micuycunayquipä” nin.
16 Niptinmi Juda lädupi śhamü willacüca nin:
“Manam cutïmanchu,
nï liwshicmanchu,
nï cayćhu amwan micuytapis micümanchu,
yacuctapis upyämanchu.
17 Tayta Diosmi nimäla:
‘Micuytapis amam micunquichu,
yacuctapis amam upyanquichu,
lishayqui caminüpapis amam cutimunquichu’ ” nil.
18 Niptinmi yaśha willacüca casquicuyninwan nin:
“Amnüpis willacümi yaꞌapis cayá.
Tayta Diospa anjilninmi nimäla:
‘Wasiquiman puśhamuy micuyta micapäcunayquipä,
yacucta upyapäcunayquipä’ ” nil.
19 Niptinmi paywan cutipäcul wasinćhu micuyta micapäcula,
yacucta upyapäcula.
20 Chaynu micuyalcal täcuyalcaptinmi cutichï yaśha willacücäta Tayta Dios limapaycun.
21 Chaymi Juda lädupi śhamü Tayta Diospa willacüninta nicuyan:
“Tayta Diosmi caynüta nin:
‘Yaꞌapa nishäta cullu linlicuyculmi mana cäsucamälanquichu;
caćhaśhätapis manam uyalicamälanquichu.
22 Amam micunquichu nishaccäman micüpis,
upyäpis cutishayquipïmi awquilluyquicunap pampaläśhanman manaña pampaśhachu canqui’ ” nil.
23 Chaynu micuyta camacäluptinmi cutichï yaśha willacüca aśhnuman sillächin licunanpä.
24 Chaynu liyaptinmi caminućhu juc liyun licalilcamul wañüchin.
Chay aya jitaläśhanpa lädullanćhümari liyuncäwan aśhnuca cayalcäla.
25 Chayninpa pasä nunacunämi ayaca jitaläśhanta,
liyunpis täpaläśhanta licapäcula.
Chaytam yaśha willacüca yaćhaśhan malcaman ćhaycälil willaycälila.
26 Chayta uyalïlulmi caminupi cutichimü yaśha willacüca nin:
“Chaymá Tayta Dios nishanta cullu linlicuycul mana uyalicü willacüca.
Chaymari Tayta Dios nishannu liyunpa maquinman ćhulaycüluptin wañulcachil lluy ticshïlun” nil.
27 Nilculmi chulincunacta:
“Aśhnuman sillachipämay” nin.
Niptinmi sillälächin.
28 Chaynu liyalmi caminućhu aya jitalayäta talïlun;
aśhnuwan liyuncäpis lädullanćhümi cayalcäña.
Ayäta liyunca manamá micuñächu,
nï aśhnuntapis wañuchiñächu.
29 Chaymi Tayta Diospa willacünin ayäta aśhnunman ćhulculcul yaśha nunaca malcaman cutichicula,
chayćhu waꞌapäcul pampapäcunanpä.
30 Chayćhu quiquin pampacunanpä cä sipultüraman pampayculmi waꞌacula:
“Ay,
wawꞌi-caśhallay” nil.
31 Pampayculmi willacü yaśhaca chulincunacta nin:
“Yaꞌa wañucuptí cay Tayta Diospa willacünin pampaläśhancämanmi pampapämanqui.
Cay tullücunacta paypa lädullanmanmi ćhulaycapämanqui.
32 Bet-elćhu uycuna patacpa cuntran,
jinaman Samaria lädu malcacunap ulꞌucunäćhu cä uycunacunap cuntran Tayta Dios paywan willacachishanca lulacacunꞌam” nil.
33 Chaynu pasayaptinpis Jeroboam manam mana allin lulaynincunapi wanaculachu.
Aśhwanpa ulꞌucunäćhu uycuna lulachishancunäpä sasirdüticunacta caśhanmi ćhulaycula.
Mayantapis ćhulayta munaśhantam sasirdütipa japächaycula.
34 Chaynu lulayninmi Jeroboampa milaynincunacta mana allinman ćhächila.
Chaymi chay aylluca jinantin pachäpi lluy chincächisha,
pampaman muyüchisha cala.