2
Ninive llaqta,contraykipim hamuchkan cheqechisuqnikipas.
Waqaychaychikyá amparakuna wasikichiktapas.
Qamkunaqa ñankunapiyá wateqamuychik.
Peleanaykichikpaqyá allinta alistakuychik.
Qamkunaqa kallpatayá sumaqta hapiychik.
2 Jacob castakunapa allin reqsisqa kaynintaqa
Tayta Diosmi kutichipunqa.
Israel nacionpa hatun kasqanman hinam
Tayta Diosqa kutichipunqa.
Paykunaqariki suwakunapa suwananmi karqaku.
Uvasllankutapas tukururqam enemigonku.
3 Tropankunapa harkachikunanpas
pukay-pukayraqmi kachkan.
Tropankunapa pachanpas
pukay-pukayraqmi kachkan.
Guerrapaq carretankunapas
rawraq ninaman rikchakuqraqmi kachkan.
Cipres sachamanta lanzankupas
kayman-chaymanraqmi qewikachachkan.
4 Loco hinañam callenta kallpachkan guerrapaq carretankupas.
Kayman-wakmanmi kallpakachachkan plazakunapipas.
Rupachkaq yantamanraqmi paykunaqa rikchakuchkanpas.
Paykunaqa llipyay hinaraqmi kallpakachachkankupas.
5 Capitanninkunatam qayachkan reyqa.
Kallpachkaspam mitkarun paykunaqa.
Murallamanmi utqachkan paykunaqa.
Harkaqninkutam alistakuchkan paykunaqa.
6 Kichakuykunñam mayupa punkunkunapas.
Tuñichisqañam kachkan palaciopas.
7 Ninive llaqtapi yachaqkunaqa
preso rinankupaqmi citasqaña kachkanku.
Sirvientankunapas paloma hinaraqmi waqachkanku.
Paykunaqa llakimantam qasqonkuta takakuchkanku.
8 Ninive llaqtaqa qocharayaq yakumanñam rikchakuchkan.
Ñawpa tiempomantaraqmi lluptiypaq-lluptikuchkan.
Mana kasukusparaqmi qayaptinkupas ayqeypaq-ayqekuchkan.
9 Qamkunaqa qollqetayá suwaychik.
Qamkunaqa qoritayá suwaychik.
Ninive llaqtapa qori-qollqenqa
manaña tukuymi kachkan.
Qori-qollqemanta alhajankunaqa
manaña qepiy atinam kachkan.
10 Mana imayoq chinkachisqañam kachkan.
Chay llaqtaqa purmachisqañam kachkan.
Sonqonkupas manchakuymantam hukmanyarunña.
Moqonkupas pasaypaqtam katkatatarunña.
Mana kallpayoqñam paykunaqa kachkan.
Lliwpa uyanpas ayayasqañam kachkan.
11 ¿Yaqachum imallapas puchurunraq
chay leonpa machayninmantaqa?
¿Yaqachum imallapas puchurunraq
wawankunaman mikuchinan lugarmantaqa?
Chaymanqariki orqo leonpas chinanwanmi riqku.
Chaypiqariki wawankunawanmi kawsakuqku.
Mana pipapas manchachisqanmi kawsakuqku.
12 Leonqariki uñankunapaqpas kamaqtam wañuchipurqa.
Leonqariki chinanpaqpas achkallatañam seqopurqa.
Machaynintapas achkallaña mikuykunawanmi
huntachirqa.
Yachanantapas achkallaña tisapasqanwanmi
huntachirqa.
Ninive llaqtaqa pasaypaqña chinkachisqa kananmanta
13 Llapallan kamachiq Tayta Diosmi nin:
Ninive llaqta,
ñoqaqa kachkani contraykipi sayaqmi.
Guerrapaq carretaykikunatapas kañaykusaqmi.
Carretaykikunatapas qosnirirachisaqmi.
Malta leonnikikunatapas
espadawanmi wañurachisaq.
Imapas suwakusqaykitaqa
kay pachamantam chinkarachisaq.
Qamkuna ukupi willakuqkunatapas
manaña uyarinaykichikpaqmi chinkarachisaq.