NAHUMPA QELLQASQAN LIBRO
Vengakunanpaq Diospa piñakuyninmanta
1
Elcos llaqtayoq Nahum sutiyoq runam revelacionninmanta kay librota qellqarqa. Ninive llaqtapa contranpim kaynata willakurqa:2 Tayta Diosqa sientikuruspa vengakuq Diosmi.
Tayta Diosqa vengakuqllaña kaspa piñakuqmi.
Payqa contranpi sayariqkunata vengakuqmi.
Enemigonkunapaq piñakusqanta mana qonqaqmi.
3 Tayta Diosqa anaq piñakuqmi.
Tayta Diosqa llumpay atiyniyoqmi.
Payqa castiganqapunim huchayoqkunataqa.
Muyoq wayrapim purichkan Tayta Diosqa.
Wayra-parapim purichkan Tayta Diosqa.
Puyupas polvo hinaraqmi pay puriptinqa.
4 Lamar qochapas chakirunmi pay qaqchaykuptinqa.
Lliw mayukunapas chakirunmi pay qaqchaykuptinqa.
Basan lawpi pastokunapas qawirunñam.
Carmelo Orqopi plantakunapas qawirunñam.
Libano Orqopi ikllimuqpas chakirunñam.
5 Orqokunapas paypa ñawpaqninpiqa katkatatanmi.
Moqokunapas paypa ñawpaqninpiqa chullurunmi.
Allpapas hoqarikunraqmi paypa qayllanpiqa.
Kay pachapas lliw yachaqkunapiwanmi
hoqarikunraq paypa qayllanpiqa.
6 Pay piñakuruptinqa
¿yaqachum pipas qayllanpiqa sayanman?
Paypa sinchi piñakuynintaqa
¿yaqachum pipas aguantanman?
Paypa piñakuyninqa nina hinaraqmi chutarikun.
Qaqakunapas llumpayllatañam ñutuparikun.
7 Tayta Diosqa ¡mayna-mayna allinmi!
Sasachakuy punchawpipas amparakuna hinaraqmi.
Payman hapipakuqkunataqa payqa waqaychaykunmi.
8 Lloqlla hinaraqmi Ninivetaqa tukurunqa.
Tutayay ukukamaraqmi enemigonkunataqa qatinqa.
9 ¿Imatataq piensachkankichik
Tayta Diospa contranpiqa?
Payqa tukurusunkichikmi qamkunataqa.
Manam castiganmanchu iskaykamaqa.
10 Kichka hinaña siray-siraymi kachkanku.
Vinopa intuykusqan sinkay-sinkaymi kachkanku.
Chakisqa qopa hinañam kañasqa kanqaku.
11 Yaw Ninive llaqta,
qanmantam lloqsimurqa Tayta Diospa contranpi
mana allin piensaq runaqa.
Qanmantam lloqsimurqa paypa contranpi
mana allinkuna consejakuq runaqa.
12 Runakunatam Tayta Dios nisunkichik:
Mana asllayaq Asiria nacionniyoq runakunaqa
chayman hinam wañuchisqa kanqaku.
Nana-nanaq Asiria nacionniyoq runakunaqa
chayman hinam purmachisqa kanqaku.
Ñoqaqa ñakarichirqaykichikmi qamkunataqa.
Manam ñakarichisqaykichikñachu qamkunataqa.
13 Kunanqa churkususqayki yugotapas pakiparusaqñam.
Kunanaqa watasusqayki coyundatapas tipiparusaqñam.
14 Yaw Asiria nacionpa reynin,
contraykipim Tayta Dios kamachin:
Manam kanqañachu sutiki apaqkunapas.
Diosnikikunapa templonmantaqa
chinkarachisaqmi llaqllasqa taytachaykikunatapas.
Diosnikikunapa templonmantaqa
chinkarachisaqmi fundisqa taytachaykikunatapas.
Ñakasqa kasqaykiraykum
chaypiña rurapusqayki sepulturatapas.
Ninive llaqta tuñichisqa kananmanta.
15 Waqaya orqonta hamuchkan
allin noticia willakuq runaqa.
Waqaya orqonta hamuchkan
hawka kawsakuymanta willakuq runaqa.
Juda nacionniyoq runakuna,
fiestaykichiktayá ruraychik.
Prometekusqaykichiktayá cumpliychik.
Manam hamusunkichikñachu
mana allin ruraqkunaqa.
Pasaypaqtañam tukurun
mana allin ruraqkunaqa.