2 —Ninive sutiyoq hatun llaqtaman rispayá qanman rimapayasqayta chaypi yachaqkunaman willakamuy —nispa.

3 Chaymi Jonasqa Tayta Diospa kamachisqanman hina Ninive llaqtaman pasarqa.

Ninive llaqtaqa chawpinta pasanapaqpas kimsa punchaw purina hatu-hatun llaqtam karqa.

4 Chaymi Jonas huk punchaw purinata ristin willakurqa kaynata:

—Tawa chunka punchawmantam Ninive llaqtaqa puchukachisqa kanqa —nispa.

5 Chaymi Ninive llaqtapi yachaqkunaqa Diospa nisqanpi creerqaku.

Paykunaqa hatunpas-taksapas ayunaspankum luto pachakunawan churakurqaku.

6 Ninive llaqtapa reyninpas chay willakuyta uyariruspam tiyananmanta sayarirurqa hinaspam pachankunatapas horqokuruspan luto pachawanña churakurqa hinaspam uchpapa hawanpi tiyaykurqa.

7 Chaymantam Ninive llaqtapa reyninqa yanapaqninkunapiwan kamachikurqa kayna niq decretota:

—Amayá pipas mikuchunchu ima mikuyllatapas,

amataqyá animalkunamanpas mikuytaqa qoychikchu nitaq yakutapas.

8 Aswanqa lutokuychikyá animalnikichikkunapiwan.

Qamkunaqa tukuy sonqoykichikwan Diosta mañakuspayá mana allin kawsasqaykichikmanta sapakama wanakuychik.

Wanakuychiktaqyá daño ruraqllaña kasqaykichikmantapas.

9 Diosqa icharaqpas llakipayariwaspanchik piñakuyninpi puchukarachiy munawasqanchikta manaña ruranmanchu —nispa.

10 Diosmi qawarispan rikururqa Ninive llaqtayoq runakunapa imam rurasqankuta.

Paykunaqa mana allin kawsasqankumantam wanakurqaku,

paykunata castigananpaq nisqantaqa manañam rurarqachu.