Canastapi poqosqa fruta qawasqanmanta
—Amos ¿imatataq qawachkanki?
—nispa.
Chaymi ñoqañataq nirqani:
—Huk canastapi poqosqa frutakunatam —nispa.
Hinaptinmi Tayta Dios niwarqa:
—Israel runaykunaqa castiganaypaqmi listoña kachkan.
Huchankumantaqa manam pampachasaqñachu.
3 Chay punchawpiqa palaciokunapipas manam takinqakuñachu aswanqa qaparispam waqanqaku.
Achka runakunam wañunqaku.
Ayakunatam wischunqaku tukuy hinastinpi,
chaynaqa upallallayá kaychik.
Chaynatam Tayta Dios nin.
Israel nacion juzgasqa kananpaq tiempon hichpamusqanmanta
4 —Wakchakunata llapallan sarukuykuqkuna,
nacionnikichikpi wakchakunata tukuruqkuna,
kaytayá llapallaykichik uyariychik:
5 Qamkunam ninkichik:
“Amalaya pasarunmanña llullu killa punchawpi Dios adorana tiempo chaynapi trigonchikta rantikunanchikpaq.
Amalaya samana punchaw pasarunmanña precionta wicharirachispa kawsayninchikta rantikunanchikpaq hinaspa mana cabal pesaq balanzawanpas engañananchikpaq” nispa.
6 Ninkichiktaqmi:
“Wakchakunataqa aswanraqyá wakchayachisunchik sirvienteña kanankukama.
Chaynatayá rurasun usutallanmanta debewaptinchikpas.
Rantikusunmi trigopa tamollantañapas” nispa.
7 Jacobpa yupaychasqan Tayta Diosmi kikinrayku juraspan nirqa:
Paykunapa mana allin rurasqankunataqa
manam haykapipas qonqasaqchu.
8 Tukuy kaykunata rurasqankuraykum
allpapas kuyurinqa.
Chaypi yachaq llapallan
runakunam waqanqa.
Imaynam Nilo Mayu masyakunraq-menosyanraq,
chaynam allpapas
hoqarikunqaraq-kutiykunqaraq.
9 Yapamantam Señor Dios nin:
Chay punchawpim doce horapi
intita wañurachisaq.
Punchawraq kachkaptinmi
kay pachata tutayarachisaq.
10 Fiestaykichikkunatam tikrarusaq
wañuqkunamanta waqayman.
Takikichikkunatam tikrarusaq
aya takiman.
Llapallaykichiktam lutochisqaykichik.
Llakimantam chukchaykichikta
chutakunkichik.
Mamanmi waqan sapallan wawan wañukuptin.
Chaynatam waqaykachisqaykichik.
Llakipa hapisqallanñam kankichik.
11 Señor Diosmi nin:
Hamuchkanmi tiempokuna,
chay punchawkunapim
kay pachapi
yachaqkunaman yarqayta apachimusaq.
Chayna yarqayqa kanqa
manam mikuymanta yarqachikuychu.
Yakunayayqa kanqa
manam yakumanta yakunayaychu
aswanqa nisqaykuna uyariymantam.
12 Runakunam purinqaku llutanpi.
Lamar qocha patan-patanmi qellqayta maskanqaku.
Norte lawmanta intipa qespimunankamam maskanqaku,
chaywanpas manam tarinqakuchu.
13 Sumaq doncellakunam,
allin sayaq mozokunam
yakumanta chay punchaw
desmayanqaku.
14 Samaria llaqtapi
taytacha-mamachakunarayku juraqkuna,
Dan llaqtapi runakuna,
Beerseba llaqtapi runakuna,
taytacha-mamachakunaraykum jurankichik.
Manaña hatarinaykichikkamam urmarunkichik.