Amospa qawasqan aqarway urukunamanta
7
Reypaq pastota ruturuptinku huktawan ikllirimuchkaptinmi Señor Dios qawachiwarqa.
Paytam rikurqani aqarway urukuna mirachichkaqta.
2 Aqarwaykuna llapa qorata tukuruchkaptinñam nirqani:
—¡Señor Dioslláy,
pampachaykuwayku!
Israel runaykikunaqa aschallam kaniku,
manam aguantayta atiymankuchu —nispa.
3 Tayta Diosqa piensasqanta manaña ruraspanmi nirqa:
—Chay castigopas manañam kanqachu —nispa.
Rupay qawasqanmanta
4 Señor Dios qawachiwaptinmi rikurqani kanananaq rupay kachaykuqta.
Uku-uku lamar qochatam pasaypaqta chakirachirqa.
Campokunatapas chay ninam tukururqa.
5 Chaymi nirqani:
—Taytalláy,
amayá chaynataqa ruraychu.
Israel runaykikunaqa aschallam kaniku.
Manam aguantayta atiymankuchu —nispa.
6 Tayta Diosqa piensasqantaqa manaña ruraspanmi nirqa:
—Chay castigopas manañam kanqachu —nispa.
7 Señormi qawaykachiwarqataq kayta:
Paymi sayachkasqa huk perqapa ñawpaqninpi.
Makinpiñataqmi hapichkasqa albañilpa plomadanta.
8 Paymi tapuwarqa:
—Amos ¿imatataq hapichkani?
—nispa.
Chaymi ñoqañataq nirqani:
—Albañilpa plomadantam —nispay.
Chaymi Tayta Dios niwarqa:
—Albañilpa plomadanwanmi perqata derechachkaq hina Israel runaykunapa imaynam kawsasqanta qawasaq.
Paykunataqa manam pampachasaqñachu.
9 Isaacpa mirayninkunapa yupaychasqanku taytacha-mamachankupa kasqantam tuñichinqaku.
Taqmanqakutaqmi Israel castapa capillankutapas.
Rey Jeroboampa mirayninkunapa contranpim guerrata hatarichimusaq.
Sacerdote Amasiaswan Amos atipanakusqanmanta
10 Betel llaqtapa templonpi sacerdote Amasiasmi Samaria llaqtapi kaq Rey Jeroboanman kachaspan kaynata nichimurqa:
—Amosmi Israel runakunata hukmanyachichkan contraykipi rimaspan.
Israel runakunaqa manam aguantachwanñachu.
11 Chay Amosmi nichkan:
“Jeroboanmi guerrapi wañunqa,
Israel castakunatapas presotam pusanqaku” nispa.
12 Chaymantam Amosta Amasias nirqa:
—Diosmanta willakuq runa,
pasaway kaymanta.
Ganakuyta munaspaykiqa Juda nacionpiñayá Diosmanta willakamuy.
13 Amañayá willakuyñachu kay Betel llaqtapiqa,
kaypiqariki kachkan reypa templonmi chaynataq nacionpa gobiernonmi —nispa.
14 Hinaptinmi Amosñataq nirqa:
—Manam ñoqaqa Diosmanta willakuqchu kani nitaqmi paykunapa castanchu kani.
Ñoqaqa oveja michiqllam kani hinaspa purun higos rantikuqllam.
15 Ichaqa Tayta Diosmi niwarqa:
“Amaña ovejata michispayá Israel runaykunaman ñoqamanta willakamuy” nispa.
16 Chaynaqa Tayta Diospa nisqantayá uyariy Amasias:
Qamsi ninki Israel castakunapa contranpiqa ama imatapas Diosmanta rimanaypaq,
ninkitaqsi Isaacpa mirayninkunapa contranpipas Diosmanta ama imatapas willakunaypaq.
17 Ichaqa Tayta Diosmi nin:
“Warmikim llaqtapipuni hukwan-hukwan kakunqa.
Qari churikikunañataqmi warmi churikikunapiwan guerrapi wañunqaku.
Chakraykikunatapas suerteaspankum rakinakunqaku.
Kikikipunim wañunki taytacha-mamachakunapa allpanpi.
Israel castakunam preso pusasqa kanqaku llaqtankumanta karullay-karuman” nispa.