Diosman kutirikunankupaq Oseaspa ruegakusqanmanta
14
Israelpa castankuna,
yupaychasqanchik Tayta Diosmanyá kutirikuychik.
Qamkunaqa huchaykichikraykum urmaykurqankichik.
2 Tayta Diosman kutikuspayá ruegakuychik.
Kaynatayá qamkunaqa niychik:
“Pampachaykuwaykuyá tukuy mana allin rurasqaykumanta.
Kuyakuywanyá chaskiykuy alabamusqaykuta.
Ofrendata hinayá chaskiykuy alabamusqaykuta.
3 Asiria tropakunaqa manam salvawankuñachu.
Guerrapaq caballoykupas manam yanapawankuñachu.
Rurasqaykutaqa manañam:
‘Diosnillayku’ nisaqkuñachu.
Dios Taytayku mana piyniyoq warmaqa
qamllapim tarinman llakipayakuytaqa.”
Israelpa castankunaqa mosoqmantaña kawsakunankumanta
4 Tayta Diosmi nin kaynata:
Ñoqam pampachasqaykichik
karunchakuwasqaykichikmanta.
Mana pipapas harkakusqanmi
kuyasqaykichik qamkunata.
Piñakuyniyqa ñam karunchakurunña qamkunamanta.
5 Israelpa castankuna,
sulla hinaraqmi kasaq qamkunapaqqa.
Amanqay hinaraqmi waytarinkichik qamkunaqa.
Libano Montepi sachakuna hinaraqmi
sapikichikpas chutarikunqa.
6 Aceitunas sachapa kallmankuna sumaqllataña
chutarikuchkaq hinaraqmi kankichik.
Libano Montepi cedro sachakuna miskillataña
asnarichkaq hinaraqmi kankichik.
7 Qamkunaqa ñoqapa llantuyniypim
huktawan kankichik.
Trigo hinaraqmi
wiñayta qallaykunkichik.
Uvas sacha hinaraqmi
sumaqllataña waytarinkichik.
Líbano Montepi vino hinaraqmi kankichik.
8 Chayraqmi Efrainpa castankunapas ninkichik:
“Manam imapas qokuwankuñachu
taytacha-mamachakunaqa” nispaykichik.
Ñoqa Tayta Diosmi
runaykunapa mañakuwasqaykichiktaqa contestasqaykichik.
Ñoqa Tayta Diosmi
runaykunataqa waqaychasqaykichik.
Kallmasapallaña cipres sacha
hinam kani qamkunapaqqa.
Ñoqapa yanapakuyllaywanmi
ruruchkaq sacha hina kankichik qamkunaqa.
Oseaspa willakuynin tukusqanmanta
9 Willakusqaytayá entiendechun
yachayniyoq runakunaqa.
Nisqaykunatayá yachachun
entiendeq runakunaqa.
Munasqanman hinam mana pantaqta
kawsachiwanchik Tayta Diosqa.
Allin ruraq runakunaqa chaynatam kawsanku.
Mana kasukuqkunam ichaqa urmarunku.