Israelpa castankunaqa pasaypaq chinkarusqankumanta
13
Efrainpa castankuna rimaptinqa
wakin ayllukunam manchakuqku.
Israel ayllukunam Efrainpa castankunataqa respetaqku.
Ichaqa Baal sutiyoq taytachata adorasqankuraykum
Efrainpa castankunaqa wañurunku.
2 Kunanpas paykunaqa
aswanraqmi huchallikuchkanku.
Qollqenkutapas chulluchispam
taytachakunata rurakuchkanku.
Munasqankuman hinam yachayllawanña
taytachakunata llaqllakuchkanku.
Paykunamantam runakuna ninku:
“Diospaq animal wañuchiy munaqkunaqa
toro taytachatayá muchachunku.”
3 Chayraykum paykunaqa kanqa
achikyamuqta chinkaruq waspiy hinalla.
Chayraykum paykunaqa kanqa
achikyamuqta chinkaruq sulla hinalla.
Paykunaqariki kanqa
eramanta wayrapa apasqan qopa hinallam.
Paykunaqariki kanqa
ventananta lloqsiq qosni hinallam.
4 Yupaychasqaykichik Tayta Diosmi ñoqaqa kani.
Egiptopi kasqaykichikmantaraqmi Diosnikichik kani.
Ñoqallam Diosqa kani.
Amam huk dioskunataqa reqsinkichikchu.
Salvaqnikichikqa ñoqallam kani.
Manam huk diosqa salvasunkichikmanchu.
5 Ñoqam chunniqpi castaykichikta waqaycharqani.
Usyaypa kasqan allpapi castaykichiktam waqaycharqani.
6 Castaykichikman mikuyta qoykuptiymi
paykunaqa saksarurqaku.
Ichaqa saksaykuspankuñataqmi
hatunchakuqllaña rikurirurqaku.
Chayraykum qonqaruwarqaku.
7 Chayraykum qamkunapaqqa
leon hinaña rikurirusaq.
Chayraykum ñanpi wateqaq
uturungu hinaña rikurirusaq.
8 Wawan chinkarachiq ukumari
hinam ñoqaqa lloqsiramusaq.
Ñoqaqa qamkunapa qasqoykichiktam llikiparusaq.
Leon hinam qamkunataqa chayllapi mikurusqaykichik.
Purun animal hinam qamkunataqa tisaparusqaykichik.
9 Israelpa castankuna,
contraypi kasqaykichikraykum
qamkunaqa chinkachkankichik.
Yanapaqnikichik kachkaptiypas
contraypi kasqaykichikraykum
chinkachkankichik.
10 Lliw yachanaykichik llaqtakunapi
salvasuqnikichik reyqa ¿maypimá kachkan?
Jefekunamantam mañakurqankichik reykunata.
Paykunamantam mañakurqankichik kamachikuqkunata.
Chay jefekunaqa ¿maypimá kachkan?
11 Piñakustinmi qorqaykichik reykunataqa.
Piñakustintaqmi qechurqaykichik paykunataqa.
12 Efrain castakunapa mana allin rurasqanqa
apuntasqam kachkan.
Efrain castakunapa huchallikusqanqa
qellqasqam kachkan.
13 Wachakuqnin warmimanqa
chayaramunñam nanayninqa.
Mana musyakuq wawa hinam kachkan
Efrain casta runakunaqa.
Manam yachanchu maman wachakuptin
maynin lloqsimuytapas payqa.
14 ¿Sepulturamantachu librasqaykichik?
¿Wañuymantachum librasqaykichik?
Yaw wañuy ¿maypitaq kachkan
wañuchiq peste onqoynikiqa?
Yaw sepultura ¿maypitaq kachkan
chinkachiq atiynikiqa?
Manañam llakipayarisaqñachu kay runakunataqa.
15 Wakin plantakunamantapas
allin ruruq planta hinam
Efrainpa castankunaqa.
Intipa qespimunan lawmantam
vientota pukurachimusaq.
Ichaqa chunniq lawmantam
vientota pukurachimusaq.
Toqyamuq yakunkupas chakirunqam.
Pukyu yakunkupas chakirunqam.
Qori-qollqenkutapas qechurachikunqakum.
Kuyayllapaq kapuqninkunatapas qechurachikunqakum.
16 Samaria llaqtayoqkunaqa culpayoqmi kachkanku.
Diosninkuta mana kasuwasqankuraykum
paykunaqa espadawan wañuchisqa kanqaku.
Wawachakunapas pampaman waqtasqam kanqaku.
Wiksayoqkunapas iskayman kakchasqam kanqaku.