2 Chay punchawkunapim ñoqa Daniel llakisqallaña kachkarqani kimsa semanapuni.

3 Manam mikurqanichu miski mikuykunatapas nitaq aychatapas.

Vinotapas manam malliykurqanichu,

miski asnaq aceitewanpas manam untakurqanichu chay kimsa semana cumplikunankama.

4 Punta kaq killapa iskay chunka tawayoq punchawninpim ñoqa kachkarqani Tigris sutiyoq hatun mayupa patanpi.

5 Altota qawarispaymi rikururqani linomanta pachayoq runata,

paypaqa weqawnin watananpas kasqa qori puromantam.

6 Paypaqa cuerponpas topacio alhaja rumi hinam kasqa,

uyanpas kasqa llipyay hina kacharichkaqmi,

ñawinkunapas kasqa lenguachkaq nina hinaraqmi,

brazonkunawan chakinkunapas lluchkay-lluchkay rurasqa bronce hinam llipipipisqa,

rimasqanpas nana-nanaq runakunapa rimasqan hinaraqmi uyarikurqa.

7 Chay revelaciontaqa ñoqallamá rikurqani,

ñoqawan kuska kaq runakunaqa manam rikurqakuchu,

paykunamanqa hatun mancharikuy yaykuruptinmi ayqekurqaku pakakunankupaq.

8 Ñoqaqa sapallaymi tarikurqani chay hatun revelacionta chaskispayqa,

uyaypas ayayaruptinmi ñoqaqa manaña kallpayoq rikurirurqani.

9 Rimasqanta uyariruspaymi qonqoranpa pampaman wichiykurqani.

10 Hinaptinmi huk maki hapiykuwaspan katkatatachkaqta tawanpaman qonqoraykachiwarqa.

11 Paymi niwarqa:

—Diospa kuyasqan Daniel,

allinta uyariy kay rimapayasqayta.

Hatariyá,

ñoqaqariki qanmanmi kachamusqa karqani —nispa.

Chay rimapayawasqanta tukuykuptinmi katkatatastin sayarirurqani.

12 Chaymi payñataq niwarqa:

—Ama manchakuychu Daniel,

qanmi Diosnikipa ñawpaqninpi sasallaña kaqkunata entiendeyta munarqanki,

paypa ñawpaqninpi humillakusqaykiraykum chay punta kaq punchawmantaraq payqa mañakusqaykita uyarispan kachamuwarqa.

13 Aswanqa Persia nacion nanachikuq angelmi harkaramuwarqa iskay chunka hukniyoq punchaw ichaqa kamachikuq angelkunamanta Miguelmi hamurqa yanapawananpaq,

payqariki hamurqa Persia nacionpa reyninkunawan sapallay qeparusqayraykum.

14 Ñoqaqariki hamurqani hamuq punchawkunapi imam llaqtamasikikuna pasananmanta willaqmi,

chay imam qanman qawachisqayqariki hamuq punchawkunapaqraqmi —nispa.

15 Chaynata rimapayawachkaptinmi pampata qawachkarqani mana rimaqña.

16 Hinaptinmi runaman rikchakuq angel qonqaymanta llapchaykuwarqa simiyta chaymi ñawpaqniypi sayaqta rimapayarqani:

—Taytáy,

chay imam qawachiwasqaykim hukmanyarachiwaspan mana kallpayoqta ruraruwan.

17 Taytáy,

eqo runallaykiqa ¿imaynataq qanwan rimayman kaynaña mana kallpayoq kachkaspayqa chaynataq samayniypas chinkaruchkaptinñaqa?

—nispa.

18 Kallpanchawananpaq chay runaman rikchakuq angel huktawan hapiykuwaspanmi

19 niwarqa:

—Diospa kuyasqan Daniel,

amayá qamqa manchakuychu nitaq hukmanyaychu,

qamqa aswan-aswanyá kallpanchakuy —nispa.

Chaynata rimapayawachkaptinmi kallpanchakuspay payta nirqani:

—Taytáy,

rimapayawayñayá ñamiki kallpanchaykuwankiña —nispa.

20 Paymi niwarqa:

—¿Yachankichum imapaqmi qanman hamusqayta?

Kunanqariki kutirisaqñam Persia nacion nanachikuq angelwan peleanaypaq,

paywan peleayta tukuruptiyñataqmi hamunqa Grecia nacion nanachikuq angel.

21 Kunanmi nisqayki cheqap kaqmanta rimaq libropi imam qellqasqa kasqanta.

Paykunawan peleaptiyqa manam pipas yanapawanchu.

Yanapaspaqa-yanapawan Israel nacion nanachikuq Miguel sutiyoq angellam.