—Hatu-hatun manchakuypaq Señor Diosnilláy,

qamqariki kasuqnikikunawan contrato rurasqaykitaqa cumplinkipunim,

cumplinkitaqmi kamachikuynikikuna kasukuqkunawan rurasqayki contratotapas.

5 Ñoqaykuqa qampa contraykipi huchallikuruspam llumpa-llumpayta mana allinkunata ruraruniku,

mana kasukuspataqmi kamachikuynikikunatapas hinaspa leynikikunatapas qepanchakuruniku.

6 Manam uyarirqanikuchu servisuqniki qanmanta willakuqkunatapas,

paykunaqariki qanmantam willakurqaku ñoqaykupa reyniykumanpas,

kamachiwaqniykumanpas,

abueloykumanpas chaynataq nacionniykupi llapallan runakunamanpas.

7 Señorllayku,

qamllam kanki tukuy imapas allin ruraqqa,

llapallan Judapa castankunam ichaqa kunan hina penqayllapi kachkaniku.

Jerusalen llaqtapi yachaqkunapas,

tukuy hinastinpi yachaq Israel castakunapas penqayllapim kachkaniku.

Qanmiki ñoqaykutaqa tukuy hinastinman cheqerachiwarqankiku qampa contraykipi hatariruspa traicionarusqaykurayku.

8 Dios Taytallayku,

ñoqaykuqariki chayna penqayllapimá kachkaniku reyniykupiwan,

kamachiqniykupiwan hinaspa abueloykupiwan,

chaynaqa kachkaniku qampa contraykipi huchallikurusqaykuraykum.

9 Ichaqa Señor Diosnillayku,

qamqariki llakipayariykuwaspaykikum huchaykutapas pampachaykunki,

ñoqaykuqariki chaykunawanmi mana kasurqaykikuchu.

10 Yupaychasqayku Dios Taytalláy,

manam ñoqaykuqa uyarirqanikuchu imam yachachiwasqaykikutapas chayman hina kawsanaykupaq,

chaykunataqa willachiwarqankiku serviqniki willakuqkunawanmi.

11 Israelpa castankunaqa llapallaykum mana kasukurqanikuchu imam yachachiwasqaykikuta hinaspam qamtaqa manataq uyariytapas munarqanikuchu chaymi ñoqaykuqa qampa contraykipi huchallikurusqaykurayku juramentaspa ñakasqaykiwan ñakasqa kachkaniku,

chaytaqariki serviqniki Moisesmi qellqarqa qosqayki yachachikuykunapi.

12 Chaynaqa qamqa ñam cumplirunkiña contraykupi Moiseswan qellqachisqaykitaqa chaynataq kamachiqniykupa contranpi qellqachisqaykitapas,

chaynapim chay hatun desgraciaqa cumplikurqa Jerusalen llaqtapi,

manam chaynaqa rurasqa karqachu haykapipas kay pachapiqa.

13 Moisespa qellqasqan yachachikuykunaman hinam kay tukuy desgraciaqa chayaramuwanku chaywanpas,

yupaychasqayku Dios Taytalláy,

ñoqaykuqa manam maskarqanikuchu qampa yanapakuynikitaqa,

manataqmi wanakurqanikuchu mana allin rurasqaykumantaqa,

cheqap kaqnikikunataqa manam uyariqpas tukurqanikuchu.

14 Chayraykum qam Tayta Diosqa kay mana allinta alistaykuspa ñoqaykuman kachaykamunki.

Yupaychasqayku Dios Taytalláy,

qamqariki tukuy imapas allin ruraqmi kanki,

ñoqaykum ichaqa niwasqaykiku uyariytapas mana munarqanikuchu.

15 Señor Diosnillayku,

hatun atiynikiwanmi runaykikunataqa horqomurqanki Egipto nacionmanta,

chaynapim qamqa anchallataña reqsichikurqanki kunankama.

Chaywanpas ñoqaykuqa huchallikuruspam mana allinta rurarqaniku.

16 Señornillayku,

allin ruraq kasqaykiman hinayá Jerusalen llaqtaykipa contranpiqa amaña piñakuyñachu nitaq rabiakuyñachu,

chay llaqtapimiki kachkan qampaq sapaqchakusqayki orqopas ichaqa huchaykuraykum hinaspa abueloykupa mana allin rurasqankuraykum chay Jerusalen llaqtamantaqa muyuriqniykupi nacionkuna burlakuchkan,

burlakuchkankutaqmi qampa runaykikunamantapas.

17 Chaynaqa Diosnillayku,

kunanyá uyariykuway kay serviqnikipa mañakullasqayta hinaspa ruegakullasqayta,

qamqa sutillaykiraykuyá favoreceykuy wak purmachisqa santuarioykita.

18 Diosnilláy,

kurkuykuspayá uyariykullaway,

ñawillaykitapas kichariykuspayá qawariykullaway,

arí kaynamá sutikiwan sutichasqa llaqtaqa purmachisqa kachkan.

Manam ñoqaykuqa mañakuchkaykiku allin rurasqaykupi confiakuspaykuchu,

ñoqaykuqariki confiakuchkaniku ancha llakipayakuq kasqaykipim.

19 Señorlláy,

qamqa uyariykuwayá,

Señorlláy,

pampachaykuwayá.

Señorlláy,

qamqa sumaqtayá uyariykuway.

Qamqa ama demoraspayá ruraykuypuni.

Diosnilláy,

qamqa kikillaykiraykuyá ama unamuychu,

Jerusalen llaqtaykiwan runaykikunaqa sutikiwan sutichasqam kachkan —nispa.

20 Yupaychasqay Tayta Diostam hinallaraq rimapayaspay mañakuchkarqani,

huchaykunatapas hinaspa llaqtamasiykunapa huchantapas paymanmi willachkarqani,

paypaq sapaqchakusqan moqopaqmá ruegakuchkarqani.

21 Chaynata mañakuchkaptiyraqmi Diosman ofrenda ofrecena tardeykuq horata ñoqapa kasqayman pawastin chayaramurqa runaman rikchakuq angel Gabriel hinaspam hapiykuwarqa,

hina paytaqmi rikuriykuwarqa chay puntallaraq revelacionniypipas.

22 Entiendechiwananpaqmi rimapayawaspan kaynata niwarqa:

—Daniel,

ñoqaqa hamurqani qamta entiendechinaypaqmi.

23 Ruegakuyta qallaykuptillaykiraqmi Diosqa uyariykusurqankiña.

Ñoqaqa hamurqani chay uyarisusqaykita qanman willanaypaqmi.

Payqariki llumpaytam kuyasunki.

Chaynaqa allinta yuyaymanaspayá chay imam qawasqaykimanta entiendenaykipaq uyariway: