Babilonia llaqta tuñichisqa kananmanta
51
Ñoqa Tayta Diosmi kaynata nini:
Babilonia llaqtapa contranpim
tuñichiq wayrata pukuchimusaq.
Leb-kamai sutiyoq llaqtapa contranpim
tuñichiq wayrata pukuchimusaq.
2 Babilonia llaqtapa contranpim
forasterokunata kachamusaq.
Erapi trigo wayrachichkaq hinam
runakunata wischuchisaq.
Manaña pipas puchunankamam
chaynata wischuchisaq.
Desgracia punchawpim
muyuriqninmanta atacachisaq.
3 Flechaqkunapas amayá armankutaqa chutarichunchu.
Qasqonku harkachinamantapas amayá alabakuchunkuchu.
Babilonia llaqtapi mozonkunataqa
ama llakipayarikuspayá wañuchiychik.
Babilonia llaqtapi llapallan soldadokunataqa
pasaypaqtayá chinkachiychik.
4 Caldea nacionpim wañusqakuna wischurayanqaku.
Lanzawan tuksipasqakunam callenkunapi wischurayanqaku.
5 Israel nacionniyoq runakunawan
Juda nacionniyoq runakunaqa
Ñoqa Tayta Diospa qayllaypim
nacionninkuta huchawan huntachirqa.
Chaywanpas yupaychasqanku ñoqa Tayta Diosqa
Israel naciontaqa manam saqerqanichu.
Chaywanpas yupaychasqanku ñoqa Tayta Diosqa
Juda naciontaqa manam saqerqanichu.
6 Babilonia llaqtamantayá
vidaykichikta salvanaykichikpaq lluptiychik.
Huchallikuqmasinku kaspa
ama castigasqa kanaykichikpaqyá ayqeychik.
Ñoqa Tayta Diospa vengakunay tiempom chayaramunña.
Ñoqa Tayta Diospa pagakunay tiempom chayaramunña.
7 Llapallan nacionkunata machachinanpaqmi
Babilonia nacionqa qorimanta vaso hina
makiypi karqa.
Llapallan nacionkunata sinkachinanpaqmi
makiypi karqa.
Chay vasomanta vinota upyaqkunam locoyarqa.
Llapa nacionkunam llumpa-llumpayta locoyarqa.
8 Qonqaymantam wichirun Babilonia llaqtaqa.
Qonqaymantam purmarun Babilonia llaqtaqa.
Chay llaqtamantayá qaparkachaychik.
Nanayninpaqyá balsamo hampita apamuychik,
icharaqpas chay llaqtata sanoyachiwaqchik.
9 Rikuqkunam ninku:
“Hampirqanikum Babilonia llaqtataqa
ichaqa manam sanoyanchu chay llaqtaqa.
Chaynaqa saqeruspayá kutikusunchik.
Sapakamayá llaqtanchikman kutikusunchik.
Huchanmanta castigasqa kasqanmi
cielokamaraq hoqarikurun.
Paypa huchanmanta castigasqa kasqanmi
puyukamaraq hoqarikurun.
10 Tayta Diosmi sentenciaspa favoreceykuwanchik.
Sion Moqo llaqtamanyá hakuchik.
Yupaychasqanchik Diospa rurasqanmantayá willakamusunchik.”
11 Tayta Diosmi Babilonia llaqtata castiganqa.
Templonta tuñirachisqanraykum vengakunqa.
Flechaykichiktayá alistakuychik.
Harkachikuna armaykichiktayá hapiychik.
Media nacionpa reyninkunatam
Tayta Dios sonqochamuchkan.
Babilonia llaqtata tuñichinankupaqmi
Tayta Dios tanteamuchkan.
12 Babilonia llaqtapa murallanta atacanaykichikpaqyá
banderata hoqariychik.
Llaqta cuidaqkunaman yapaspayá
waqaychaqkunata churaychik.
Yaykunanpaqyá wateqaq
soldadokunata alistaychik.
Tanteaspa rimasqantam
Tayta Diosqa rurarun.
Babilonia llaqtayoqkunapa
contranpim chaynata rurarun.
13 Hatun mayupa patanpi yachaqmi qamqa kanki.
Ancha qori-qollqeyoqmi qamqa kanki.
Puchukanayki tiempom chayaramunña.
Engañaspa apuyaynikim tukurunña.
14 Llapallan Kamachiq ñoqa Tayta Diosmi juraspay nini:
Enemigoykikunawanmi aqarway urukunawan
hinaraq inturachisqayki.
Paykunawanmi qampa contraykipi qayaykachachisqayki.
Tayta Diosta alabanapaq taki
15 Tayta Diosmi kay pachata
rurarqa atiyninwan.
Tukuy kay pachapi kaqtam
takyachirqa yachayninwan.
Cielokunatapas mastarirqam
ancha entiendeyninwan.
16 Rimariptinmi cielopi yakukuna
sinchillataña qaparimun.
Kay pachapa patankunamantam
puyukunata hatarichimun.
Paymi paramunanpaqpas llipyachimun.
Waqaychasqanmantam
wayrakunatapas horqomun.
17 Llapallan runakunam asno hinaña rikurirunku.
Llapallan runakunam mana yachayniyoqña rikurirunku.
Taytacha-mamacha ruraqkunam penqarikunku.
Metal chulluchisqanmantam penqarikunku.
Fundisqa taytachakunaqa engañollam rikurirun.
Mana espirituyoq kaspam engañolla rikurirun.
18 Mana imapaq valeqmi chay taytachakunaqa.
Asikuypaq hinam chay taytachakunaqa.
Pasaypaq chinkachisqam kanqaku.
Castigo punchawpim chinkanqaku.
19 Manam chaynachu Jacobpa Diosninqa.
Tukuy imapas unanchaqmi payqa.
Runankunapaqmi Israel aylluta akllakurqa.
Llapallan Kamachiq Tayta Dioswan sutichasqam payqa.
Nacionkunata Babilonia nacionwan Tayta Dios castigananmanta
20 Tayta Diosmi Babilonia nacionta nin kaynata:
Maqanay arma hinam qamqa kanki.
Guerrapi peleanay arma hinam qamqa kanki.
Qanwanmi nacionkunata maqapani.
Qanwantaqmi gobiernaqkunatapas maqapani,
21 chaynataq caballokunatawan
sillakuqnintapas
chaynataq carretakunatawan
manejaqninkunatapas.
22 Qanwanmi warmikunatawan
qarikunata maqapani.
Qawanmi machukunatawan
warmakunata maqapani.
Qanwanmi mozokunatawan
doncellakunata maqapani.
23 Maqapanitaqmi michiqkunatawan ovejankunatapas.
Maqapanitaqmi yapuqkunatawan bueyesninkunatapas.
Maqapanitaqmi gobiernaqkunatawan kamachiqkunatapas.
Babilonia llaqta castigasqa kananmanta
24 Ñoqa Tayta Diosmi nini:
Babilonia llaqtamanmi pagasaq
Sion Moqopi mana allinkuna rurasqanmanta.
Caldea nacionmanmi pagasaq
Sion Moqopi mana allinkuna rurasqanmanta.
Qayllaykichikpim pagasaq mana allinkuna rurasqanmanta.
25 Ñoqa Tayta Diosmi nini:
Nacionkuna tuñichiq orqo,
qampa contraykipim ñoqaqa kachkani.
Kay pachapi kaqkuna tuñichiq orqo,
qampa contraykipim ñoqaqa kachkani.
Atiyniytam qanman qawachisqayki.
Alto qaqamanta hinam kumpamusqayki.
Rupasqa orqota hinañam rurarusqayki.
26 Ñoqa Tayta Diosmi nini:
Wasipa esquinanpaqpas
manañam rumikitaqa hoqarinqakuñachu.
Wasipa cimientonpipas
manañam rumikitaqa churanqakuñachu.
Wiñaypaq urmaruspam
manaña kanki chaypiñachu.
27 Babilonia nacionpa contranpiyá
hoqariychik banderata.
Nacionkuna alistakunanpaqyá
tocaychik cornetata.
Chay nacionpa contranpiyá
hatarichiychik tropakunata.
Ararat nacionmantayá
tropakunata hatarichimuychik.
Mini nacionmantayá
tropakunata hatarichimuychik.
Askenaz nacionmantayá
tropakunata hatarichimuychik.
Chay tropakunapa kamachiqnintayá nombraychik.
Purmachiq aqarway urukunatapas hinaraqyá
caballopi silladakunatapas hatarichimuychik.
28 Nacionkunatayá alistaychik payta atacanankupaq.
Media nacionpi reykunatayá alistaychik atacanankupaq.
Alistaychiktaqyá gobiernaqkunatawan llapa
prefectokunatapas.
Alistaychiktaqyá munaychakusqanku llapallan
nacionkunatapas.
29 Babilonia llaqtapaq tanteasqanta
Tayta Dios rurasqanraykum
allpapas kuyuriruspa katkatatarun.
Mana runayoq hinaspa tuñichisqa kananpaqmi
Tayta Diosqa tantearun.
30 Babilonia llaqtapa valeroso soldadonkunaqa
manam peleankuñachu.
Pakakunanku sitiokunapi qeparuspam
manaña lloqsinkuñachu.
Paykunaqa kallpanku tukuruptinmi
warmikuna hinaña kachkan.
Llaqtankupi wasinkupas
kañasqañam kachkan.
Zaguanninkupa cerrojonkunapas
pakipasqañam kachkan.
31 Willakuqkunam qatinasninpi kachkanku.
Babilonia nacionpa reyninman willaqmi kallpachkanku.
Enteron llaqtan vencerachikusqanmanta
willaqmi kallpachkanku.
32 Mayupa vadonkunam dueñochakusqaña.
Soqosllaña sitiokunam kañasqaña.
Guerrapi peleaqkunam mancharikurunña.
33 Israelpa yupaychasqan ñoqa Tayta Diosmi nini,
Llapallan Kamachiq ñoqa Tayta Diosmi nini:
Sumaq Babilonia llaqtaqa
trillana tiempopi era hinam rikurirunqa.
Chayaramunñam Babilonia llaqtapa
cosechasqa hina kananqa.
34 Babiloniapa reynin Nabucodonosormi
kachuparuwaspan ñuturuwarqa.
Vacio mankata hinam
mana imayoqta payqa saqeruwarqa.
Culebra hinam millpuruwaspan
wiksanta huntarachirqa.
Gustasqan kapuqniykunata
saksaruspanmi wischuruwarqa.
35 Jerusalen llaqtapi yachaqmi nin:
Ñakarichiwasqanmantayá
Babilonia llaqtaqa ñakarichun.
Sion Moqo llaqtapi yachaqmi nin:
Runaykunata wañuchisqanpi hinayá
Caldea nacionpi yachaqkunapas wañuchun.
Israelpa castankunaman prometesqanmanta
36 Chayraykum Tayta Dios nin:
Ñoqam asuntoykimanta defiendesqayki.
Enemigoykikunata vengakuspaymi defiendesqayki.
Babilonia nacionniyoqkunapa
lamar qochantam chakirachisaq.
Babilonia nacionniyoqkunapa
pukyunkunatam chakirachisaq.
37 Babilonia llaqtaqa tuñiruspam montorayanqa.
Babilonia llaqtaqa atoqkunapa yachananñam kanqa.
Runapa manaña yachanan chunniq sitiom kanqa.
Qawaqninkunapas admirakusparaqmi burlakunqa.
38 Leonkuna hinam kuskanku qaparinqaku.
Malta leonkuna hinam qaparkachanqaku.
39 Ñoqa Tayta Diosmi kaynata nini:
Rupaypi yakunayachikuptinkum tomachisaq.
Venceqkuna hina kusikunankupaqmi sinkarachisaq.
Manaña rikchanankupaqmi wiñaypaq puñurachisaq.
40 Nakanapaq malta carnerokunata
pusachimuchkaq hinam paykunataqa pusachimusaq.
Poqosqa carnerokunatawan chivatokunata
pusachimuchkaq hinam paykunataqa pusachimusaq.
Babilonia llaqta vencesqa kananmanta
41 Sesacwan sutichasqa Babilonia llaqtaqa
¿imaynanpitaq vencesqa rikurirun?
Llapallan nacionpa alabasqan Babilonia llaqtaqa
¿imaynanpitaq dueñochakusqa rikurirun?
Wakin nacionkuna Babilonia llaqtata qawaspam
llumpayllataña mancharikurun.
42 Lamar qocha lloqsiramuspanmi pamparun.
Achkallaña olankunam Babilonia nacionta pamparun.
43 Chay nacionpi llaqtakunapas pasaypaq
chunnichisqam rikurirun.
Chaykunaqa chaki allpa manaña imapa
kananmi rikurirun.
Chay llaqtakunapiqa manañam pipas yachanqañachu.
Manañam pipas samariyllapas-samarinqachu.
44 Bel taytachatam Babilonia llaqtapi castigasaq.
Imapas millpusqankunatam ñoqaqa aqturachisaq.
Chay taytachamanqa manañam rinqakuñachu nacionkunaqa.
Babilonia llaqtapa murallankunapas tuñisqañam kanqa.
45 Runaykuna,
lloqsiychik chay llaqtamanta.
Sapakamayá libraychik vidaykichikta.
Ñoqa Tayta Diospa piñakuyniymantayá librakuychik.
Rupariq nina hina piñakuyniymantayá librakuychik.
46 Nacionpi rimaykuna kaptinqa
amayá hukmanyaychikchu.
Nacionpi rimaykuna kaptinqa
amayá manchakuychikchu.
Sapa watam hukta-hukta rimanqaku.
Kay nacionpi ñakariy kananmantam rimanqaku.
Gobiernaqkunapura peleanankumantam rimanqaku.
47 Chaynaqa hamuchkanmi punchawkuna
Babilonia llaqtapi taytachakunata castiganaypaq.
Chaynaqa hamuchkanmi punchawkuna
enteron nacionpuni penqaypi rikurinanpaq
chaynataq llapallan ayankunapas
llaqtapi wischurayananpaq.
48 Ñoqa Tayta Diosmi kaynata nini:
Cielokunapi kaqkunam kusikuywan qaparinqa
Babilonia llaqta vencesqa kaptin.
Kay pachapi kaqkunapas tukuy imantinmi
kusikunqa chay llaqta vencesqa kaptin.
Chaykunamá kusikuywan qaparinqa
norte lawmanta tuñichiqkuna hamuptin.
49 Babilonia runakunam
enteron kay pachapi runakunata wañuchirqaku.
Babilonia llaqtam vencesqa kanqa
Israel casta runakunata wañuchisqanrayku.
Babiloniapi kaq Israel castakunapaq willakuymanta
50 Guerramanta lluptiqkunaqa
ama sayaykuspayá ripuychik.
Karupiña kaspaykichikpas
Tayta Diosmantayá yuyariychik.
Karupiña kaspaykichikpas
Jerusalen llaqtamantayá yuyaymanaychik.
51 Qamkunam ninkichik:
“Tratawasqankuta uyarispaykum
hatun penqaypi kachkaniku” nispa.
“Tayta Diospa templonpi santuariokunaman
forasterokuna yaykusqanmantam
penqakuyllawanña kachkaniku” nispa.
52 Chaynaqa hamuchkanmi punchawkuna
Babilonia llaqtapa taytacha-mamachankunata castiganaypaq.
Chaynaqa hamuchkanmi punchawkuna
enteron nacionpi heridokuna
‘ay,
ay’ ninanpaq.
53 Babilonia llaqtaqa cielokamaña hatarichisqa kaptinpas,
amparakunan sitiokunata alto-altota ruraptinpas
ñoqam tuñichiqkunata kachamusaq chaykamapas.
Chaynatam ñoqa Tayta Dios nini.
Babilonia llaqtata tuñichisqankumanta
54 Babilonia llaqtamantam qapariyllaña
uyarikamuchkan.
Caldea nacion tuñirusqanmantam qapariyllaña
uyarikamuchkan.
55 Tayta Diosmi Babilonia llaqtata tuñichichkan.
Ancha qapariyninkutam upallachichkan.
Enemigonkunam achka yakupa olankuna hinaraq
qaparimuchkan.
Enemigonkunam lamar qocha choqakamuchkaq hinaraq
qaparimuchkan.
56 Babilonia tuñichiqkunam hamurunku.
Paypa tropankunatam presocharunku.
Paykunapa flechanantam pakiparunku.
Rurasqankuman hina pagaqmi Tayta Diosqa.
Chayraykum paykunaman chaynata paganqa.
57 Llapallan Kamachiq sutiyoqmi kaynata nini,
ñoqa Rey Tayta Diosmi kaynata nini:
Babilonia llaqtapi kamachikuqkunatawan
yachaysapakunatam sinkachisaq.
Gobiernaqkunatapas,
prefectokunatapas,
valeroso soldadokunatawanmi sinkachisaq.
Wiñaypaqmi manaña rikchanankukama
paykunata puñuchisaq.
58 Llapallan Kamachiq Ñoqa Tayta Diosmi nini:
Babilonia llaqtapa rakta-rakta murallankunatam
pasaypaqta pampayachinqaku.
Babilonia llaqtapa hatun zaguan punkunkunatam
kañaykunqaku.
Yanqapaqmi llamkaqkunapas hatarichirqaku.
Nina tukurunanpaqmi yanqapaq pisiparqaku.
Babilonia llaqtapi kaqkunaman Jeremiaspa willachimusqanmanta
59 Juda nacionpa reynin Sedequias tawa watamanña gobiernachkaptinmi payta Babilonia llaqtaman pusarqaku Seraiastawan kuskata.
Seraiasqa karqa Neriaspa churinmi otaq Maasiaspa willkanmi.
Seraiasqa karqa tropakunapa imankunamantapas nanachikuqmi.
Kay Seraiastam Diosmanta willakuq Jeremias kunarqa.
60 Babilonia llaqtapa contranpi castigokuna hamunanmantam Jeremias qellqarqa libropi,
chay llaqtapa contranpi qellqaruspanñam
61 Seraiasta nirqa:
—Babilonia llaqtaman chayaspaykim kay libropi tukuy qellqasqa kaqta leenki
62 hinaspam ninki:
“Dios Taytalláy,
kay llaqtata chinkachinaykipaqmi rimarqanki chaynapi manaña runayoq,
manaña animalniyoq wiñaypaq chunninanpaq” nispa.
63 Kay libro leeyta tukuruspaykiñataqmi kay libroman rumita watarunki hinaspam Eufrates Mayupa chawpinman wischuykunki.
64 Chaymantañataqmi ninki:
“¡Kaynatam Babilonia llaqtaqa chinkarunqa!
Tayta Diospa castigo kachamusqanwan tuñiruspanmi manaña mastaqa hatarinqañachu” nispa.
Kaypim tukun Jeremiaspa rimasqankuna.