Babilonia llaqta vencesqa kananmanta
50
Tayta Diosmi paymanta willakuq Jeremiasman rimapayaspan Babilonia llaqtapa chaynataq Caldea law runakunapa contranpi kaynata nirqa:
2 Willakuychik llapallan nacionkunaman.
Yachayta qoychik chay nacionkunaman.
Banderata hoqarispayá qapariychik.
Mana upallaspayá kaynata niychik:
“Babilonia llaqtaqa vencesqañam rikurirun.
Bel sutiyoq taytachankupas penqaypiñam rikurirun.
Marduc sutiyoq taytachankupas ñutupasqañam kachkan.
Taytacha-mamachankupas penqaypiñam kachkan.
Mana valeq taytacha-mamachankunapas ñutupasqañam kachkan.”
3 Norte law nacionmantam
Babilonia llaqtapa contranpi hamuchkanku.
Paykunaqa Caldea nacionpi llaqtakunatam purmachinqaku.
Runakunapas manaña kanankamam purmachinqaku.
Animalkunapas manaña kanankamam purmachinqaku.
Llapallankum chay llaqtakunamanta lloqsispa cheqerunqaku.
Israelpa mirayninkuna Tayta Diosman kutirikunankumanta
4 —Ñoqa Tayta Diosmi nini:
Chay tiempokunapim Israel casta runakunapiwan Juda casta runakuna waqastin maskawanqaku yupaychasqanku ñoqa Tayta Diosta.
5 Sion Moqopi llaqtaman riq ñanmantam tapukunqaku hinaspam chay llaqta lawman qawarispanku ninqaku:
“Hakuchik Tayta Diosman.
Wiñaypaq contratota ruraspayá payman hukllawakamusunchik.
Chay contratoqa manam haykapipas qonqasqachu kanqa” nispa.
6 —Runaykunaqa chinkasqa ovejakuna hinam karqaku,
michiqninkunam ñanmanta pantarachispa orqokunapi cheqesqata saqerurqaku.
Orqon-orqon purispankum kanchankutapas qonqarurqakuña.
7 Pipas tariqninqa mikuruqmi chaymi chay enemigonkunapas niqku:
“Manam ñoqanchikpaqa huchanchikchu.
Paykunaqa Tayta Diospa contranpim huchallikururqaku.
Mikunanku pasto hinam Tayta Diosqa karqa,
abuelonkupa confiakunanmi payqa karqa” nispa.
8 Babilonia llaqtamantayá lluptiychik.
Caldea nacionmantayá lloqsiychik.
Ganadowan riq chivato hinayá puntaychik.
9 Norte lawmantam achkallaña huñunasqa
nacionkunawan atacachisaq.
Babilonia llaqtatam chay lawmanta
atacachispay vencerachisaq.
Paykunaqa flechakunawan allin peleaq soldadokunam.
Paykunaqa flechaspapas hapichiqpuni soldadokunam.
10 Ñoqa Tayta Diosmi kaynata nini:
Caldea nacionpi runakunamantam suwanqaku.
Aminankukamam suwasqankuta apanqaku.
Babilonia llaqta tuñichisqa kananmanta
11 Caldea nacionpi kaq runakuna,
runaykunamanta suwakuq runakuna,
llullu pastopi kallpakachaq vaquilla hinam
pawaykacharqankichik.
Kallpasapa caballokuna hinam
weqeqeqerqankichik.
Chaynatam qamkunapas anchallataña
kusikurqankichik.
12 Mamaykichik hina Babilonia nacionqa
penqakuyllawanñam kanqa.
Wachakusuqniki hina
llaqtaykiqa penqaypim kanqa.
Wakin nacionkunamantapas
aswan qepallapiñam rikurirunqa.
Mana yakuyoq kaspanmi
manaña imayoq chunninqa.
13 Ñoqa Tayta Dios piñakurusqayraykum
manaña runayoq chunninqa.
Ñoqa Tayta Dios piñakurusqayraykum
pasaypaq purmasqa rikurirunqa.
Babilonia llaqtanta puriqkunam
hukmayasqallaña qawanqaku.
Babilonia llaqtanta puriqkunam
castigasqayta qawarispa burlakunqaku.
14 Llapallan flechaqkunaqa
Babilonia llaqtapa muyuriqninpiyá churakuychik.
Babilonia llaqtapa contranpiyá
mana samaykuspa flechaykichikta flechaychik.
Ñoqa Tayta Diospa contraypi
huchallikusqankuraykuyá flechaychik.
15 Tukuy muyuriqninmantayá
guerrapi qapariyta qapariychik.
“Babilonia llaqtaqa vencesqañam”
nispayá qapariychik.
Torrenkunapas wichisqañam kachkan.
Murallankunapas taqmasqañam kachkan.
Ñoqa Tayta Diospa pagasqayman hinayá vengakuychik.
Paykunapa rurasqanman hinayá paykunawan ruraychik.
16 Babilonia lawpi tarpuqkunatayá wañuchiychik.
Cosechapi rutuna hapiqkunatayá wañuchiychik.
Forasterokunata ñakarichiq runakunam
guerrapi wañunqaku.
Chayraykum forasterokunaqa nacionninkumanña kutikunqaku.
Sapakamam maymi kasqanku nacionman lluptikunqaku.
Israel casta runakuna kutimunankumanta
17 —Leonkuna qatikachaptin cheqerachisqa ovejakuna hinam Israel casta runakunaqa.
Puntatam ovejata leon mikuchkaq hina Asiria nacionpi rey paykunata mikururqa.
Paypa qepantañataqmi ovejapa tullunta kachuchkaq hina Babilonia nacionpa reynin Nabucodonosor paykunata tukururqa.
18 Chayraykum Israelpa yupaychasqan Llapallan Kamachiq ñoqa Tayta Dios nini:
Asiria nacionpa reynin castigasqayta hinam Babilonia nacionpa reynin Nabucodonosortapas chaynataq nacionnintapas castigasaq.
19 Israel casta runakunataqa kutichimusaq ovejakunata mikunan pastokunaman kutichimuchkaq hinam hinaptinmi Carmelo Orqopi,
Basan lawpi,
Efrain orqokunapi chaynataq Galaad lawpi saksanankukama mikunqaku.
20 Ñoqa Tayta Diosmi nini:
Chay tiempokunapiqa Israel nacionpa mana allin rurasqankuta maskaptinkupas manam kanqañachu,
Juda nacionpa huchankunata maskaspankupas manam tarinqakuñachu.
Puchuchisqay runakunapa huchantaqa ñoqam pampachasaq.
Babilonia llaqta vencesqa kananmanta
21 aMerataim llaqtatayá atacamuychik.
bPecod llaqtayoqkunatayá atacamuychik.
Pasaypaqtayá paykunataqa ñoqapaq tukumuychik.
Ñoqapa tukuy kamachisqayta hinayá ruraychik.
Ñoqa Tayta Diosmi chaynata nini.
22 Peleaqkunapa qapariynintam
lliw nacionpi uyarichkanku.
Mancharikuypaq hatun desgraciamantam
uyarichkanku.
23 Martilloman rikchakuq Babilonia nacionqa
llapallan naciontam tuñichirqa.
¡Chay martilloqa kuchusqa
hinaspa pakisqam rikurirunqa!
24 Yaw Babilonia llaqta,
contraykipim toqllata hina churaruni.
Mana musyakustin wichiykunaykipaqmi churaruni.
Ñoqa Tayta Dioswan churanakusqaykiraykum
hapirachikunki.
Ñoqa Tayta Dioswan churanakusqaykiraykum
presocharachikunki.
25 Ñoqa Tayta Diosmi armaykuna waqaychana wasita kicharuni.
Piñakuyniywan castiganaypaqmi armaykunata horqoramuni.
Llapallan Kamachiq ñoqa Señor Diosmi chaynataqa rurani.
Caldea nacionpa contranpim chaynataqa rurani.
26 Tukuy hinastinmanta hamuspayá atacaychik.
Kawsaykuna huñunankutayá kicharuychik.
Qechusqaykichiktayá kawsayta hina montoychik.
Mana puchunankupaqyá pasaypaqta purmachiychik.
27 Novillonkunata sipichkaq hinayá
soldadonkunata sipiychik.
Nakana sitioman pusachkaq hinayá
runankunata pusaychik.
¡Imaynaraq kanqaku paykunaqa!
Castiganay punchawmi chayaramun.
¡Imaynaraq kanqaku paykunaqa!
Castiganay tiempom chayaramun.
28 —Babilonia llaqtamanta lluptiramuspa Sion Moqo llaqtaman chayamuqkunapa willakusqantayá uyariychik.
Paykunam willakunku yupaychasqanku ñoqa Tayta Diospa castigasqaymanta otaq temploy tuñichiqkunata vengakusqaymanta.
29 Paykunam ninku:
“Flechawan llapallan peleaqkunatayá qayamuychik.
Babilonia llaqtata atacanankupaqyá qayamuychik.
Chay llaqtapa muyuriqninpiyá
campamentota sayachiychik.
Mana pipas chay llaqtamanta
lluptinankupaqyá harkaychik.
Rurasqanman hinayá
chay llaqtamanqa pagaychik.
Paykunaqa Tayta Diospa
contranpim hatunchakurqaku.
Israelpa yupaychasqan Chuya Diospa
contranpim hatunchakurqaku.”
30 Ñoqa Tayta Diosmi kaynata nini:
Chayraykumá chay punchawpiqa plazankunapipas
chutarayanqa chay llaqtayoq mozokuna.
Chayraykumá chay punchawpiqa
wañuruspa upallarunqaku llapallan soldadonkuna.
31 Llapallan Kamachiq ñoqa Señor Diosmi kaynata nini:
Contraypi hatunchakuq nacion,
contraykipim kachkani.
Qamkuna castiganay punchawmi chayaramun.
Qamkuna castiganay tiempom chayaramun.
32 Hatunchakuq kasqaykiraykum mitkaruspa urmarunki.
Manam pipas kanqachu hatarichisuqniki.
Chay nacionpi kaq llaqtakunatam kañaykusaq.
Lliw muyuriqnikipi kaqkunatam ruparachisaq.
33 Llapallan Kamachiq Tayta Diosmi nin kaynata:
—Israel nacionniyoq runakunawan Juda nacionniyoq runakunam ñakarichisqa kachkanku.
Enemigonku presocharuspam manaña kachaykuyta munankuchu.
34 Paykuna reclamaqmi ichaqa ancha atiyniyoq kani.
Ñoqapa sutiyqa Llapallan Kamachiq Tayta Diosmi.
Ñoqam paykunataqa defiendesaqpuni.
Chay nacionta hawkayachispaymi Babilonia nacionpi yachaqkunatañataq katkatatachisaq.
35 Ñoqa Tayta Diosmi nini kaynata:
Caldea runakunapa contranpiyá peleamuychik.
Babilonia llaqtayoqkunapa contranpiyá peleamuychik.
Peleamuychiktaqyá chaypi kamachiqkunapa contranpipas.
Peleamuychiktaqyá chaypi kaq yachaysapakunapa contranpipas.
36 Locoyanankukamayá
willakuq tukuqkunapa contranpi peleamuychik.
Mancharikunankukamayá
valeroso soldadokunapa contranpi peleamuychik.
37 Caballonkunapa chaynataq carretankunapa
contranpiyá peleamuychik.
Paykuna ukupi kaq contratasqanku soldadokunapa
contranpiyá peleamuychik.
Warmi hinaña kanankukamayá
paykunawan peleamuychik.
Qori-qollqenkupas suwasqam kanqa peleamuptikichik.
38 Mayunkunatapas chakirachiptikichikmi chakirunqa.
Taytacha-mamachakunapa kananmi Babilonia nacionqa.
Manchakuypaq taytacha-mamachakunapa locoyachisqanmi
chay nacionqa.
39 —Chayraykum chay llaqtapiqa yachanqa purun animalkunawan atoqkunaña chaynataq avestruz sutiyoq animalkunaña.
Chaypiqa wiña-wiñaypaqmi manaña pipas yachanqachu.
40 Ñoqa Tayta Diosmi nini:
Sodoma,
Gomorra chaynataq muyuriqninpi llaqtakuna hinam Babilonia llaqtaqa manaña runayoq kanqa,
manañamá chaypiqa samariyllapas-samarinqakuchu.
41 Norte law nacionkunamantaraqmi tropakuna hamuchkan.
Hatun nacionmantaraqmi tropakuna hamuchkan.
Kay pachapa cantonmantaraqmi nana-nanaq reykuna hatarimuchkan.
42 Flechanankutawan lanzankutam hapinqaku.
Pasaypaq mana llakipayakuqmi kanqaku.
Lamar qochapa qaparisqan hinaraqmi qaparinqaku.
Caballokunapi sillasqam hamuchkanku.
Babilonia llaqtayoq runakuna,
contraykichikpim
peleanankupaq churakamuchkanku.
43 Babilonia nacionpa reyninmi chay noticiata uyarirun.
Makinkunapas manaña kallpayoqmi warkurayarun.
Payqa llakikuywanraqmi hapirachikun.
Wachakuywan ñakariq warmi hinam rikurirun.
44 —Jordan Mayupa patan montemanta pastokunapa kasqanman lloqsichkaq leon hinam chay sitiomanta Babilonia nacionniyoq runakunata qonqaymanta lloqsichisaq.
¿Pitaq kanqa chayta rurananpaq akllasqay runaqa?
¿Pitaqsi ñoqa hinaqa kanman?
¿Pitaqsi ñoqawanqa churanakunman?
Oveja michiqkunamantaqa ¿mayqennintaq contraypi sayanman?
45 Chaynaqa Babilonia llaqtapa contranpi piensasqaytawan Caldea nacionpa contranpi tanteasqaytayá uyariychik:
Cheqaptapunim oveja uñachakunatapas qachachyanqaku,
purmarachinqakutaqmi michinanku pastollaña waqtakunatapas.
46 Babilonia llaqtata pasaypaqta venceruptinkum allpapas katkatatanqaraq,
qaparisqankupas wakin nacionkunamanraqmi uyarikunqa.