Runakunapaq Tayta Diospa prometesqanmanta
30
Tayta Diosmi Jeremiasta rimapayaspan nirqa:
2 —Israelpa yupaychasqan ñoqa Tayta Diospa tukuy nisqaykunatayá libropi qellqay:
3 “Hamuchkanmi tiempo Israel castamanta chaynataq Juda castamanta runaykunata preso pusasqa kasqankumanta kutichimunaypaq.
Ñoqa Tayta Diosmi nini:
Paykunataqa dueñochakunankupaqmi kutichimusaq abuelonkuman qosqay allpaman” nispa.
4 —Israel castakunaman chaynataq Juda castakunaman Tayta Diospa rimasqankunaqa kaynam.
5 Ñoqa Tayta Diosmi nini:
Mancharikuqkunapa qaparisqanmi uyarikuchkan.
Mana hawka kaqkunapa mancharikusqanmi uyarikuchkan.
6 Tapukamuspa yachamuychik sumaqta:
¿Qariqa wachakunmanchum wawata?
¿Imanasqataq qarikunata qawani
wachakuchkaq warmikuna hina
wiksanku hapikuqta?
¿Imanasqataq qarikunata qawani
wachakuchkaq warmikuna hina
uyankupas ayayarusqata?
7 ¡Ay ancha mancharikuypaq
punchawkunam hamuchkan!
¡Ay mana igualay atina
punchawkunam hamuchkan!
Jacob casta runakunapaqmi
sasachakuy tiempo kanqa.
Chaywanpas paykunaqa
chaykunamanta librasqam kanqa.
8 Llapallan Kamachiq ñoqa Tayta Diosmi nini:
Chay punchawkunapim yugomanta
kacharichkaq hina librasqaykichik.
Yugopa coyundanta
tipichkaq hinam librasqaykichik.
Huklaw nacionniyoqkunata
manaña servinaykichikpaqmi
librasqaykichik.
9 Yupaychasqaykichik ñoqa Tayta Diostañam
serviwankichik.
Reynikichikpaq churasqay Davidtam
servinkichik.
Runankunata Tayta Dios salvananmanta
10 Ñoqa Tayta Diosmi nini:
Serviqniy Jacobpa castankuna,
qamkunaqa amayá manchakuychikchu.
Israelpa miraynin runakuna,
qamkunaqa amayá hukmanyaychikchu.
Karu nacionkunamantam libramusqaykichik.
Miraynikichiktawan kuskatam libramusqaykichik.
Preso risqaykichik nacionmantam libramusqaykichik.
Jacob castakunaqa kutikamuspaykichikmi
hawkaña kawsakunkichik.
Manaña pipapas manchachisqanmi
hawkaña kawsakunkichik.
11 Ñoqa Tayta Diosmi nini:
Qamkunataqa salvasqaykichikmi ñoqaqa.
Cheqerachiptiymi nacionkunapi
kankichik qamkunaqa.
Ñoqapunim chinkarachisaq
chay llapallan nacionkunataqa.
Chaywanpas manam chinkachisqaykichikchu qamkunataqa.
Faltaykichikmantaqa corregisqaykichikmi qamkunataqa.
Manam lluptinkichikchu ñoqapa castigoymantaqa.
12 Tayta Diosmi kaynata nin:
Manaña hampiy atinam heridaykiqa.
Manaña remedioyoqmi onqoynikiqa.
13 Manañam pipas nanachikusuqnikiqa kanchu.
Heridayki hampiykuqqa manañam pipas kanchu.
Sanoyachisunaykipaq remediopas manañam kanchu.
14 Kuyaqnikikunaqa manañam yuyasunkiñachu.
Qanmantaqa manañam tapukunkupasñachu.
Mana allinllataña rurasqaykiraykum
enemigoyki hina castigarqayki.
Huchaykikuna achkallaña kasqanraykum
llumpayllataña corregirqayki.
15 ¿Imanasqataq heridaykirayku qaparinki?
Manaña hampiy atinam qampaqa nanayniki.
Mana allin rurasqaykiraykum
rurarqayki chaynataqa.
Achkallaña huchaykikuna kasqanraykum
rurarqayki chaynataqa.
16 Mikuchkaq hina tukusuqniki runakunaqa
tukusqam kanqaku.
Llapallan contraykipi kaqkunaqa
preso pusasqam kanqaku.
Saqueasqam kanqaku saqueaqnikikunaqa.
Qechusqam kanqaku qechusuqnikikunaqa.
17 Ñoqa Tayta Diosmi nini:
“Sion Moqopi llaqtaqa
wischusqañam” niptinkupas,
“Manañam pipas nanachikunchu” niptinkupas
qamtaqa sanoyachisqaykim.
Heridaykikunamantaqa hampisqaykim.
18 Tayta Diosmi kaynata nin:
Jacob casta runakunapa yachanantam favorecesaq.
Paykunapa yachanankunamantam llakipayarikusaq.
Tuñirusqan sitiopim llaqtapas hatarichisqa kanqa.
Palaciopas maymi kasqanpim hatarichisqa kanqa.
19 Chaypi yachaqkunam agradecekuwaspanku takinqaku.
Runakunam anchallaña kusikuymanta qaparinqaku.
Paykunata achkayachiptiymi manaña pisinqakuchu.
Ancha reqsisqata ruraptiymi manaña humillachinqakuchu.
20 Ñawpaq watakunapi hinam kanqa mirayninkupas.
Ñoqapa qayllaypim takyanqa huñunasqa runankunapas.
Ñoqapa castigasqaymi kanqa ñakarichiqninkunapas.
21 Ñoqa Tayta Diosmi nini:
Paykunamantam kanqa pusaqninku.
Kikillankumantam kanqa gobiernaqninku.
Asuykachiptiymi pay asuykamuwanqa.
¿Pitaq asuykuwanman kikillanmantaqa?
22 Qamkunam runaykuna kankichik.
Ñoqañataqmi kasaq Diosnikichik.
23 Sinchi wayra hinaraqmi
Tayta Diospa piñakuyninqa.
Muyuq wayra hinaraqmi
Tayta Diospa piñakuyninqa.
Mana allin ruraqkunapa contranpim
kachkan paypa piñakuyninqa.
24 Tayta Diospa sinchi piñakuyninqa
manam taninqachu.
Imam rurananta ruranankamam
mana taninqachu.
Imam piensasqanta cumplinankamam.
mana taninqachu.
Hamuq punchawkunapim
kaykunataqa entiendenkichik.
Chay tiempopim
imam kaqta entiendenkichik.