Manka ruraqwan hinaspa mituwan rikchanachiymanta
18
Tayta Diosmi ñoqa Jeremiasta niwarqa:
2 —Manka ruraqpa wasinta riptikim chaypi willamusqayki imam ninayta —nispa.
3 Chaymi manka ruraqpa wasinta chayaruptiy payqa ruedapa hawanpi mankata rurachkasqa.
4 Ichaqa chay manka ruraqpa rurasqan mankam hukman llosirurqa chaymi munasqanman hina mosoqmantaña rurarqa.
5 Chaymi Tayta Dios niwarqa:
6 —Israel castakuna ¿manachum chay manka ruraq hina qamkunawanpas munasqayta rurayman?
Manka ruraqpa makinpi mitu hinam qamkunapas makiypi kachkankichik.
Ñoqa Tayta Diosmi chaynata nini.
7 Tanteasqay horapim rimarisaq mayqan naciontapas otaq mayqan gobiernotapas plantata pilachkaq hina puchukachinaypaq,
tuñichinaypaq chaynataq chinkarachinaypaq.
8 Chaywanpas sichu chay anyasqay nacionpi runakuna mana allinkuna rurasqankumanta wanakuptinkuqa,
chay castiganaypaq tanteasqay castigotam manaña kachamusaqchu.
9 Tanteasqay horapiqa rimarisaqtaqmi mayqan naciontapas otaq gobiernotapas hatarichinaypaq chaynataq plantachkaq hina takyachinaypaq.
10 Chaywanpas sichu chay nacionpi runakuna mana allinkunata ruraspanku willasqaykunatapas mana kasukuptinkuqa manam favorecesaqchu chay tanteasqay kaqkunawanpas.
11 —Kunanyá Juda nacionpi runakunatawan Jerusalen llaqtapi yachaqkunata nimuy:
“Ñoqa Tayta Diosmi contraykichikpi piensaspa castiganaypaq tanteachkani.
Chaynaqa sapakamayá mana allin kawsasqaykichikmanta wanakuspa vidaykichiktawan ruraynikichikta allichaychik.”
12 Chaywanpas paykunaqa kaynatam nisunki:
“Yanqañam chay niwasqaykikuqa.
Tanteasqaykuman hinam ñoqaykuqa kawsakusaqku,
mana kasukuq sonqoykupa munasqantam sapakama rurakusaqku” nispa.
13 Chayraykum Tayta Dios nin:
Nacionkunapiyá tapukamuychik runakunata
¿Pitaq uyarirqa chaykunata?
Sumaq doncellawan tupachisqa Israel runakunam
rurarunku manchakuypaqta.
14 ¿Huk kutillaqa Libano alto orqopi
riti chinkarunmanchum?
¿Huk kutillaqa karumanta kallpamuq
chiri yaku chakirunmanchum?
15 Runaykunam ichaqa ñoqata qonqaruwanku.
Taytacha-mamachakunamanñam inciensota kañanku.
Chay runapa pantarachisqanñam kachkanku.
Ñawpaq tiempopi kawsasqankumantam pantarachin.
Purisqankupim paykunataqa urmarachin.
Mana purinanku ñankunamanñam pantarachin.
16 Chayraykum allpankupas
chunniq allpaña kanqa.
Chayraykum allpankupas tukuy tiempo
asipayanaña kanqa.
Chayninta puriqkunam admirakunqaku.
Umankutaraqmi kusikuymanta kuyuchinqaku.
17 Israel casta runakunataqa
enemigonkunapa qayllanmantam cheqerachisaq.
Intipa qespimunan lawmanta
pukumuq wayrata hinam cheqerachisaq.
Desgraciapi rikuriptinkum
manaña qawarispay qepanchakurusaq.
Jeremiaspa contranpi rimanakusqankumanta
18 Chay runakunam ninakurqaku:
—Hakuchikyá Jeremiaspa contranpi tanteanakamunanchikpaq.
Manam faltanqachu Diosmanta yachachiqninchik sacerdotekunaqa nitaq consejaqninchik yachayniyoq runakunapas nitaq Diosmanta willakuqkunapa palabrankunapas.
Acusamuspayá ima rimasqantapas ama kasusunchikchu —nispa.
Tayta Diosta Jeremias mañakusqanmanta
19 Dios Taytalláy,
atiendeykuwayá ñoqallayta.
Dios Taytalláy,
uyariykuyá enemigoykunapa nisqanta.
20 ¿Paykunapaq rurasqaymantachu,
allinnninkupaq rurasqaymantachu
mana allinwan pagawanqaku?
¿Manachum sepulturaytaraq toqochkanku?
Yuyariyá qayllaykipi
favorninkupi rimasqayta.
Yuyariyá piñakuynikita
amachanaypaq mañakusqayta.
21 Chaynaqa churinkunatayá
yarqaymanta wañuchiy.
Chaynaqa espadawanyá
paykunata wañuchiy.
Warminkutapas manaña wawayoqtayá ruray.
Paykunataqa manaña qosayoqtayá ruray.
Qarikunapas peste onqoywanyá wañuchunku.
Mozokunapas guerrapi peleaspayá wañuchunku.
22 Hapiwanankupaq allpata uchkurusqankuraykuyá
salteaqkunata qonqaymanta kachaykuy
chaynapi wasinkupipas qaparisqanku uyarikunanpaq.
Chakiykunapaq toqllakunata churarusqankuraykuyá
salteaqkunata qonqaymanta kachaykuy
chaynapi wasinkupipas qaparisqanku uyarikunanpaq.
23 Dios Taytalláy,
qamqa yachankim contraypi tukuy rimasqankuta,
wañuchiwanankupaq tukuy piensasqankuta.
Mana allin rurasqankutaqa
amayá pampachaychu.
Qayllaykipi huchallikusqankutaqa
amayá pampachaychu.
Qayllaykipiyá urmachiy paykunataqa.
Piñakusqayki tiempopiyá ruray chaynataqa.