Huchallikusqankurayku Juda nacion castigasqa kananmanta
17
Juda nacionniyoq runakunapa huchallikusqanqa
yuyasqam kachkan.
Fierropa puntanwan hinam
chaykunaqa qellqasqa kachkan.
Nina rumipa puntanwan hinam
chaykunaqa qellqasqa kachkan.
Tablapi qellqasqa hinaraqmi
sonqonkupi kachkan.
Altarninkupa esquinankunapim
qellqasqa kachkan.
2 Rapisapa sachakunapa hichpanpi,
alto moqokunapa puntanpi
altarninkumantam churinkupas yuyarinku.
Rapisapa sachakunapa hichpanpi,
alto moqokunapa puntanpi
Asera sutiyoq mamachakunamantam yuyarinku.
3 Chakrapi orqokunaman riqkunatam nikichik:
“Enteron nacionnikichikpim
capillakunapi huchallikurqankichik.
Qori-qollqekichiktawan
tukuy kapuqnikichiktam saqueachisqaykichik.
4 Herenciaykichikpaq allpa qosqaytam
mana tarpuspa saqenkichik.
Mana reqsisqaykichik nacionpim
enemigoykichikta servichimusqaykichik.
Wiñaypaq rupaq ninata hinaraq
piñachiwasqaykichikraykum servichimusqaykichik.”
Wakin willakuykunamanta
5 Tayta Diosmi kaynata nin:
Ñoqamanta rakikuspa runamasillanpi
hapipakuq runaqa ñakasqayá kachun.
Ñoqamanta rakikuspa runapa kallpallanpi
hapipakuq runaqa ñakasqayá kachun.
6 Chay runaqa kanqa
chunniqpi wiñaq sacha hinam.
Chay runaqa kawsanqa
taqrapi wiñaq sacha hinam.
Qollpa allpapi
wiñaq sacha hinam payqa kanqa.
Mana pipapas yachanan allpapi
wiñaq sacha hinam payqa kanqa.
7 Ñoqa Tayta Diospi hapipakuq runaqa
bendecisqam kanqa.
Ñoqa Tayta Diospi confiakuq runaqa
bendecisqam kanqa.
8 Chayna runaqa kanqa
yakupa hichpanpi plantasqa sacha hinaraqmi.
Chayna runaqa kanqa
yakupa patanpi sapichakuq sacha hinaraqmi.
Payqa kanqa rupay tiempopipas
verdey-verdey rapisapa sacha hinaraqmi.
Usyay tiempopipas qali-qali sacha hinaraqmi
payqa kanqa.
Tiempollanpi mana tipispa ruruq sacha hinaraqmi
payqa kanqa.
9 Tukuy imamantapas engañakuqllañam
runapa sonqonqa.
Mana hampiy atinañam
runapa sonqonqa.
¿Pitaqsi reqsinman runapa sonqontaqa?
10 Ñoqa Tayta Diosllam
runakunapa piensasqantaqa yachani.
Ñoqa Tayta Diosllam
runakunapa sonqontapas pruebani
chaynapi kawsasqankuman hina
sapakamam paganaypaq,
chaynapi rurasqankuman hina
sapakamaman paganaypaq.
11 Mana runtusqan oqllaq yutumanmi
rikchakun engañowan apuyaq runaqa.
Manaraq machuyachkaptinmi
qori-qollqenqa payta saqerunqa.
Wañukunan hichpaqa
sonso runañam rikurirunqa.
12 Santuarionchikpa kasqan sitioqa
qallariyninmantapuni alto-alto sitiom.
Santuarionchikpa kasqan sitioqa
reypa kancharichkaq tiyanan sitiom.
13 Israelpa hapipakunan Dios Taytalláy,
pipas saqerusuqnikiqa penqaypim rikurinqa.
Qam Tayta Diosmi ninki:
Ñoqamanta rakikuq runakunaqa
allpapi qellqasqa suti hinam chinkarunqa.
Qam Tayta Diosta saqerususqaykiraykum chinkarunqaku.
Kallpaq yaku hina kachkaptiki
saqerususqaykiraykum chinkarunqaku.
Tayta Diosta Jeremias mañakusqanmanta
14 Dios Taytalláy,
hampiykuwaptikiqa sanoyasaqmi.
Dios Taytalláy,
salvaykuwaptikiqa salvakusaqmi.
Qamqariki kanki ñoqapa alabanaymi.
15 Niwachkankum runakunaqa:
¿Imataq pasarun Tayta Diospa nisqantaqa?
Kunanyá cumplikuchun paypa nisqankunaqa.
16 Qamta qatinaypaqqa
manam michiq kayniytaqa saqerqanichu.
Sasachakuy tiempokuna hamunantaqa
manam munarqanichu.
Qamqa yachankimiki chaykunataqa.
Qampa qayllaykipim rimarqaniqa.
17 Amapuniyá manchachiwaychu qamqa.
Castigo punchawpi amparaqniymi kanki qamqa.
18 Penqaymanyá churay qatikachawaqniykunataqa.
Penqaymanqa amayá churawaychu ñoqallaytaqa.
Paykunayá kachunku mancharichisqaqa.
Amayá ñoqachu kasaq mancharichisqaqa.
Desgracia punchawtaqa paykunamanyá chayachiy.
Paykunatayá pasaypaqtaqa chinkachiy.
Samana punchawpi samanankumanta
19 Tayta Diosmi niwarqa:
—Runakunapa Yaykunan sutiyoq zaguanman rispaykiyá chaypi sayaykamuy.
Chaynintam yaykunkupas hinaspa lloqsinkupas Juda nacionpa reyninkuna.
Chaynallatam ruranki Jerusalen llaqtapa llapallan zaguanninkunapipas.
20 Chaypim kaynata nimunki:
“Juda nacionpa reyninkuna,
Juda nacionniyoq llapallan runakuna,
Jerusalen llaqtapi yachaqkuna otaq kay zaguanninta yaykuqkuna,
uyariychik Tayta Diospa palabranta.
21 Paymi kaynata nin:
‘Vidaykichikraykuyá cuidakuychik.
Samana punchawpiqa amam kay llaqtapa zaguan punkunkunata cargakunata apaykunkichikchu.
22 Chay punchawpiqa amataqmi wasikichikmantapas cargakunata horqonkichikchu,
amamá imapipas llamkankichikchu.
Abueloykichikkunaman kamachisqayta hinamá samana punchawtaqa ñoqapaq sapaqchankichik.
23 Chay abueloykichikkunaqa manam kasukurqakuchu nitaqmi atienderqakuchu.
Paykunaqa sonqonkuta rumiyaykachispam mana kasukurqakuchu nitaq corregikurqakuchu’ nispa.
24 “Ñoqa Tayta Diosmi nini:
‘Kay llaqtapa zaguanninta samana punchawpi cargakunata mana apaykuptikichikqa chaynataq mana imallapipas llamkaspa chay punchawta ñoqapaq sapaqchapuwaptikichikqa.
25 Rey Davidpa miraynin gobiernaq reykunawan kamachikuqkunam carretakunapi chaynataq caballokunapi sillasqa kay llaqtapa zaguanninta yaykunqaku.
Paykunaqa yaykunqa Juda nacionniyoq runakunapiwanmi hinaspa Jerusalen llaqtayoq runakunapiwanmi.
Kay llaqtapiqa runakunam wiñaypaq yachanqaku.
26 Runakunam hamunqa Juda nacionpi llaqtakunamanta,
Jerusalen llaqtapa muyuriqninkunamanta,
Benjamin castapa allpan lawmanta,
waqtakuna lawmanta,
orqokunamanta hinaspa Neguev lawmanta.
Ñoqa Tayta Diospa temploymanmi apamunqaku lliw kañana animalkunata,
wañuchipuwanankupaq wakin animalkunata,
kawsaykunamanta ofrendakunata,
inciensota hinaspa graciasta qowanankupaq ofrendakunata.
27 Sichu mana kasuwaspaykichik samana punchawta mana sapaqchaspa chay punchawpiraq Jerusalen llaqtapa zaguan punkunkunata cargakunata apaykuptikichikqa kay llaqtapa zaguan punkunkunatam kañaykusaq hinaptinmi Jerusalen llaqtapa palacionkunatapas ruparunqa.
Chay ninataqa manam pipas amachayta atinqachu.’ ”