Davidman Tayta Dios prometesqanmanta
Diosman asuykunapaq taki
132
Dios Taytalláy,
Davidmantayá yuyariy.
Tukuy ñakarisqanmantayá yuyariy.
2 Qam Tayta Diosman
juramentasqanmantayá yuyariy.
Jacobpa atiyniyoq Diosnin
kasqaykirayku prometesusqaykitayá yuyariy.
3 Paymi nirqa:
Manam wasiyman yaykusaqchu
nitaqmi kamaypipas waqtapasaqchu.
4 Manam huk ñawitapas puñusaqchu,
manataqmi puñunayachikusaqchu.
5 Tayta Diospaq sitiota tarinaykama.
Jacobpa atiyniyoq Diosninpaq
yachananta tarinaykama.
6 Diospa baulninmantam
uyarirqaniku Efrata lawpi.
Chay baultam tarirqaniku
Jaar law chakrapi.
7 Diospa yachananmanyá
ñoqanchikqa yaykusunchik.
Qayllanpi kaq baulninpa
ñawpaqninpiyá qonqorakusunchik.
8 Dios Taytalláy,
samanayki sitiomanyá
qamqa riypuni.
Atiyniki qawachiq
baulnikiwanyá yaykuypuni.
9 Sacerdotekikunapas allin ruraywanyá
pachasqa kachunku.
Qanman sonqo runakunapas
kusikuymantayá qaparichunku.
10 Serviqniki Davidraykuyá
reytaqa ama qepanchakuychu.
Aceitewan tallichisqaykitaqa
amayá qepanchakuychu.
11 Davidmanmi Tayta Dios
cheqaptapuni juramentarqa.
Manam qepaman kutinqachu
chay juramentasqanmantaqa.
Miraynikitam gobiernachisaq,
nispanmi nirqa.
12 Miraynikikuna contratoyta cumpliptinqa,
miraynikikuna kamachisqaykunata cumpliptinqa
paykunapa mirayninpas
wiñaypaqmi gobiernanqa,
nispanmi nirqa.
13 Tayta Diosqa
Sion Moqotam akllakurqa.
Tayta Diosqa
chaypi yachaytam munarqa.
14 Paymi nirqa:
Kay moqom wiñaypaq kanay sitio.
Kaymi yachanaypaq munasqay sitio.
15 Kawsayninkutam sinchita ruruchisaq.
Wakchakunatam mikuywan saksachisaq.
16 Ñoqaqa salvacionniywanmi
pachaykachisaq sacerdotenkunatapas.
Kusikuymantam qaparinqaku
ñoqaman sonqo runankunapas.
17 Sion Moqopim Davidpa mirayninmanta
atiyniyoq reyta gobiernachisaq.
Aceitewan tallichisqay reytam
lamparata hina ratachisaq.
18 Enemigonkunatam penqayman churasaq.
Paypa gobiernontañataqmi sumaqyachisaq.